“Kon Mausab Ko Lang ang Usa ka Yugto sa Panahon”
ANG mga estudyante sa usa ka tunghaan sa California, T.B.A., gipasulat ug essay bahin sa tema sa ibabaw. Usa sa mga finalist sa bangga sa pagsulat ug essay mao si Eric, usa ka 11-anyos nga anak nga lalaki sa usa ka pamilyang mga Saksi ni Jehova. Siya mismo ang nagbalay sa mosunod nga essay nga pinasukad sa Bibliya.
“Ang Gubat sa Kalibotan II maoy usa ka malaglagong gubat. Daghang inosenteng mga tawo ang nangamatay. Apan ang yugto nga akong napili maghimo niining gubata nga dili marekord diha sa mga libro sa kasaysayan. Palandonga ang pagbuno kang John F. Kennedy. Kadtong tawhana namatay sa usa ka ngilngig nga kamatayon, apan ang yugto nga akong napili maghimo usab niini nga dili makita diha sa mga libro sa kasaysayan. Si Martin Luther King, Jr., namatay niadtong 1968 tungod sa pagsulay sa pag-usab sa panghunahuna sa kalibotan, apan ang yugto nga akong napili dili usab magpalungtad niining panahona. Kon mausab ko kining yugtoa sa panahon, ang kalibotan mahimong lahi, ang tanan ingon sa atong nahibaloan mausab, ug ang tanang butang, lakip ang mga kahimtang ug mga tawo, mahimong lahi. Niining yugtoa sa panahon ang dagan sa kasaysayan nausab nga naghimo sa kalibotan nga atong nailhan karon—makamatay, mapintas, masakiton, ug daotan.
“Aw, mahibulong ka tingali, ‘Kini bang yugtoa usa ka sakit? Kini bang yugtoa usa ka gobyerno? O kini bang yugtoa usa ka gubat?’ Pangutan-a ang imong kaugalingon, ‘Kon kini usa ka sakit, sa unsang paagi kini makapugong sa tawo sa pagbuhat ug daotan?’ ‘Dili gayod,’ ikaw moingon. Unya ikaw maghunahuna, ‘Tingali gobyerno kini nga magsulbad sa tanan natong mga suliran.’ Apan mga tawo ang nagpalakaw sa gobyerno, ug ang tanang tawo dili hingpit ug mamatay. Busa dili ba ang ilang maayong mga buhat mamatay uban kanila? Unya ikaw moingon, ‘Usa ka gubat gayod kini sama sa Gubat sa Kalibotan II.’ Dili! Dili mahimong mao kana tungod kay sa gubat usa ka pundok ang makadaog, ug uban niana, ang laing pundok mapildi. Walay usa niining mga butanga nga gihisgotan ang makatapos sa kamatayon, kapintasan, balatian, ug pagkadaotan hangtod sa hangtod. Tingali ikaw mahibulong kon unsa kining yugto sa panahon nga akong usbon.
“Sala. Kamatayon. Ang sala ug kamatayon maoy akong usbon. Apan sa unsang paagi? Ang sala ug kamatayon ania na kanunay kanato. Ang sala ug kamatayon maoy bahin na sa atong adlaw-adlawng mga kinabuhi. Nan sa unsang paagi nimo mausab kanang anaa na kanunay? Kinahanglang hunongon nimo kana sa panahong nagsugod kana. Ang pagrebelde ni Adan ug Eva batok sa kagamhanan sa Diyos nagpahinabo sa mga butang nga maingon niini karon. Ang mga nalangkit mipili sa paghimo sa mga butang sa ilang paagi, ug busa ania kanato ang sala ug kamatayon.
“Busa ang eksaktong yugto nga kinahanglang usbon maoy sa dihang gisulti ni Satanas nga Yawa ang unang bakak batok nianang hingpit nga gobyerno. Tungod niini nga bakak, kitang tanan nag-antos sa gibuhat sa atong unang mga ginikanan, si Adan ug Eva. Sila nakasala batok sa bugtong matuod nga Pangulo sa gobyerno, ang Diyos.”
Sa Sabado, Agosto 12, 1995, gibasa ni Eric ang iyang essay panahon sa usa ka espesyal nga adlawng asembliya sa mga Saksi ni Jehova sa Norco, California. Ang mamiminaw nalipay sa pagkadungog sa usa ka batan-on nga nagpahimulos sa higayon sa eskuylahan sa paghatag ug makapapukaw-sa-hunahuna nga pamatuod mahitungod sa hinungdan sa pag-antos sa tawo. Pagkaanindot gayod sa dihang laglagon ni Jehova nga Diyos ang “orihinal nga bitin” ug magwagtang sa tanang pag-antos nga gipahinabo sa Yawa!—Pinadayag 12:9; 21:3, 4; Genesis 3:1-6.