Nganong Nagpadayon ang Gubat ug Panag-away?
Gipakita sa Bibliya kon unsa gyoy mga hinungdan sa gubat ug panag-away ug kon nganong nagpadayon gihapon ni karon.
SALA
Gilalang sa Diyos ang atong unang mga ginikanan, si Adan ug Eva, sumala sa iyang larawan. (Genesis 1:27) Nagpasabot na nga naa gyod silay katakos nga mapakita ang mga hiyas sa Diyos, apil ang gugma ug ang tinguha nga makigdait. (1 Juan 4:8; 1 Corinto 14:33) Pero si Adan ug Eva misupak sa Diyos ug nakasala. Ingong resulta, napanunod natong tanan ang sala ug kamatayon. (Roma 5:12) Maong kay makasasala ta, dali ra tang makahunahunag daotan. Tungod ana, daghang tawo ang makahimog bayolenteng mga buhat.—Genesis 6:5; Marcos 7:21, 22.
GOBYERNO SA TAWO
Wala gyod ta buhata sa Diyos aron mandoan ang atong isigkatawo. Ang Bibliya nag-ingon: “Dili iya sa tawong naglakaw bisan ang pagtultol sa iyang lakang.” (Jeremias 10:23) Tungod ana, ang gobyerno sa tawo dili gyod bug-os makasulbad sa gubat ug kapintasan.
SI SATANAS UG ANG IYANG MGA DEMONYO
Gipakita sa Bibliya nga “ang tibuok kalibotan nailalom sa gahom sa usa nga daotan.” (1 Juan 5:19) Ang “usa nga daotan” mao si Satanas nga Yawa. Bayolente kaayo siya ug gusto gyod niyang mopatay. (Juan 8:44) Siya ug ang iyang kaubang mga demonyo mao ang nag-impluwensiya ug nagsulsol sa mga tawo sa pagpakiggubat ug paghimog kapintasan.—Pinadayag 12:9, 12.
Dili gyod nato kayang wad-on ang mga hinungdan sa gubat ug panag-away, pero kaya gyod nang himoon sa Diyos.