Sa Unsang Paagi Matapos ang Gubat ug Panag-away?

WAD-ON SA DIYOS ANG GOBYERNO SA TAWO

Taposon sa Diyos ang tanang gobyerno sa tawo pinaagi sa gitawag sa Bibliya ug gubat sa Armagedon.a (Pinadayag 16:16) Nianang panahona, ang “mga hari sa tibuok gipuy-ang yuta” tigomon ngadto sa “gubat sa dakong adlaw sa Diyos nga Labing Gamhanan.” (Pinadayag 16:14) Ang Armagedon mao ang gubat sa Diyos nga magtapos sa tanang gubat.

Pulihan sa Diyos ang gobyerno sa tawo ug laing gobyerno, ang iyang Gingharian, nga magmando gikan sa langit ug magpabilin hangtod sa hangtod. (Daniel 2:44) Gipili sa Diyos ang iyang Anak, si Jesu-Kristo, nga mahimong Hari niini. (Isaias 9:​6, 7; Mateo 28:18) Kini nga gobyerno mao ang Gingharianb nga gitudlo ni Jesus nga iampo sa iyang mga sumusunod. (Mateo 6:​9, 10) Ang tanang tawo sa tibuok kalibotan magkahiusa na unya ubos sa usa lang ka gobyerno nga mandoan ni Jesus.

Si Jesus dili parehas sa mga tawo nga magmamando kay dili niya gamiton ang iyang awtoridad para sa iyang kaugalingong bentaha. Patas siya ug walay gipalabi, maong ang mga tawo dili mobati nga gipasagdan sila tungod sa ilang rasa, nasyonalidad, ug kagikan. (Isaias 11:​3, 4) Ug dili na pod nila kinahanglang depensahan ang ilang mga katungod. Ngano? Kay seguroon ni Jesus nga maatiman ang tanang panginahanglan sa matag tawo. “Luwason niya ang kabos nga nagtuaw alang sa tabang, ingon man ang timawa ug si bisan kinsa nga walay magtatabang. . . . Luwason niya sila gikan sa pagdaogdaog ug kapintasan.”—Salmo 72:​12-14.

Wad-on sa Gingharian sa Diyos ang tanang armas ug hinagiban. (Miqueas 4:3) Laglagon pod niini ang daotang mga tawo nga dili gyod mohunong sa pagpakig-away o nakatugaw sa kalinaw sa uban. (Salmo 37:​9, 10) Ang tanang tawo, apil na ang mga babaye ug bata, mobati nang luwas bisag asa pa sila moadto.—Ezequiel 34:28.

Ubos sa gobyerno sa Diyos, ang mga tawo maayo na unya kaayog kahimtang. Wad-on niini ang mga problema nga maoy rason sa panag-away sama sa kapobrehon, gutom, ug kawalay puy-anan. Ang tanan makapahimulos na sa abunda ug sustansiyadong pagkaon ug makabaton ug komportableng puy-anan.—Salmo 72:16; Isaias 65:​21-23.

Wad-on sa Gingharian sa Diyos ang dili maayong mga epekto sa gubat. Apil ani dili lang ang pisikal nga kadaot, kondili ang mental ug emosyonal pod nga kasakit nga giantos sa mga tawo. Bisan kadtong mga namatay buhion pa gani pag-usab dinhi sa yuta. (Isaias 25:8; 26:19; 35:​5, 6) Ang mga pamilya magkauban nag balik, ug ang pait nga mga kaagi tungod sa gubat dili na mahinumdoman ug mahimo na lang bahin sa “mga butang [nga] nangagi na.”—Pinadayag 21:4.

WAD-ON SA DIYOS ANG SALA

Dihang magmando na ang Gingharian sa Diyos, ang mga tawo magkahiusa na sa pagsimba sa bugtong matuod nga Diyos, si Jehovac, “ang Diyos sa gugma ug sa kalinaw.” (2 Corinto 13:11) Tudloan sila kon unsaon pagkinabuhi nga malinawon. (Isaias 2:​3, 4; 11:9) Ang tanan nga magpadapat sa ilang nakat-onan dili na unya mag-antos sa mga epekto sa sala.—Roma 8:​20, 21.

WAD-ON SA DIYOS SI SATANAS UG ANG IYANG MGA DEMONYO

Laglagon sa Gingharian sa Diyos si Satanas ug ang iyang mga demonyo, nga maoy nag-impluwensiya sa mga tawo sa pagpakiggubat. (Pinadayag 20:​1-3, 10) Kon wala na ang ilang daotang impluwensiya, “ang pakigdait modagaya.”—Salmo 72:7.

Makasalig ka nga matuman gyod ang saad sa Diyos nga taposon ang gubat ug panag-away. Kaya kaayo niyang wad-on ang mga gubat, ug gusto gyod na niyang himoon.

• Ang Diyos maalamon ug gamhanan kaayo maong makahimo gyod siya sa pagtapos sa gubat ug kapintasan. (Job 9:4) Walay imposible kaniya.—Job 42:2.

• Dili gyod gusto sa Diyos nga makitang nag-antos ang mga tawo. (Isaias 63:9) Gani, “ginadumtan niya ang bisan kinsa nga nahigugma sa kapintasan.”—Salmo 11:5.

• Ang Diyos kanunay gyong motuman sa iyang saad. Dili gyod siya mamakak.—Isaias 55:​10, 11; Tito 1:2.