Ang Report ni Jessica
SI Jessica, nga usa ka 13-anyos nga dalagitang taga-Tinipong Bansa, giasayn duyog sa iyang mga klasmet nga mopakigpulong bahin sa tema nga “Diyos, Bandera, ug Nasod.” Kay nahibalo nga ang iyang kaubang mga estudyante maukiton kon nganong siya ingong usa sa mga Saksi ni Jehova dili mosaludar sa bandera, maisogong gipahimuslan ni Jessica ang higayon sa pagsaysay sa iyang mga tinuohan. Ang mosunod maoy mga kinutlo gikan sa iyang report.
“Sa sinugdanan sa matag-adlawng tingtungha, ang mga estudyante pasultion sa panaad sa pagkamaunongon, apan tungod sa akong mga tinuohan ug sa akong relihiyon, ako dili mohimo niana. Daghang tawo ang nahibulong kon ngano. Karon, sultian ko kamo.
“Ang unang mga pulong sa saludar sa bandera mao ang: ‘Ako mosaad ug pagkamaunongon ngadto sa bandera.’ Aw, unsa may pagkamaunongon? Mao kana ang obligasyon sa pagpaluyo, pag-unong, ug debosyon. Sanglit ako misaad na sa akong pagkamaunongon ngadto sa Diyos, dili ako makahimo ug dili mosaad sa akong pagkamaunongon ngadto sa bandera. Nga ako dili mosimba o mosaad sa akong pagkamaunongon ngadto sa bandera, hinunoa, wala magkahulogan nga ako dili motahod niana.
“Ang Diyos mao ang labing mahinungdanon sa akong kinabuhi. Akong gipaningkamotan ang labing maayo nga akong maarangan nga sundon ang iyang mga sugo ingon sa gipakita sa Bibliya. Kada adlaw ako nagaampo kaniya, ug moampo usab ako kon gikinahanglan nako ang dugang tabang o pagdasig. Kanunay nakong madawat kanang maong tabang ug pagdasig sa hustong panahon. Akong nakaplagan nga kon akong unahon ang Diyos ug sa dihang akong buhaton ang mga butang nga gisugo niya kanato nga buhaton, ako mas malipayon.
“Busa bisan tuod dili ako mosaludar sa bandera, ako nagatahod niana ug dili magpasipala niana sa bisan unsang paagi. Apan ang akong pagkamaunongon maoy ngadto sa Diyos, ug angayan lamang, tungod kay iya akong gilalang ug utang nako ang maong pagkamaunongon ngadto kaniya.”
Ang mga estudyante sa klase ni Jessica gipatimbangtimbang sa mga taho nga ilang nadungog. Pagkamalipayon ni Jessica nga ingong resulta sa iyang paningkamot, ang iyang mga klasmet miingon nga sila mas nakasabot sa iyang mga tinuohan. Labing hinungdanon, ang mga batan-on nga maisogong mosulti dapig sa mga prinsipyo sa Bibliya naglipay sa kasingkasing ni Jehova nga Diyos!—Proverbio 27:11.