Ang Disiplina Nahimong Akong Kaluwasan
SA KUWATRO anyos pa ako, gipalista ako sa akong mga ginikanan sa calisthenics class. Kini nagkinahanglag praktis, ug ako kinahanglang magpraktis dungan sa ubang mga batang babaye. Wala magdugay human niadto, misugod ako sa pagbansay sa pagkahimong usa ka baylerina. Ang disiplina nahimong bahin sa akong kinabuhi.
Ang akong mga ginikanan maoy tinuod nga mga tigdisiplina ug nagpaabot nga ang ilang mga anak may maayog-batasan, buotan, ug matinahoron. Naghunahuna ako nga sila dili makataronganon usahay, apan karon sa mamalandong ako sa nangagi—sanglit nakapadako ug akong kaugalingong tulo ka anak—nasabtan ko ang bili sa disiplina. Sa pagkatinuod, mapasalamaton ako sa akong mga ginikanan sa pagkahimong matinagaron kaayo.
Ang akong sayo nga pagbansay sa pagdisiplina-sa-kaugalingon, ingon man sa pagtrabaho ingong bahin sa usa ka tem, nakatabang kanako sa ulahi sa kinabuhi.
Pagsagubang sa mga Kalisod
Sa edad otso, gitakboyan ako ug rheumatic fever, usa ka sakit nga nagpaligid kanako sa banig. Ako nag-antos sa grabeng kangutngot sa duha ka tuhod, ug ako wala tugoti sa paglakaw sulod sa 12 ka bulan. Gidala ako sa akong mahigugmaong pamilya bisan asa. Wala gayoy nagtuo nga ako makasayaw pa pag-usab. Apan tungod sa pag-atiman nga akong nadawat gikan sa akong mga ginikanan, uban sa kahanas ug pailob sa among doktor sa pamilya, ako bug-os naulian ug mibalik sa akong pagsayaw nga mas determinado pa aron mahimong labing maayong baylerina.
Gitugotan ako sa akong mga ginikanan sa paghunong sa regular nga pagtungha sa edad 16 aron ako makapadayon sa akong karera ingong usa ka baylerina. Gihimo ko kini nga may kasibot ug kadasig. Sa ulahi, ako nagsugod sa pagbansay sa klasikal nga ballet. Kini nagkinahanglan ug dugang nga disiplina-sa-kaugalingon. Sulod sa tulo ka tuig ug tunga, ako nagtuon ug nagbansay unom ka adlaw matag semana.
Sa dihang ako nag-19, gihimo ang mga awdisyon alang sa Ballet School sa Australia. Grabe ang kompetisyon aron madawat niining dungganong tunghaan. Pipila lamang ang pilion sa tibuok Australia. Sa akong kalipay usa ako sa napili. Busa, ako misugod sa 18 ka bulan sa hilabihang pagbansay. Gilakip sa tunghaan ang mga klase sa ballet, mime, drama, ug arte. Ang ballet maoy usa ka matang sa sayaw nga nalangkit ang matahom nga paglubaylubay sa lawas, apan kini nagkinahanglag tinuod nga kalig-on nga daw gihimo kini nga wala mangusog. Busa sa pagpalig-on sa among mga bitiis, nagprograma kami ug mga ehersisyo sa gimnasyum.
Sa kataposan, sa Hunyo 1970, ang mga awdisyon alang sa Ballet Company sa Australia gihimo. Sa makausa pa ako napili, ug sulod sa usa ka semana ako nadawat sa kompaniya.
Kinabuhi sa Lahi nga Kalibotan
Una pa ako nakaamgo kon unsay nahitabo, ako mibiya sa balay sa unang higayon sa akong kinabuhi ug napadpad sa lahi kaayo nga palibot. Ang among kompaniya milibot sa Australia, ug dayon miadto kami sa Asia. Kadto samag nagkinabuhi sa laing kalibotan nga may kaugalingong mga balaod ug mga sukdanan. Dihay dugay makakapoyng mga adlaw ug mga gabii sa pagtrabaho, uban ang nagsakit, nagdugo, giluthan nga mga tiil. Apan ang mga pasundayag takos sa kahago. Lalim gayod nga maanaa sa entablado.
Human nga mipauli kami sa Australia, usa ka epidemya sa trangkaso ang mitakboy sa tibuok kompaniya, nga nagpahunong sa kadaghanan kanamo sa pagpasundayag. Wala ako makasayaw sulod sa tulo ka bulan. Sa mibalik sa kompaniya sa ballet, ako misugod sa pagbatig kalisod sa pagpahiuyon sa kinabuhi sa usa ka baylerina—kanunayng nagpangab-ot ug kahingpitan ug nalimitihan ang bisan unsang matang sa sosyal nga kalihokan gawas sa ballet, sanglit ang panahon ug kakapoy nakababag sa sosyal nga kinabuhi. Human sa akong daghang katuigan sa pagbansay, mao na ba kini ang kataposan sa akong karera?
Misugod ako sa pagkabaton ug dili timbang, nagsagol nga mga pagbati. Nahimo akong hilomon kaayo ug gilain ko ang akong kaugalingon. Sa kataposan, sa milabay ang mga usa ka tuig, nagkasakit ako ug grabeng alerdyik nga gitawag ug urticaria. Tungod niini, ang akong tibuok lawas naapektohan sa naghubag, katol, pulang mga butoybutoy nga nagdako hangtod nga ako namula, nanghupong. Dili na nako kini maagwanta—ako miretiro gikan sa Ballet Company sa Australia. Daghang bulan pa ang milabay una ako naayo. Giatiman na usab ako sa akong mga ginikanan hangtod nga ako naulian sa maayong panglawas.
Kaminyoon ug Pamilya
Sa 1974, nahimamat ko ang usa ka ambongang batan-ong lalaki. Usa siya ka aktor nga adunay iyang kaugalingong negosyo. Nagpakasal kami ug mibiyahe sa tibuok Uropa. Sa mibalik kami sa Australia, ang among unang anak, si Justin, natawo niadtong 1976. Sa ulahi, mibalhin kami sa Perth, ang kaulohan sa Kasadpang Australia, ug mipalit ug hotel. Pagkadako gayod niini nga kausaban sa paagi sa kinabuhi!
Daghan kaayo ang trabahong himoon, sanglit kami lang ang nagpalakaw sa hotel. Mobangon ako sa alas kuwatro sa buntag ug usahay dili makatapos sa pagtrabaho hangtod sa pagkasunod buntag. Dugang pa niini nga kalisod, may kusganong impluwensiya sa mga demonyo sa hotel. Hinayhinayng naapektohan niini ang among kinabuhi, ilabina sa kinabuhi sa akong minahal nga bana. Busa human sa tulo ka tuig, tungod sa mga suliran sa kaminyoon ug salapi, mihukom kami sa pagbaligya sa hotel ug luwason ang among kaminyoon gikan sa pagkabungkag.
Ang among pamilya nahimong lima sa pagkatawo sa among duha ka anak nga babaye, si Bianca ug Victoria. Ang hotel wala dayon mahalin, ug niining panahona nga ako misugod sa pagdangop sa Diyos aron mangayog tabang. Nahinumdom ako sa pag-ampo nga Amahan Namo nga akong nasag-ulo sa bata pa ako. Kadto anaa kanunay sa akong hunahuna, ug kanunay ko kining gibungat.
Sa kataposan, nahalin ang hotel. Ugaling, namatay ang akong bana tungod sa aneurysm tulo ka semana lang una pa kami mibiya sa Perth paingon sa Melbourne. Siya 32 anyos lamang. Hilabihan gayod ang akong kaguol, ug wala kadto mahupay sa dihang gisultihan ako sa usa ka paring Katoliko sa Melbourne nga tungod sa suliran sa akong bana sa mga demonyo, tino nga ang ilang daotang impluwensiya ania usab kanako. Busa giwisikwisikan niya ug agwa “bendita” ang akong tibuok lawas ug ang akong mga anak ug ang tanang lawak sa balay sa akong inahan, diin kami nag-estar.
Mga Pangutana nga Wala Gihapon Matubag
Milabay ang daghang tuig, ug ako nagpadayon sa pagpangutana bahin sa Diyos, apan wala ako makadawat ug bisan unsang makapatagbawng mga tubag gikan sa akong relihiyong Katoliko. Dayon ako midesisyon sa pagbalhin sa among pamilya gikan sa Melbourne ngadto sa mas mainit nga klima sa Queensland. Didto, sa Brisbane, kami nalangkit pag-ayo sa mga kalihokan sa simbahan. Ang mga bata nagtungha sa Katolikong mga tunghaan, ug kaming tanan kanunayng nanimba, nagpuasa, nag-Rosaryo kanunay, ug nagbuhat sa tanan nga akong gituohang gikinahanglan sa Diyos kanamo.
Sanglit ako wala makadawat ug mga tubag sa akong mga pangutana, ako mihukom nga magkinaugalingon sa pagbasa sa usa ka bahin sa Bibliya adlaw-adlaw sa pagtino kon makaplagan ba nako ang mga tubag sa akong kaugalingon. Sa kadugayan nabasa ko ang Mateo 7:7, nga nakapahibulong kanako. Kini yanong nag-ingon nga padayon sa pagpangayo ug padayon sa pagpangayo. ‘Sayon kini,’ ako naghunahuna. Busa gibuhat ko kana. Ako nagpadayon sa pagpangayo sa Diyos ug tabang sa pagtubag sa akong mga pangutana.
Sa Kataposan Gitagana ang mga Tubag
Tungod niini, akong nakita nga dili sulagma lamang nga ang mga Saksi ni Jehova miduaw sa akong pultahan human gilayon niadto. Ang ilang gipanulti katingalahang pamation. Bisag ako namati nga maikagon, wala nako ilha nga kini mao ang akong gipangita. Busa human sa pipila ka pagduaw, akong gisultihan ang mga babaye nga miduaw sa dili na pagbalik pag-usab.
Ako puliki kaayo sa maong panahon sayo sa 1987. Ang akong balay nga gipaayo hapit nang matapos, ug gikinahanglan ko ang usa ka maayong mamimintal aron matapos na ang tanan. Girekomendar sa tigtukod ang usa ka mahigalaon, matinahoron, ug matinabangon nga batan-ong mamimintal ug balay nga ginganlag Peter. Si Peter mahigugmaong naghisgot bahin sa iyang asawa ug mga anak, ug siya hun-ag, hinlo ug panagway. Buot ko nga makabaton ug samang panagway, busa gipangutana ko siya usa ka buntag samtang siya nanimbang diha sa damba: “Diin ka tigsimba?”
Sa pagkahibalo nga siya usa sa mga Saksi ni Jehova, gisamok ko siya sa daghang pangutana inig-abot niya sa pagtrabaho sa buntag hangtod sa paggikan niya sa hapon nga gikapoy. Ug siya nakatubag niadtong tanan. Misugod ako sa pagtuon sa adlaw ug gabii, ug ang Bibliya misugod sa pagkahimong buhi. Sa tumang kalipay, ako miuyon sa usa ka pagtuon sa Bibliya sa balay alang sa tibuok pamilya. Kadto mao ang labing makalilipayng panahon sa among mga kinabuhi tungod sa kangaya sa pagkasayod nga nakaplagan namo ang kamatuoran.
Gidispatsar namo ang tanang basura—ang mga butang sa among mga hunahuna ug mga butang nga nalangkit sa idolatriya. Ang mga bag nga puno sa basura gikuha gikan sa among balay ug gilabay sa basurahan. Wala madugay matinahorong gipapahawa ang akong mga anak sa Katolikong mga tunghaan. Wala sila makaangay sa ilang pagpamatuod bahin kang Jehova.
Nahiusa sa Matuod nga Pagsimba
Kaming upat karon bawtismado nang mga Saksi. Si Justin ug Bianca nakatapos na sa pagtungha ug nag-alagad sa bug-os panahong ministeryo ingong mga payunir. Si Victoria 16 anyos ug nagtungha pa. Ug ikaunom na nako kining tuig sa pagpayunir.
Nakagugol kami ug unom ka tuig sa kongregasyon sa Brisbane, diin ako nakatabang sa duha ka minahal nga tigulang nga mga babaye, nga sa ulahi nagpahinungod sa ilang mga kinabuhi kang Jehova nga Diyos. Niadtong 1994 mibalhin kami sa usa ka dapit diin adunay mas dakong panginahanglan sa mga magmamantala sa Gingharian. Karon kami nag-alagad sa gamayng lungsod nga ginganlag Charleville sa habagatan-kasadpang Queensland. Ang lugar nga pagakobrehan sa among teritoryo nga pagasangyawan dako kaayo, ingon ka dako sa Tasmania nga usa ka isla-estado sa Australia!
Sa pagpalandong sa akong pagkabata ug sa akong pagbansay, ako nakaamgo kon unsa ka dako sa kaayohang akong nakuha gikan sa disiplina. Kini nakatabang kanako sa pagpadapat sa mga prinsipyo sa Bibliya ug sa paghimo sa gikinahanglang mga kausaban sa kinabuhi. Sa pagkatinuod, ang pagpadisiplina karon kang Jehova mohatag tumang kalipay ug paglaom sa walay kataposang mga panalangin alang sa akong kaugalingon ug sa akong minahal nga pamilya.—Proverbio 6:23; 15:33.—Sumala sa giasoy ni Sue Burke.
[Hulagway sa panid 21]
Uban sa akong tulo ka anak