Ang Rat Snake—Gibuhat Alang sa Pagkatkat

ANG usa ka pulyeto bahin sa mga halas sa Alabama nagbatbat sa rat snake ingong abtik nga tigkatkat. Kining usa nagpakita sa iyang katakos pinaagi sa pagkatkat sa tisa sa kilid sa usa ka tinukod. Dayag nga bata pa kini, sanglit mihaom siya sa mga gawang sa tunga sa mga tisa. Kinaham niyang kaonon ang mga ilaga ug mga ambaw.

Gipadayag sa Audubon Society Encyclopedia of Animal Life ang linaing katakos niini sa pagkatkat: “Ang rat snake adunay huyang nga mga kilyakilya sa tiyan. Labing menos usa ka gamit niini maoy pagtaganag talinis nga eskina o siwil nga ikaipit sa halas diha sa panit sa kahoy ug sa ingon makapuwersag maayo. Kini makakatkat sa punoan sa dakong kahoy pinaagi sa pag-ukiok sa lawas niini sa tunga sa gawang sa panit sa kahoy ug mosaka pataas sa labing menos pinaagi sa kilyakilya sa tiyan.”

Ang iyang presensiya diha sa punoan sa kahoy maghimo kaniyang usa ka target sa usa ka panon sa nagsiyagit, nagapanakdop nga mga langgam nga mga blue jay. Sa pagkatkat sa kilid niini nga tinukod ang halas tingali dili makakitag mga langgam o mga itlog nga iyang makaon, apan kini makataganag kadiyot nga pagtagpilaw diha sa mainit nga mga tisa.