Apokalipsis—Unsa Kini?

“ANG Apokalipsis!” Unsay motungha sa imong hunahuna kon makadungog ka nianang ekspresyona? Kini ba maoy adlaw sa kalaglagan? Kaugdawan sa kinabuhi? Gubat sa Kalibotan III? Ang kataposan sa kalibotan? Kon motungha kining mga hulagwaya sa hunahuna, wala ka mag-inusara nianang bahina. Gilarawan sa siyensiya ug sa mga palumagian sa balita ang kaugmaon nga mangiob. Busa ikatingala ba nga gilangkit sa kadaghanan ang apokalipsis sa pagkapuo sa tawo pinaagi sa usa ka malaglagong hitabo?

“Ang apokalipsis karon dili lamang usa ka biblikanhong paghulagway kondili kini nahimong tinuod kaayo nga posibilidad,” mipasidaan ang Sekretaryo-Heneral sa HK si Javier Pérez de Cuéllar sa iyang pasubo nga pakigpulong. “Wala pa sukad sa tawhanong kaagi nga nabutang kita sa tunga sa kalaglagan ug sa kaluwasan.” Unsay iyang gitumong? Ang nukleyar nga gubat nga motungha tungod sa pagpakusog sa lumba sa armas karon. Nagpalig-on sa iyang pasidaan sa Hiniusang Kanasoran, siya miingon nga “gigamit sa mga 500,000 ka siyentista sa tibuok kalibotan ang ilang kahibalo sa pagdiskobre ug hinagiban nga mas moderno ug mas makamatay.”

Ang uban, usab, nakamatikod sa kahimtang karon. Si Hans Jonas, retiradong propesor sa pilosopiya sa New School for Social Research, miingon nga ang iyang dakong gikahadlokan mao ang “hulga sa apokalipsis nga basig motungha gikan sa wala tuyoang puwersa sa teknikal nga sibilisasyon.” Iyang gilangkit ang apokalipsis sa ‘pagkapuo, polusyon, kalumpagan sa planeta, ug hulga usab sa kalit nga kalaglagan pinaagi sa bomba atomika.’

Busa, ang manalaysay si Golo Mann miingon: “Dili kita makaarang sa pagbaton ug lain pang gubat sa kalibotan. Sayop nga pulong ang gubat. Kinahanglang atong ibando ang terminong ‘Gubat sa Kalibotan III’ ug moingong apokalipsis o kaugdawan sa kinabuhi.”​—Die Zeit sa Hamburg, Agosto 30, 1985.

Oo, naila sa tawo nga siya nahimutang sa ngilit sa kalaglagan sa kaugalingon. Apan siya ba ang mopukaw sa apokalipsis? Dili sumala sa Bibliya, nga nag-ingon nga si “Jehova nga Diyos, ang Labing Makagagahom”​—dili tawo—​ang “molaglag niadtong magalaglag sa yuta.” (Pinadayag 11:17, 18) Busa, ang pagsabot kon unsa ang apokalipsis sumala sa hunahuna sa Bibliya mohatag kanimo ug lahi nga panglantaw, bug-os bag-o ug masanagon.

Kon Unsa Gayod Kini

Ang apokalipsis gibatbat diha sa sulat ngadto sa mga taga Tesalonica. Didto si apostol Pablo miingon: “Sanglit giisip man sa Diyos nga matarong ang pagbalos ug kasakit sa nagapasakit kaninyo . . . , apan, kamo nga ginasakit, uban kanamo kamo hatagan niyag kahupayan sa igapadayag [o, apokalipsis] ang Ginoong Jesus gikan sa langit uban sa iyang gamhanong mga manulonda diha sa nagadilaab nga kalayo, sa magpahamtang siya ug panimalos diha kanila nga wala makaila sa Diyos ug kanila nga wala magmasinugtanon sa maayong balita sa atong Ginoong Jesus. Makaagom sila ug silot sa walay kataposang kalaglagan.”​—2 Tesalonica 1:6-10.

Busa, ang apokalipsis, mao ang pagpadayag ni Jesus sa yugto sa panahon sa “dakong kasakitan.” (Mateo 24:21) Sumala sa kang W. E. Vine nga An Expository Dictionary of New Testament Words, ang Gregong pulong a·pokaʹly·psis nagpunting kang “Ginoong Jesu-​Kristo sa Iyang pag-abot sa paghamtang sa silot sa Diyos.” Sa laing bahin, gipunting sa Bibliya kini nga pagpadayag, o apokalipsis, ingong “ang gubat sa dakong adlaw sa Diyos nga Makagagahom” sa Armageddon.​—Pinadayag 16:14, 16; 19:11-21.a

Tinuod, mahitungod sa apokalipsis, atong nakita nga ang Bibliya naghisgot ug “kasakitan,” “panimalos,” ug “silot.” Apan, naghisgot usab kini ug “kahupayan” sa mga inosente nga nag-antos sa kasakitan. Ang Pulong sa Diyos nagsaad kanato nga sa “dili madugay ang daotan mangawala.” (Salmo 37:10) Busa ang apokalipsis makalibre sa katawhan sa tanang daotang mga impluwensiya. Kini mahimong lisoanang punto sa mas maayong mga kahimtang alang sa mga matinud-anon ug kasingkasing—dili kini usa ka hitabo nga ilang kahadlokan.

Busa, imbes bug-os nga kalaglagan alang sa tanan, o pagkapuo, ang apokalipsis maoy matarong nga sulbad sa mga suliran sa katawhan. Dili ba ang ideya sa pagkinabuhi sa usa ka bag-ong yugto sa panahon—usa ka yugto sa panahon nga matarong, malinaw, ug paglipay—madanihon kanimo ug sa imong pamilya?

Apan haduol na ba kita sa apokalipsis sa Bibliya? Kon mao, may paagi bang masayod kita sa eksaktong panahon niini?

[Mga footnote]