Igong Pagkaon Alang sa Tanan!
SINULAT SA KORESPONSAL SA PAGMATA! SA BRAZIL
POSIBLE ang pagpahimulos sa dagaya, kinamaayohang pagkaon ug sa gihapon dili malipayon. Aron makabaton sa tinuod ug dumalayon nga kalipay, adunay laing butang nga gikinahanglan—espirituwal nga pagkaon. Si Jesus miingon: “Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.”—Mateo 4:4.
Sa laing bahin, ang pagsalikway sa Pulong sa Diyos motultol ngadto sa espirituwal nga kagutom, sumala sa gitagna sa Amos 8:11: “Ako magpadala ug kagutmanan diha sa yuta, kagutmanan, dili sa tinapay, ug kauhaw, dili sa tubig, kondili sa pagpatalinghog sa mga pulong ni Jehova.” Apan, ang espirituwal nga malnutrisyon mahimong malikayan. Mipahayag si Jesus: “Malipayon kadtong mahunahunaon sa ilang espirituwal nga panginahanglan . . . Malipayon kadtong gipanggutom ug gipang-uhaw sa pagkamatarong, sanglit pagabusgon sila.” (Mateo 5:3, 6) Maingon nga ang sustansiyadong pagkaon sa hustong gidaghanon makatagbaw sa atong lawas, ang maayong espirituwal nga pagkaon magpalig-on sa atong pagtuo ug sa atong paglaom sa umaabot. Unsang matang sa kalibotan ang atong malaoman?
Dagayang Pagkaon Alang sa Tanan
Handurawa ang kalibotan nga adunay abundang lamian ug makapahimsog nga pagkaon. Usa ka kalibotan nga walay mga gubat, mga katalagman, o dili-maayong mga panghitabo nga magpahinabog kakuraw o malnutrisyon, nga makapaluya o makapaguol sa katawhan. Wala nay mga tawo nga walay balay o walay trabaho nga nagasalig sa iapod-apod nga sabaw o mga hinatag, ni ang nagasulbong nga mga prisyo sa pagkaon magpugos sa mga tawo sa pagkaon ug bisan unsa aron masudlan ang tiyan. “Adunay daghang trigo sa yuta; sa tumoy sa kabukiran adunay pagsugwak.” (Salmo 72:16) Apan sa unsang paagi kini mahitabo? Kinsay mosulbad sa suliran sa malnutrisyon?
Ang atong Maglalalang magahatag ug mahigugmaong pagtagad sa panginahanglan sa tawo sa igong pagkaon. Bisan ang klima sa yuta makontrolar, sa ingon magagarantiya nga wala nay mapakyas nga pananom. “Si Jehova, sa iyang bahin, magahatag kon unsay maayo, ug ang atong kaugalingong yuta magahatag sa abot niini.” (Salmo 85:12) Dugang pa, bisan tuod nga ang yuta makaarang sa pagpatungha ug igong pagkaon, ang Gingharian lamang sa Diyos ang magtapos sa kadalo ug pagdaogdaog, nga mitultol ngadto sa dili-igong pag-apod-apod, malnutrisyon, ug kasub-anan.
Oo, ang langitnong kagamhanan ni Jehova magtino nga ang bisan unsang sistema sa pagpananom ug transportasyon nga mabatonan magtagana ug makapahimsog nga pagkaon diin kana gikinahanglan. Ang administrasyon sa Gingharian dili magpadato sa pipila ug maghimo sa kadaghanan nga manglimbasog nga mabuhi. Inay sa tumang kalisod ug kawalay-paglaom, ang mga panalangin sa Gingharian magdala sa kalipay nga gipadayag diha sa dakong kombira sa maayong mga butang nga gitagna sa Isaias 25:6: “Si Jehova sa mga panon magahimo gayod alang sa tanang katawhan, niining bukira, ug usa ka kombira sa matambok nga mga pagkaon, usa ka kombira sa bino nga pinalugdang, sa matambok nga pagkaon nga puno sa utok.”
Karon, handurawa ang maindigon, mapit-oson, walay-pagbati nga estilo sa kinabuhi nga mahanaw hangtod sa hangtod. Wala nay makulangan sa sustansiya o masakiton. Nan, kon buot gayod nimong makapahimulos sa kinabuhi nianang bag-ong kalibotan, sunda ang mga pulong ni Jesus: “Panagbuhat kamo, dili alang sa pagkaon nga mahanaw, kundili sa pagkaon nga magapabilin alang sa kinabuhing walay-kataposan.”—Juan 6:27.