Usa ka Kadaogan sa Minoriya—Diha sa Usa ka Nasod sa Panagsama

SINULAT SA KORESPONSAL SA PAGMATA! SA HAPON

PITO ka kamera sa telebisyon ug ang dinosena nga reporter nagpaabot nga ang batan-ong kihante mopatim-aw sa Osaka High Court Press Club sa dihang misulod sa komperensiyahanang lawak ang 19-anyos nga si Kunihito Kobayashi ug ang iyang mga ginikanan uban ang dagkong mga pahiyom sa ilang mga nawong. Subsob ang mga pangidlap sa kamera diha sa lawak samtang gitubag nila ang mga sukna sa mga reporter.

“Nalipay kaayo ako sa pagkadawat ug di-mapihigong hukom sa akong kaso,” matod ni Kunihito. “Buot nakong makita ang usa ka kalibotan diin si bisan kinsa madawat, makauswag, ug makagraduwar gikan sa bisan unsang hayskul bisan pa kon unsay iyang relihiyosong mga tinuohan.”

Ang Hataas nga Korte sa Osaka nagbalit-ad sa desisyon sa ubos nga Korte sa Distrito sa Kobe ug mihatag kang Kunihito sa iyang gitinguha, ang katungod nga makadawat ug edukasyon bisan pa sa iyang relihiyosong mga tinuohan.

Ang Isyu

Ang butang gikabingkilan sa maong asunto mao ang pagpalagpot kaniya gikan sa Kobe Municipal Industrial Technical College (gitawag ug Kobe Tech sa pinamubo) tungod sa dili pagsalmot sa bansaybansay sa kendo (Hapones nga eskrima), tungod sa relihiyosong mga katarongan. Human sa desisyon sa korte sa Osaka nga nagnulo sa mga aksiyon sa eskuylahan nga naghikaw sa iyang pag-uswag ug unya sa pagpalagpot kaniya, gipahayag ni Kunihito ang iyang tinguha sa pagpadayon sa iyang pagtuon sa elektrikal nga enhinyeria. Ang unang tulo ka tuig diha sa maong lima-ka-tuig nga kolehiyo maoy katumbas sa tulo ka tuig sa hayskul.

Gipugos sa Kobe Tech si Kunihito nga mosalmot sa bansaybansay sa kendo isip bahin sa iyang klase sa physical education. Ugaling, tungod kay siya usa sa mga Saksi ni Jehova, ang iyang konsensiya nga nabansay sa Bibliya dili motugot nga siya mosalmot sa bansaybansay sa martial arts. Alang sa mga reporter sa komperensiya sa prensa, si Kunihito miabli sa iyang Bibliya ug misaysay sa iyang baroganan: “Ilang pagasalsalon ang ilang mga espada ngadto sa mga punta sa daro ug ang ilang mga bangkaw ngadto sa mga galab. Ang nasod dili mobakyaw ug espada batok sa nasod, ni sila makakat-on pa ug gubat.”​—Isaias 2:4.

Nan, nganong midangop sa balaod ang usa ka batan-ong estudyante aron makaangkon sa kagawasan sa relihiyon ug sa katungod nga maedukar? Si Propesor Koji Tonami sa Tsukuba University mipahayag: “Mahimong dunay wa-damhang mga kapit-osan nga ipahamtang diha sa relihiyon sa mga magtutuo isip sangpotanan sa kawalay-pagtagad ug kakulang sa pagsabot.” Bisan pag ang gobyerno o komunidad mahimong dili tinuyong magpig-ot sa usa ka relihiyon, mahimong adunay mga kaso diin dili-tinuyong gipig-otan ang relihiyon.

Nganong ang maong “wa-damhang mga pagpig-ot” gipahamtang sa katungod sa minoriya? “Kay ang katilingbang Hapones nagtamod sa usa ka sistema sa katilingban nga magpugos sa minoriya nga mopahiuyon sa mayoriya,” tubag ni Propesor Hitoshi Serizawa sa Aoyama Gakuin University. Ang pagpit-os nga mopahiuyon sa katilingban sa katibuk-an maoy kusog gayod sa Hapon.

Dili sayon alang sa mga bata nga maanaa sa usa ka sistema sa tunghaan nga magatamay niadtong magpalahi. Hinuon, kini dili lamang butang gikabalak-an sa usa ka relihiyosong minoriya. Hisgotan nato ang kaso sukad sa sinugdanan niini ug tan-awon kon unsay gikabingkilan ug kon sa unsang paagi kining desisyona nag-apektar sa publiko.

Pagtino sa Katungod sa Minoriya

Sa wala pa ang 1990, ang Kobe Tech wala mag-obligar sa mga estudyante niini nga mokuha sa kursong martial arts. Apan pagkahuman sa usa ka gymnasium nga may bansayanan sa martial arts, ang eskuylahan misugod pag-obligar sa mga estudyante niini sa pagbansaybansay sa kendo. Sa 1990 ang mga magtutudlog physical education sa eskuylahan nagmagahion sa baroganan niini labot sa mga Saksi ni Jehova nga mitungha sa Kobe Tech sa edad nga 16. Sa ilang hangyo nga mahigawas sa bansaybansay sa kendo, usa ka magtutudlo miingon: “Undang mo sa pag-eskuyla kon dili ninyo mahimo ang ipabuhat kaninyo sa eskuylahan!”

Alang sa mga batan-ong Saksi nga lig-ong mibarog sa ilang pagtuo, ang kalaomang mouswag sa sunod nga grado mangiob. Laing magtutudlo miingon: “Dili ninyo mabatonan ang mga kredito bisan pag magkugi kamo sa ubang mga dula [sa physical education].” Lima ka estudyante nagpabilin sa ilang pagtuo sa pagtulon-an sa Bibliya pinaagi sa dili pagbakyaw ug espada bisan pag ginama kadtog kawayan. Ang tulo kanila bawtismadong mga Saksi ni Jehova, ug ang duha dili-bawtismado, apan gipamatud-an sa tanan ang pagtuo nila sa Bibliya. Andam sila nga modawat ug bisan unsang kapuli nga mga buluhaton nga ipabuhat sa mga magtutudlo kanila.

Ingong sangpotanan sa ilang pagbarog, wala sila iuswag sa sunod nga grado. Sa misugod ang sunod nga tuig tingtungha niadtong 1991, gitigom sa mga magtutudlo sa physical education ang lima ka estudyante nga wala mosalmot sa bansaybansay sa kendo ug ang siyam nga primero-anyo sa hayskul nga samag relihiyon ug miingon: “Kinahanglang mokuha mog di-katuohang tag-as nga mga grado kon buot ninyong mouswag ug usa ka grado. Walay usa kaninyo ang makakuha sa maong mga grado.” Ang mga magtutudlo dugang misulti kanila: “Dili kini pinugos nga edukasyon. [Sa Hapon, ang pinugos nga edukasyon maoy gikan sa unang grado hangtod sa nuybe grado.] Kami mahimong moingon kaninyo nga ‘gawas kamo dinhi.’”

Ang lima ka estudyante mipasakag sumbong batok sa eskuylahan sa Korte sa Distrito sa Kobe nga nagpatuo nga ang gibuhat sa eskuylahan naglapas sa ilang uyon-sa-konstitusyon nga mga katungod sa kagawasan sa pagsimba ug pagdawat ug edukasyon. Sa samang panahon, gipetisyon sa lima ka estudyante sa Korte sa Distrito sa Kobe ug unya sa Hataas nga Korte sa Osaka nga hunongon ang pagpatuman sa aksiyong maghikaw sa pag-uswag aron makadawat silag mga leksiyon samtang ang kaso ginahusay. Ugaling, ang mga petisyon wala itugot sa duha ka korte.

Duha sa lima ka estudyante gihikawan na usab sa ilang mga kredito alang sa physical education alang sa sunod nga tuig tingtungha ug gibaharan nga ipalagpot. Ingong sangpotanan, usa kanila miundang pag-eskuyla sumala sa pagbuyo sa eskuylahan. Ang lain wala modawat sa sugyot sa eskuylahan nga siya moundang. Kanang estudyanteha, si Kunihito Kobayashi, gipalagpot gikan sa eskuylahan.

Ang mga lagda sa eskuylahan nag-ingon nga ang usa ka estudyanteng mahagbong ug kaduha sa usa ka grado ikapalagpot dihadiha ingong “usa nga menos ug katakos nga makakat-on nga walay purohan nga makagraduwar.” Apan si Kunihito ba “menos ug katakos nga makakat-on”? Bisan pag ilakip ang physical education, nga, tungod sa isyu sa kendo nahagbong siya nga may gradong 48 puntos sa 100, ang aberids niya alang sa tanang subject maoy 90.2 puntos. Siya mismo mao ang kinahaworan sa iyang klase nga may 42 ka estudyante! Siya maayog pamatasan ug andam nga makakat-on.

Gihimo ang mga petisyon ngadto sa Korte sa Distrito sa Kobe ug dayon sa Hataas nga Korte sa Osaka aron dili ipatuman ang maong aksiyon sa pagpalagpot. Apan wala itugot sa duha ka korte ang petisyon.

Ang Desisyon sa Korte sa Distrito

Sa Pebrero 22, 1993, halos duha ka tuig human ipasaka sa lima ka estudyante ang sumbong, ang Korte sa Distrito sa Kobe nagpakanaog sa iyang desisyon nga pabor sa eskuylahan. “Dili ikalimod nga ang kagawasan sa pagsimba sa kihante sa usa ka paagi napig-otan sa panginahanglan sa eskuylahan nga moapil sa bansaybansay sa kendo,” miadmitir ang nagdumalang huwes, si Tadao Tsuji. Apan siya mihinapos nga “ang mga aksiyon nga gihimo sa eskuylahan wala maglapas sa konstitusyon.”

Giapelar dayon sa mga estudyante ang kaso ngadto sa Hataas nga Korte sa Osaka. Bisan pa niana, ang desisyon sa korte sa distrito nakapatugaw sa daghang edukadong tawo. Usa ka tawo mipahayag sa iyang kaugalingon diha sa lindog sa mga magbabasa sa mantalaang Mainichi Shimbun ug miingon: “Ang desisyon niining panahona nasentro sa hukom nga ‘paglapas sa relihiyosong neyutralidad ang pagtugot nga dili moapil sa mga leksiyon sa kendo pinasukad sa relihiyosong mga katarongan.’ Bisan pa, ang neyutralidad nagkahulogan sa pagkawalay dapigan nga bisan unsang partido sa butang gikabingkilan. Ug kon bahin sa relihiyosong neyutralidad, ang gikabingkilan mao ang pagpanalipod sa pagtuo sa minoriya batok sa mayoriya. Busa, ang maong desisyon naghikaw sa kagawasan sa relihiyon, ug gilapas sa korte mismo ang relihiyosong neyutralidad.”

Daghan ang nalisang ug natukmod nga magpahayag sa ilang mga panghunahuna. Si Dr. Takeshi Kobayashi, usa ka propesor sa Konstitusyon sa Nanzan University, nagpadala sa iyang panghunahuna bahin sa maong kaso ngadto sa Hataas nga Korte sa Osaka ug miingon: “Kining kasoha nga gilantugian sa tino nagasukna sa mga korte sa atong nasod kon unsaon nila pagsagubang ang hagit nga panalipdan ang mga katungod sa minoriya. . . . Ang kolehiyo, ubos sa takoban nga pagkabulag sa relihiyon ug Estado ingon man ang neyutral nga baroganan sa publikong edukasyon, sa hingpit midumili sa pagtugot sa relihiyosong baroganan sa usa ka minoriya pinasukad sa gikahiusahang panghunahuna sa mayoriya. Ang desisyon sa ubos nga korte nagdayeg sa maong mga aksiyon ingong nahiuyon sa balaod ug konstitusyon. Ugaling, bisan pag ang mga tinuohan sa usa ka minoriya wala tingali hisabti gikan sa panglantaw sa sagad gituohan ingong relihiyoso, kon ang maong mga tinuohan maoy sinsero, kinahanglang tahoron kini. Ang korte obligado ilabina sa paghukom uban sa kaamgohan nga mao kini ang kinalabwang manlalaban sa minoriya.”

Ang laing batid sa balaod, si Propesor Tetsuo Shimomura sa Tsukuba University, miingon: “Ang butang makahahadlok niining kasoha mao ang lalom-nakagamot gihapon nga mga kiling sa pagdiniktador sa bahin sa eskuylahan.” Miingon siya sa usa ka interbiyo sa telebisyon nga gipadayag niini ang usa ka kahuyangan sa bahin sa mga edukador nga ipalagpot ang usa ka estudyante nga wala siya hatagig bisan unsang kapuling mga lakang ug gipadayag ang kakulang sa konsiderasyon alang sa kaayohan sa mga estudyante.

Sa Pebrero 22, 1994, ang Kobe Bar Association mihimog opisyal nga rekomendasyon ngadto sa prinsipal sa Kobe Tech nga pabalikon pagtungha si Kunihito. Mipahayag kini nga ang aksiyon sa eskuylahan sa paghikaw sa pag-uswag kang Kunihito ug sa pagpalagpot kaniya maoy mga paglapas sa iyang kagawasan sa pagsimba ug sa iyang katungod nga modawat ug edukasyon.

Dili-Mapihigong Desisyon

Samtang nagpadayon ang mga paghusay sa apelasyon, ang upat ka kihante gawas kang Kunihito mihukom nga iatras ang ilang kaso. Tungod kadto kay ang tulo giuswag na ngadto sa sunod nga grado ug ang usa napugos pag-undang. Kadto misangpot nga ang puntong gikabingkilan nasentro sa pagdumala sa eskuylahan kang Kunihito.

Bisan pa niana, ang upat ka kanhi-kasaring ni Kunihito mihatag kaniyag moral nga suportar pinaagi sa pagpaningkamot kanunay nga makatambong sa mga paghusay. Pinaagi sa pagtigom sa gamay niyang kinitaan gikan sa inoras niyang trabaho, ang estudyanteng napugos pag-undang sa pag-eskuyla midonar ug katibuk-ang 100,000 yen aron tabangan si Kunihito nga ipadayon ang legal nga pakigbugno.

Sa Disyembre 22, 1994, si Kunihito duyog sa ubang mga estudyante nagpaabot sa mga pulong ni Pangulong Huwes Reisuke Shimada sa Hataas nga Korte sa Osaka.

“Ang orihinal nga desisyon ginulo,” mihukom si Huwes Shimada.

Si Huwes Shimada, sa iyang makahuloganon kaayong desisyon, mihukom nga ang katarongan ni Kunihito sa pagdumili sa bansaybansay sa kendo maoy sinsero. Ang huwes mipahayag nga isip edukasyonal nga institusyon nga bukas sa publiko, ang Kobe Tech adunay obligasyon sa paghatag ug edukasyonal nga konsiderasyon sa iyang mga estudyante. Siya mipahayag usab nga ang disbentaha kang Kunihito tungod sa pagdumili pagdawat sa bansaybansay sa kendo maoy dako kaayo ug nga ang aksiyon sa pagpalagpot kaniya maoy paghikaw gayod kaniya sa tanang kahigayonan nga makadawat ug edukasyon.

Si Huwes Shimada mihukom nga angayng itagana sa eskuylahan ang kapuling mga lakang. Ang pagtagana nianang kapuling mga lakang, matod niya, dili gayod pagpasiugda o pagtabang sa relihiyon sa apelante, ni magpig-ot kana sa ubang mga estudyante. “Walay ebidensiya nga ang Appellee [ang eskuylahan] mainampingong nagpalandong ug kapuling mga lakang,” mipahayag ang huwes. “Hinunoa, . . . ang Appellee magahiong nangupot sa polisa nga dili itugot ang pagdumili sa bansaybansay sa kendo ug wala gani magpalandong sa mga posibilidad nga itagana ang kapuling mga lakang.”

Kon sa Unsang Paagi Apektado Ka sa Desisyon

Nganong angay kang maikag sa maong kadaogan sa usa ka batan-ong lalaki nga sakop sa usa ka minoriyang grupo? Sa iyang librong The Court and the Constitution, ang kanhi espesyal nga piskal sa Watergate nga si Archibald Cox misukna sa samang pangutana, bahin sa mga Saksi ni Jehova diha sa isyu sa pagsaludar ug bandera sa Tinipong Bansa: “Nganong mabalaka man kita bahin sa espirituwal nga kagawasan nianang gamay kaayong minoriya?”

Sa pagtubag sa maong pangutana, si Cox miingon: “Ang bahin sa tubag nahiluna diha sa prinsipyo sa indibiduwal nga dignidad nga gisandigan sa atong katilingban, usa ka dignidad nga iya sa ortodokso ug sa di-mopahiuyon. Ang bahin sa tubag nahiluna sa kaamgohan nga kon ang Estado mahimong magpahilom sa katakos sa pagsulti sa mga Saksi ni Jehova. . . , ang katakos nato sa pagsulti basin maoy isunod.”

Si Propesor Takeshi Hirano sa Ryukoku University miuyon kang Cox ug miingon niini bahin sa kaso sa kendo: “Ang tighunahunang katawhan nag-isip nga ang kagawasan sa pagsimba sumala sa napahimuslan sa katawhan sa Tinipong Bansa karon nautang nila sa mga Saksi ni Jehova, kinsa nakigbisog alang sa ilang mga katungod sa daghang kaso sa korte. Sa atong nasod [Hapon] usab, gilaoman nga ang kagawasan sa pagsimba matino ug mapausbaw pinaagi sa mga kasong sama niini.”

Gibuhat sa mga Saksi ni Jehova ang ilang maarangan aron mapanalipdan sa legal nga paagi ang ilang mga tinuohan, ug sila dakog amot sa pagtino sa pangunang tawhanong mga katungod sa ika-20ng siglo. Sa daghang nasod ang mga Saksi ni Jehova mao ang nanguna sa legal nga mga pakigbugno nga naglaban sa katungod sa mga pasyente sa may-kasayorang pagpilig tambal, sa katungod sa mga tawo nga mohukom kon unsaon pagpakitag pagtahod alang sa bandera sa nasod, ug sa katungod sa indibiduwal nga ipahayag ang iyang kaugalingong mga tinuohan ngadto sa uban. Ang kadaogan sa Hataas nga Korte sa Osaka nakadugang ug laing anib sa rekord sa mga amot sa mga Saksi ni Jehova aron matino ang mga katungod sa minoriya.

Pagtahod sa Uban nga May Lahing mga Sukdanan

Dugang pa sa kaayohang mapausbaw ang tawhanong mga katungod, ang isyu nga itugot ang mga tinuohan sa minoriya dunay kalabotan diha sa imong kinabuhi sa laing paagi. Si Propesor Kaname Saruya sa Komazawa Women’s University nagtumong sa maong kaso ug miingon: “Ang kagawasan sa relihiyon nga giila sa konstitusyon wala tagda tungod lang sa pagkalahi [sa estudyante]. Kasagaran kaayo sa Hapon nga isalikway ang bisan unsa nga lahi sa naandan.”

Sa katilingban karong adlawa ang pagpit-os sa pagpuo sa lahi, o kon unsay lahi sa naandan, maoy kusog kaayo. Ang pagdaogdaog, nga kaylap kaayo diha sa mga eskuylahan sa Hapon ingon man diha sa ubang mga nasod, maoy usa ka panig-ingnan sa maong kiling sa pagpalagpot gikan sa komunidad sa butang nga lahi. Sa pagkomento bahin sa suliran sa mga tigdaogdaog sa eskuylahan, si Hiroshi Yoshino, ang superintendente-heneral sa Metropolitan Police sa Tokyo, miingon nga sumala sa usa ka surbing gihimo sa National Research Institute of Police Science, ang pagkadagko sa mga hinungdan sa pagdaogdaog, gikan sa bahin sa mga daogdaogan, naglangkit sa mga personalidad ug sa mga aksiyon sa gidaogdaog nga maoy lahi. Siya mihinapos: “Sa akong hunahuna ang makahadlok nga elemento nga natago sa kinailadman sa Hapones nga katilingban, nga mao nga isalikway ang mga katingad-an o kon unsay lahi sa lawasnon ug sa hunahuna, karon nagagimaw na.”

Ang kiling nga ipagawas kon unsay lahi gikan sa katilingban makita bisan diin, dili lamang sa Hapon. Apan ang katakos nga itugot ang lainlaing mga sukdanan mao ang yawi alang sa malinawong magkauban nga paglungtad. Bahin niini usa ka editoryal sa Asahi Shimbun miingon nga ang mga desisyon sa Korte sa Distrito sa Kobe ug sa Hataas nga Korte sa Osaka “nagkasukwahi kaayo.” “Ang duha ka desisyon,” matod sa mantalaan, “daw nagsimbolo sa duha ka panghunahuna,” ang usa mao ang kiling sa tagdumala nga magdiniktador ug ang lain mao nga itugot ang lainlaing mga sukdanan.

Andam ba nimong itugot ang lainlaing mga sukdanan? Andam ka bang mosusi sa pagkamakataronganon sa baroganan sa uban? Makaiikag, si Archibald Cox, nga gihisgotang unauna niining artikuloha, midugang ug laing hinungdan sa pagkabalaka bahin sa minoriya: “Ang bahin sa tubag nahiluna diha sa kaamgohan nga ang usa ka talagsaong minoriya basin makadiskobre sa kamatuoran​—usa ka kamatuorang nalangan o walay kataposang nahanaw tungod sa pagpukgo niini.”

Dayag, ang Kobe Tech dili interesado sa kamatuorang ila untang napukgo, ni nagpakita silag matinugotong panghunahuna. Hinunoa, giapelar nila ang kaso ngadto sa Korte Suprema sa Hapon. Unsa kahay ihukom sa Korte Suprema niining kasoha? Atong paaboton ug tan-awon.

Hulagway sa panid 14]

Si Kunihito (sentro) ug ang upat ka ubang orihinal nga kihante