Nganong Kita Matigulang ug Mamatay?
“GAWAS sa pagdiskobre nga ang pag-usab sa edad mahitabo sulod sa indibiduwal nga mga selula,” si Dr. Leonard Hayflick miadmiter, “kita wala gihapon kaayoy nahibaloan karon bahin sa pasukaranang hinungdan sa pagkatigulang kay sa atong nahibaloan sa miaging usa ka siglo.” Sa pagkatinuod, siya nag-ingon: “Kita walay nahibaloan nga maayong katarongan kon nganong ang pagkatigulang kinahanglang mahitabo.”
Ang mga eksperimento sa laboratoryo nga gihimo duolan sa 30 ka tuig kanhi nagbutyag nga sa dihang ang normal nga mga selula sa tawo nga kinuha gikan sa usa ka nagtubong bata sa tiyan gibuhi sa artipisyal nga paagi ubos sa kinamaayohang mga kahimtang, ang kamatayon nahitabo human sa mga 50 ka pagbahin sa mga selula. Sa laing bahin, ang mga selula nga kinuha gikan sa usa ka tigulang na kaayong tawo nabahin lamang tali sa duha ug napulo ka pilo una pa kini namatay. Busa, ang libro sa National Geographic Society nga The Incredible Machine nag-ingon: “Ang ebidensiya sa eksperimento nagpaluyo sa ideya nga ang kamatayon giprograma diha sa matag usa kanato sa pagkahimugso.”
Apan, ang paghunong ba sa pagbahin sa mga selula dili gayod kalikayan? Dili, dili gayod. “Sa pagkatinuod,” ang mga eksperto bahin sa pagkatigulang, nga sila si Propesor Robert M. Sapolsky ug Caleb E. Finch miingon, “mopatim-aw nga ang pagpabiling batan-on [dili pagkatigulang] mao ang orihinal nga kahimtang sa buhing mga butang sa yuta.” Katingad-an, bisan ang pipila ka abnormal nga mga selula sa tawo karon dili matigulang.
Ang librong The Body Machine, nga giedit ni Dr. Christiaan Barnard, kinsa mihimo sa unang tawo-sa-tawo nga pag-ilis ug kasingkasing, nagbatbat: “Ang pagkadiskobre sa ‘dili-mamatay nga mga selula’ nahimong dakong kalibog sa mga biyologo nga interesado sa proseso sa pagkatigulang, hangtod kini natin-aw nga ang maong mga selula abnormal.” Oo, ang pipila ka matang sa mga selula sa kanser mabuhi pinaagi sa daw walay kataposang pagbahinbahin! Ang The World Book Encyclopedia nag-ingon: “Kon matino sa mga siyentipiko kon sa unsang paagi mabuhi ang maong abnormal nga mga selula, mahimo nilang masabtan ang proseso sa pagkatigulang sa selula.” Busa, karon ang pipila ka mga selula sa kanser matin-aw nga mapadaghan diha sa laboratoryo sa walay kataposan, apan ang normal nga selulang gibuhi sa artipisyal nga paagi matigulang ug mamatay.
Usa ka Depektosong Mekanismo
Ang pagkatigulang ug kamatayon sa tawo ba maoy resulta, sumala sa pagkapahayag niini sa The Body Machine, “sa kawalay kapasidad sa pagdaghan sa populasyon sa [normal nga] selula”? Kon mao, ang libro nag-ingon, “hinungdanong makita ug masabtan ang mekanismo nga nagkontrolar niining may kataposan balikbalik nga katakos aron mapalihok kini sa pagsulay sa paglugway sa gitas-on sa kinabuhi sa tawo.”
Ingon sa imong mahinumdoman sa nag-unang artikulo, si Dr. Hayflick naghisgot bahin sa “mga milagro nga nagdala kanato gikan sa pagsamkon ngadto sa pagkatawo ug unya ngadto sa pagkahingkod sa sekso ug pagkahamtong.” Dayon iyang gihisgotan ang “mas simpleng mekanismo nga magpugong lamang sa pagkatigulang aron mapatunhay kadtong mga milagroha hangtod sa hangtod.”
Bisan pa sa daghang tuig sa kuging mga paningkamot, ang mga siyentipiko napakyas sa pagdiskobre sa mekanismo nga magpatunhay sa kinabuhi sa walay kataposan. “Ang mga hinungdan sa pagkatigulang nagpabiling usa ka misteryo,” miadmiter ang librong The Incredible Machine.
Ugaling, ang hinungdan sa pagkatigulang ug kamatayon sa pagkatinuod dili sekreto. Ang tubag mabatonan.
Unsa ang Tubag?
Ang usa nga may tubag mao ang usa nga maoy responsable “sa mga milagro nga nagdala kanato gikan sa pagsamkon ngadto sa pagkatawo,” ang atong maalamon-sa-tanan nga Maglalalang, si Jehova nga Diyos. “Kanimo anaa ang tuboran sa kinabuhi,” nag-ingon ang Bibliya bahin kaniya. “Ilha nga si Jehova mao ang Diyos. Siya mao ang nagbuhat kanato, ug dili kita sa atong kaugalingon.”—Salmo 36:9; 100:3.
Palandonga kon unsa ka kahibulongan nga giprograma ni Jehova nga Diyos ang imong pagtubo diha sa tagoangkan, nga nagsulat, sa mahulagwayong pagkasulti, ug usa ka basahon sa mga instruksiyon sa paghimo kanimo nga usa ka talagsaong indibiduwal! “Ikaw mismo ang nag-umol sa akong mga amimislon; gitabonan mo ako sa tiyan sa akong inahan,” misulat ang salmista sa Bibliya. “Ang akong mga bukog wala hisalipdi gikan kanimo sa dihang gihimo ako sa tago . . . Ang imong mga mata nakakita bisan sa nagtubo pa akong binhi, ug diha sa imong basahon nasulat na ang tanang bahin niini.” (Salmo 139:13, 15, 16) Dayag, ang atong katingalahang pagkadesinyo nga tawhanong organismo dili maoy produkto nga sulagma lamang!
Bisan pa, kon si Jehova nga Diyos naglalang kanato nga hingpit aron kita mabuhing walay kataposan, nganong kita matigulang ug mamatay? Ang tubag makita diha sa pagdili nga gihatag sa unang tawo, si Adan, kinsa gibutang sa Diyos diha sa usa ka matahom nga pinuy-anan sa yuta. Ang Diyos nagsugo kaniya: “Gikan sa tanang bunga sa kahoy sa tanaman makakaon ka sa katagbawan. Apan sa bunga sa kahoy sa pag-ila sa maayo ug daotan dili ka magkaon niana, kay sa adlaw nga mokaon ka niana mamatay ka gayod.”—Genesis 2:16, 17.
Unsay nahitabo? Imbes sundon ang iyang langitnong Amahan, si Adan misupak, miduyog sa iyang asawa, si Eva, sa pagkaon sa bunga sa kahoy. Maikagon nilang gidawat ang bakak nga saad sa rebelyosong manulonda. (Genesis 3:1-6; Pinadayag 12:9) Busa, sama sa gipasidaan sa Diyos, sila namatay. Bisag si Adan ug Eva gidesinyo nga may katakos nga mabuhing walay kataposan, kini nagdepende sa pagsunod sa Diyos. Sa pagkahimong masinupakon, sila nakasala. Dayon, ingong mga makasasala, napasa nila sa tanan nilang mga kaliwat ang makamatay nga depekto sa ilang mga lawas. “Busa ang kamatayon mikaylap sa tanang tawo.”—Roma 5:12; Job 14:4.
Kini, hinunoa, wala magpasabot nga wala nay paglaom nga mabuntog ang pagkatigulang ug kamatayon. Dili gayod lisod tuohan nga ang atong maalamon-sa-tanan nga Maglalalang makaayo sa bisan unsang depekto sa henetiko ug paghatag ug enerhiya aron magpadayon ang atong mga kinabuhi sa walay kataposan. Apan sa unsang paagi himoon niya kini? Ug unsay atong kinahanglang buhaton aron matagamtam ang iyang mga saad nga walay kataposang kinabuhi?