Kon Nganong Daghan ang Nagtuo nga Matapos ang Kalibotan

ANG kalibotan sa pagkatinuod anaa na sa malisod kaayo nga kahimtang, ingon sa dawaton dayon sa daghan karon. “Nakapangutana ako ug mga tawo gikan sa nagkalainlaing bahin sa kalibotan kon unsay ilang hunahuna bahin sa atong tsansa sa umaabot,” ang ebanghelisador nga si Billy Graham misulat. “Ang kadaghanan kanila dili maayog panglantaw sa umaabot. . . . Kanunay nga ang mga pulong ‘Armageddon’ ug ‘Apocalipsis’ gigamit sa pagbatbat sa mga nagakahitabo sa kalibotan.”

Nganong ang mga pulong “Armageddon” ug “Apocalipsis” kanunayng gigamit sa pagbatbat sa kahimtang sa kalibotan karon? Unsay kahulogan niini?

Biblikanhong mga Sinugdanan

Ang Bibliya naghisgot bahin “sa gubat sa dakong adlaw sa Diyos nga Labing-Gamhanan” ug gilangkit kini nga gubat sa dapit nga “gitawag sa Hebreohanon nga Har–Magedon,” o Armageddon. (Pinadayag 16:​14-16) Ang Webster’s New Collegiate Dictionary nagbatbat sa Armageddon ingong “usa ka kataposan ug mahukmanong gubat tali sa mga puwersa sa maayo ug daotan.”

Bisan pag ang “apocalipsis” gikuha gikan sa Gregong pulong nga nagkahulogang “pinadayag,” o “pagbutyag,” kini adunay lain pang kahulogan. Gipasiugda sa basahon sa Bibliya nga Pinadayag, o Apocalipsis, ang paglaglag sa Diyos sa daotan ug ang Usa ka Libo ka Tuig nga Pagmando sa iyang Anak, si Jesu-Kristo. (Pinadayag 19:​11-16; 20:6) Busa, ang Webster’s New Collegiate Dictionary nagbatbat sa “apocalipsis” ingong “usa ka haduol nga kosmikong katalagman diin pagalaglagon sa Diyos ang nagamandong mga gahom sa daotan ug bangonon ang matarong ngadto sa kinabuhi diha sa mesiyanikong gingharian.”

Kon maghisgot ang mga tawo karon bahin sa kalibotan ug sa kahimtang niini, sila dayag nga naimpluwensiyahan sa gipamulong sa Bibliya. Unsa man gayoy giingon sa Bibliya bahin sa kataposan sa kalibotan?

Ang Bibliya ug ang Kataposan sa Kalibotan

Tin-awng gitagna sa Bibliya ang kataposan sa kalibotan. Si Jesu-Kristo ug ang iyang mga disipulo naghisgot bahin sa panahon sa kataposan. (Mateo 13:​39, 40, 49; 24:3; 2 Timoteo 3:1; 2 Pedro 3:​3; King James Version) Hinunoa, kini wala magpasabot nga ang kalibotan mismo pagalaglagon. Bahin sa literal nga yuta, ang Bibliya nag-ingon: “Kini dili gayod matarog sa panahong walay kataposan, o hangtod sa kahangtoran.” (Salmo 104:5) Ang ekspresyong “kataposan sa kalibotan” yanong nagkahulogang “kataposan sa sistema sa mga butang.”​—New World Translation.

Si apostol Pedro naghisgot bahin sa kalibotan sa wala pa ang Lunop sa panahon ni Noe ug miingon: “Ang kalibotan niadtong panahona [gilangkoban sa mga tawong dili-diyosnon] nakaagom sa kalaglagan sa dihang gilunopan kini sa tubig.” Unya si Pedro nagpadayon sa pag-ingon nga ang atong presenteng kalibotan “gigahin sa adlaw sa paghukom ug sa kalaglagan sa mga tawong dili-diyosnon.” (2 Pedro 3:​5-7) Si apostol Juan misulat usab: “Ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”​—1 Juan 2:17.

Sa panahon sa kataposan niini nga kalibotan, ang dili-makitang dili-diyosnon nga magmamando niini igatambog. (Pinadayag 20:​1-3) Si apostol Pablo misulat bahin niining daotan nga magmamando: “Ang diyos niini nga kalibotan nagabuta sa mga hunahuna nilang mga dili magtutuo.” Si Jesus miingon bahin kaniya: “Karon ang prinsipe niining kalibotana [Satanas nga Yawa] pagapalagpoton.”​—2 Corinto 4:4; Juan 12:31; KJ.

Dili ba usa ka panalangin nga makalingkawas niining kalibotana ug sa daotang magmamando niini? Ang mga Kristohanon dugay nang nag-ampo nga kini matuman, nga nagpangayo nga moabot ang Gingharian sa Diyos ug matuman ang iyang kabubut-on sa yuta. Sila nag-ampo nga molihok si Jesu-Kristo sa pagsunod sa sugo sa iyang Amahan nga kuhaan ang yuta sa tanang pagkadaotan!​—Salmo 110:​1, 2; Proverbio 2:​21, 22; Daniel 2:44; Mateo 6:​9, 10.

Ugaling, kini mopatungha ug usa ka pangutana: Mahimo ba nga ang bakak, o sayop, nga mga tagna sa kataposan sa kalibotan mitungha tungod sa sayop nga pagsabot o sayop nga pagpadapat sa tinuod nga mga tagna sa Bibliya? Atong tan-awon.

Mga Sayop nga Pagsabot sa Unang Siglo

Tagda kon unsay nahitabo sa unang siglo. Sa hapit nang mokayab si Jesus sa langit, ang iyang mga apostoles maikagong nangutana: “Ginoo, ipasig-uli mo ba ang gingharian sa Israel niining panahona?” Buot nilang matagamtam dihadiha ang mga panalangin sa Gingharian, apan si Jesus miingon: “Dili inyoha ang pagbatog kahibalo sa mga panahon o mga yugto sa panahon nga gikabutang sa Amahan sa iyang kaugalingong kamandoan.”​—Buhat 1:​6, 7.

Tulo ka adlaw una pa siya namatay, si Jesus samang miingon: “Busa, padayong magbantay tungod kay wala kamo mahibalo kon sa unsang adlawa moabot ang inyong Ginoo.” Siya midugang: “Mahitungod niana nga adlaw o takna walay nahibalo, ni ang mga anghel sa langit ni ang Anak, gawas sa Amahan. Padayon sa pagtan-aw, padayon sa pagtukaw, kay wala kamo mahibalo kon kanus-a ang tinudlong panahon.” (Mateo 24:​42, 44; Marcos 13:​32, 33) Pipila ka bulan una pa niana, si Jesus usab nagdasig: “Magpabiling andam, tungod kay sa takna nga wala ninyo hunahunaang lagmit mao ang Anak sa tawo moabot.”​—Lucas 12:40.

Bisan pa sa maong mga pasidaan nga gihatag ni Jesus, ang unang mga Kristohanon, nga naghinamhinam sa pag-abot sa presensiya ni Kristo ug sa mga panalangin nga ipatungha niini, misugod sa pagpamanabana bahin sa kon kanus-a matuman ang mga saad sa Gingharian. Busa, gisulatan ni apostol Pablo ang mga taga-Tesalonica: “Maylabot sa pagkaanaa sa atong Ginoong Jesu-Kristo ug sa atong pagkagitigom ngadto kaniya, kami nagahangyo kaninyo nga dili daling matay-og sa inyong pangatarongan ni maukyab man pinaagi sa usa ka inspiradong pahayag o pinaagi sa usa ka binaba nga mensahe o pinaagi sa usa ka sulat nga daw gikan kanamo, nga sa diwang ang adlaw ni Jehova ania na.”​—2 Tesalonica 2:​1, 2.

Ang mga pulong ni Pablo nagpakita nga ang pipila sa unang mga Kristohanon nakabaton ug sayop nga mga pagdahom. Bisan tuod ang mga Kristohanon sa Tesalonica tingali wala magtagna ug partikular nga petsa sa ilang ‘pagkagitigom ngadto kang Kristo sa langit,’ sila dayag nga nagtuo nga kana nga hitabo haduol na. Kinahanglan nilang tul-iron ang ilang mga hunahuna, ug gihimo kini sa sulat ni Pablo.

Ang Uban Kinahanglang Tul-iron Usab

Sama sa atong nakita sa unang artikulo, human sa unang siglo, ang uban usab nagpaabot sa katumanan sa mga saad sa Diyos sa usa ka partikular nga panahon. Ang uban nanagna nga ang kataposan sa usa ka libo ka tuig, nga nag-ihap gikan sa pagkatawo ni Jesus o gikan sa iyang kamatayon, makakita sa kataposan niining kalibotana. Apan ang ilang mga panagna napamatud-an usab nga bakak, o sayop.

Kini mopatungha sa mga pangutana: Ang mga sayop ba bahin sa katumanan sa mga saad sa Bibliya nagkahulogan nga ang mga saad mismo sayop? Ang mga saad ba sa Diyos kasaligan? Ug sa unsang paagi gidawat sa modernong mga Kristohanon ang pagtul-id bahin niining butanga?