Ang Hunahuna sa Bibliya

Panapaw—Magpasaylo o Dili Magpasaylo?

“IPASAYLO ang bisan unsa nga inyong gihuptan batok kang bisan kinsa; aron nga ang inyong Amahan nga anaa sa mga langit mopasaylo usab kaninyo sa inyong mga kalapasan.” (Marcos 11:25) Kanang mga pulonga ni Jesus nagpatunghag pipila ka lisod nga mga pangutana sa kahimtang sa usa ka kaminyoon nga gitugaw sa panapaw: Ang inosenteng Kristohanon kinahanglan bang magpasaylo sa iyang kapikas ug ipadayon nga nahugpong ang kaminyoon?a Kon siya modesidir nga makigdiborsiyo, iya bang gidaot ang relasyon niya uban sa Diyos? Tan-awon nato kon sa unsang paagi motabang ang Bibliya pagtubag sa maong mga pangutana.

Kinahanglan ba nga Ikaw Magpasaylo Kanunay?

Ang mga pulong ni Jesus, “ipasaylo ang bisan unsa nga inyong gihuptan batok kang bisan kinsa,” nagkahulogan ba nga sa tanang kaso​—lakip sa dihang mohimog pagpanapaw ang usa ka kapikas—​ang Kristohanon obligado nga magpasaylo? Ang pahayag ni Jesus kinahanglang sabton samtang tagdon ang ubang mga komento nga iyang gihimo bahin sa pagpasaylo.

Pananglitan, atong nakat-onan ang usa ka hinungdanong prinsipyo bahin sa pagpasaylo gikan sa mga pulong ni Jesus nga natala sa Lucas 17:​3, 4: “Kon ang imong igsoon makahimog sala badlonga siya, ug kon siya maghinulsol pasayloa siya. Bisan pag siya makasala ug pito ka higayon sa usa ka adlaw batok kanimo ug siya mobalik kanimo sa pito ka higayon, nga mag-ingon, ‘Ako nagahinulsol,’ angay mo siyang pasayloon.” Tino nga sa mga kaso sa seryosong sala, ang gibuhatan ug sala gidasig nga magpasaylo kon adunay tim-os nga paghinulsol. Si Jehova mismo nag-isip sa mga butang niining paagiha; aron makadawat ug balaang pagpasaylo, kinahanglang kita tim-os nga maghinulsol.​—Lucas 3:3; Buhat 2:38; 8:​22.

Bisan pa, kini nagpakita usab nga kon ang nakapanapawng kapikas dili mahinulsolon, nga dili modawat sa responsabilidad sa iyang sala, hisabtang ang inosenteng kapikas tingali mopalabi nga dili magpasaylo.​—Itandi ang 1 Juan 1:​8, 9.

Pagpasaylo​—Unsay Ikasulti Bahin sa mga Sangpotanan?

Apan, unsaon pag-isip ang kahimtang kon mahinulsolon ang mananapaw? Sa dihang adunay paghinulsol, adunay pasikaranan ang pagpasaylo. Apan ang pagpasaylo ba nagpasabot nga ang mamumuhat ug daotan nahigawas sa tanang sangpotanan sa iyang daotang buhat? Tagda ang pila ka pananglitan sa pagpasaylo ni Jehova.

Sa dihang ang mga Israelinhon mirebelde human mamati sa napulo ka espiya nga mihatag ug daotang taho bahin sa yuta sa Canaan, si Moises nangaliyupo kang Jehova: “Palihog, pasayloa ang kasaypanan niining maong katawhan.” Mitubag si Jehova: “Ako nagpasaylo sumala sa imong pulong.” Nagpasabot ba kini nga ang mga nakasala nahigawas na gikan sa bisan unsang mga sangpotanan sa ilang mga lihok? Si Jehova nagpadayon: “Apan ang tanang tawo nga . . . wala mamati sa akong tingog, dili gayod makakita sa yuta nga akong gipanumpa ngadto sa ilang mga amahan.” (Numeros 14:​19-23) Gituman ni Jehova ang iyang gisulti; kadtong mas gulang nga kaliwatan​—gawas kang Josue ug Caleb—​wala makakita sa Yutang Saad.​—Numeros 26:​64, 65.

Sa susama, sa dihang gibadlong ni propetang Nathan si Haring David tungod sa iyang sala uban kang Bath-sheba, ang mahinulsolong David miangkon: “Nakasala ako batok kang Jehova.” Unya gisultihan ni Nathan si David: “Si Jehova, sa baylo, magpasaylo sa imong sala.” (2 Samuel 12:13) Apan, bisan pag gipasaylo ni Jehova si David, sa nahibilin niyang kinabuhi giantos ni David ang mga sangpotanan sa iyang sala.​—2 Samuel 12:​9-14; tan-awa usab ang 2 Samuel, kapitulo 24.

Kining maong mga pananglitan sa balaang pagpasaylo nagpasiugda sa usa ka hinungdanong leksiyon: Kita dili makasala nga dili masilotan. (Galacia 6:​7, 8) Ang mahinulsolong makasasala, bisan pag makadawat siya tingalig kapasayloan, dili gayod mahigawas sa mga sangpotanan sa iyang daotang buhat. Nagpasabot ba kini nga ang inosenteng kapikas mahimong magpasaylo sa mananapaw​—labing menos sa diwa nga wad-on na ang mapait nga kayugot—​ug unya mohukom gihapon sa pagdiborsiyo kaniya?

Pagpasaylo ug Diborsiyo

Panahon sa iyang ministeryo, sa tulo ka okasyon si Jesus naghisgot ug diborsiyo. (Mateo 5:32; 19:​3-9; Lucas 16:18) Makaiikag, sa bisan hain sa maong mga paghisgot si Jesus wala maghisgot bisan kas-a sa pagpasaylo. Pananglitan, sumala sa makita sa Mateo 19:​9, siya miingon: “Si bisan kinsa nga magdiborsiyo sa iyang asawa, gawas sa hinungdan nga pakighilawas, ug maminyog lain makapanapaw.” Sa pag-ingon “gawas sa hinungdan nga pakighilawas,” giila ni Jesus nga ang seksuwal nga imoralidad maghatag sa inosenteng kapikas ug katungod, o Kasulatanhong “hinungdan,” sa pagdiborsiyo. Apan, si Jesus wala mag-ingon nga ang inosenteng kapikas kinahanglang magdiborsiyo. Bisan pa niana, tin-aw niyang gipasabot nga siya makahimo sa pagdiborsiyo.

Ang kaminyoon maoy usa ka bugkos nga maghugpong sa duha ka tawo. (Roma 7:2) Apan sa dihang ang usa kanila magluib, ang bugkos mahimong mabugto. Sa maong mga kahimtang ang inosenteng kapikas sa pagkatinuod nag-atubang sa kahimtang nga kinahanglang mohimog duha ka desisyon. Una, angay bang magpasaylo siya? Sumala sa ato nang nakita, ang usa ka bililhong elemento dinhi maoy kon kaha ang mananapaw maoy tim-os nga mahinulsolon o dili. Kon adunay paghinulsol, ang inosenteng kapikas sa nahaigong panahon tingali magpasaylo​—labing menos sa diwa nga wad-on ang kayugot.

Ang ikaduhang desisyon mao, angay bang makigdiborsiyo siya? Nganong motungha man kining pangutanaha kon siya nakapasaylo na kaniya?b Aw, unsa na man kon siya adunay angay nga mga kabalaka bahin sa pagkaluwas sa iyang kaugalingon ug sa iyang mga anak, ilabina kon ang iyang bana mapasipad-anon sa nangagi? O unsa na man kon adunay mga kabalaka nga matakdan sa usa ka sakit nga mapasa sa pagpakigsekso? O unsa man kon dulot ang iyang kahiubos nga tungod sa iyang pagluib, dili na siya makasalig kaniya diha sa bana-asawa nga relasyon? Sa maong mga kahimtang mahunahunaan gayod nga ang inosenteng kapikas makapasaylo sa iyang kapikas nga nakasala (sa diwa nga wad-on ang kayugot) ug bisan pa mohukom gihapon nga makigdiborsiyo kaniya tungod kay dili na niya gusto nga magpadayon nga makig-ipon kaniya. Ang pagwala sa kayugot mahimong makatabang nga siya makapadayon sa iyang pagkinabuhi. Kana mahimong makatabang usab nga mahimong mas matinahoron ang bisan unsang kinahanglanong pagpakiglabot sa umaabot uban sa mananapaw.

Kon kaha mokuhag diborsiyo gikan sa maluibong kapikas maoy personal nga desisyon, usa nga angayng himoon sa inosenteng kapikas human sa mainampingon ug mainampoon nga pagtimbangtimbang sa tanang butang nga nalangkit. (Salmo 55:22) Ang uban walay katungod sa pagsulay pagdiktar o pagpugos sa inosenteng kapikas sa paghukom nga makigdiborsiyo ba o dili. (Itandi ang Galacia 6:5.) Hinumdomi, si Jesus wala mag-ingon kon unsay angayng buhaton sa inosenteng kapikas. Nan, tin-aw nga si Jehova dili masuko niadtong mopalabing makigdiborsiyo pinasukad sa tukmang Kasulatanhon nga mga hinungdan.

[Mga footnote]

[Picture Credit Line sa panid 10]

Life