Ang Pakigbugno Batok sa mga Katalagman Nakadaog
ANG mga paningkamot sa Hiniusang Kanasoran ug sa indibiduwal nga mga kagamhanan sa pagpakunhod sa mga epekto sa kinaiyanhong mga katalagman tinuod nga dalayegon. Ang mga proyekto sama sa International Decade for Natural Disaster Reduction nagsugyot nga ang katawhan dili kinahanglang walay mahimo atubangan sa maong mga kalamidad. Kon ang mga indibiduwal, mga komunidad, ug mga kagamhanan mohimog hustong mga lakang, mahimong maluwas ang mga kinabuhi.
Kini makaiikag kaayo, tungod kay ang Bibliya nagsugilon kanato nga sa dili madugay adunay usa ka kausaban sa pagdumala sa kagamhanan sa katawhan. Sukad pa sa mga adlaw ni Jesus, ang mga Kristohanon nag-ampo sa Pag-ampo sa Ginoo (ang “Amahan Namo”), nga naglakip sa ekspresyon: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Ang Gingharian sa Diyos maoy usa ka aktuwal nga kagamhanan. Sumala sa tagna sa Bibliya, sa dili madugay kini “modugmok ug mout-ot sa tanang [tawhanong] mga gingharian, ug kini mismo molungtad sa walay kataposan.” (Daniel 2:44) Handurawa ang tanang katawhan nga mailalom sa usa ka hingpit nga kagamhanan. Pagkadako unya kana nga kausaban!
Kon nakita sa presenteng-adlawng mga kagamhanan ang panginahanglan sa paghimog mga lakang aron ang kinaiyanhong mga kapeligrohan dili mahimong kinaiyanhong mga katalagman, kita makasalig nga ipaneguro sa kagamhanan sa Diyos nga ang mga sakop niini dili gayod mag-antos niining paagiha. Ang Gingharian sa Diyos mohatag ug walay kataposang kalinaw niining planetaha sa unang higayon sukad nga gipatay ni Cain si Abel. Ilalom niana nga Gingharian, “ang mga maaghop magapanunod sa yuta, ug sila makakaplag ug tumang kalipay sa kadagaya sa pakigdait.” (Salmo 37:11) Pagatudloan sa Gingharian ang katawhan aron sa tinuod gayod nga diwa ‘ang tanang mga tawo mahimong tinudloan ni Jehova, ug ang ilang pakigdait dagaya.’—Isaias 54:13.
Karon, ang kadaghanang biktima sa kinaiyanhong mga katalagman maoy mga kabos. Hinunoa, uban sa hingpit nga pagdumala ug hustong edukasyon, ilalom sa Gingharian sa Diyos, ang katawhan dili mag-antos sa mga kasakit sa kakabos. Sa dihang nagtagna sa maong mga kahimtang sa paagi nga masabtan sa mga tawo sa iyang adlaw, ang manalagnang Isaias nagsulat: “Si Jehova sa mga panon maghikay alang sa tanang mga katawhan, niining bukira, usa ka kombira sa matambok nga mga pagkaon, usa ka kombira sa mga bino nga pinalugdang, sa matambok nga mga pagkaon nga puno sa utok, sa mga bino nga pinalugdang nga maayong pagkaitos.” (Isaias 25:6) Oo, usa ka kombira sa maayong mga butang! Dugang nagbatbat sa kinabuhi ilalom sa pagmando sa Gingharian, ang salmista nagsulat: “Adunay daghang trigo sa yuta; sa tumoy sa kabukiran magsugwak. Ang bunga niini mahimong sama sa Lebano, ug sila nga anaa sa siyudad mamulak sama sa talamnon sa yuta.”—Salmo 72:16.
Matin-aw, ang pakigbugno sa tawo batok sa kinaiyanhong mga katalagman matapos na unya. Uban sa paggiya sa espiritu sa Diyos ug sa pagmando sa Gingharian sa Diyos, ang mga tawong mahinadlokon sa Diyos maoy makadaog sa maong pakigbugno. Pagkadakong kahupayan unya kana!