May Bisan Kinsa ba nga Kasaligan?

“Siya usa sa pila ra ka tawo nga gawas sa pamilya nga bug-os gisaligan sa akong mga ginikanan. . . . Siya nagpatuo nga usa ka buotan ug matinagdanong tawo nga dili gayod mobuhat sa bisan unsa nga makadaot kanamo. . . . Siya usa sa pila ra ka tawo sa akong kinabuhi nga masaligan nako sa bug-os.”

KANAY paghubit sa usa ka dalaga sa pagsalig niya sa doktor sa iyang pamilya. Ikasubo, kadto maoy pagsalig nga sayop kaayong pagkabutang. Sukad sa panahong siya 16 anyos, giabusahan siya sa seksuwal nga paagi sa maong doktor. “Ako iyang gibakakan ug gilimbongan,” gisultihan niya ang mga awtoridad sa korte, nga nagpahamtang dayon sa hustisya.​—The Toronto Star.

Pagsalig Gidaot sa Bisan Diin

Ang pagsalig, sama sa usa ka nindot apan huyang nga bulak, daling maibot ug matamakan. Gitamaktamakan kini sa bisan diin! Matod ni Michael Gaine, kinsa sekretaryo sa usa ka kardinal ug sa usa ka arsobispo sa Inglaterra: “May panahon kaniadto nga ang tanan misalig sa pari. Sa dihang isalig sa mga pamilya ang ilang mga anak sa iyang pag-atiman. Dili na ako makadahom niana karon. Nabulag na kita gikan sa maong pagsalig sa walay kataposan.”​—The Guardian Weekend.

Ang mga negosyante manglimbong sa mga kakompetensiya. Ang malinglahong mga tig-anunsiyo naglimbong ug nagpahimulos sa mga konsumedor. Usa ka way-konsensiyang opisyal nagwaldas sa pondo sa pensiyon sa iyang kaugalingong mga kompaniya, nga naghikaw sa iyang mga empliyado sa ilang reserbang salapi. Ang mga empliyado kanunay nga mangawat sa ilang mga amo. Pananglitan, usa ka taho nag-ingon nga “ang Canadianhong mga negosyo mawad-an sa gibanabanang $20 bilyon sa usa ka tuig gumikan sa sulodnong mga pangawat.”​—Canadian Business.

Dili ang tanang politiko maoy di-kasaligan. Apan diyutay rang tawo ang matingala sa taho nga sama sa mosunod: “Duha ka semana human sa malipotong pagpatay sa usa sa labing kontrobersiyal nga babayeng mga politiko sa Pransiya, ginayagyag sa kapolisan ang politikanhong panglimbong ug kriminal nga sabotsabot nga dugay nang nagtakoban sa kalihokan sa gobyerno sa kabaybayonan sa Mediteranyo.”​—The Sunday Times, London.

Kasagaran, ang pagsalig magun-ob diha sa suod nga mga relasyon. Ang mga bana ug mga asawa magluib sa ilang mga kapikas. Ang mga ginikanan magdagmal sa mga anak. Ang mga anak manglimbong sa mga ginikanan. Sa dihang nabuksan ang mga dokumento sa Stasi, ang mga sekreta sa kanhing Silangang Alemanya, kana nagpadayag sa usa ka “malukpanong sistema sa panglimbong” sa mga tawo nga giisip nga mga higala. Sa usa ka sistema sa pagluib, matod sa usa ka taho, “ang mga gaway sa Stasi nakaabot ngadto sa kuwartong-klasehanan, pulpito, lawak-higdaanan, bisan sa kompisalanan.”​—Time.

Sa Irlandia usa ka kolumnista misulat: “Kami gibakakan, kami gilimbongan ug kami gigamit ug giabusahan ug gitamay niadtong si kinsa gibutang namo sa gamhanang mga katungdanan.” (The Kerryman) Tungod kay subsob kaayo silang giluiban, daghang tawo ang dili na mosalig kang bisan kinsa. Unsay atong mahimo sa pagtino nga ang atong pagsalig dili masayop pagkabutang? Ang mosunod nga duha ka artikulo motugkad niining pangutanaha.