Ang Kolesiyo ug ang Tagna sa Bibliya

SINULAT SA KORESPONSAL SA PAGMATA! SA ITALYA

USA ka karaang sinulat nga makita sa Kolesiyo sa Roma, Italya, tingali sa dili direkta nagpamatuod sa usa ka tagna sa Bibliya bahin sa kalaglagan sa Jerusalem. Ang sinulat dayag nga may kalabotan sa tinukod ug sa inagurasyon sa Kolesiyo sa 80 K.P. Segun sa pagkabalay pag-usab ni Propesor Géza Alföldy sa Unibersidad sa Heidelberg, Alemanya, ang sinulat mabasa: “Si Emperador Tito Vespasian Augusto Cesar nagpatukod ug bag-ong ampiteyatro gikan sa kita sa mga inagaw sa gubat.” Unsa nga inagaw sa gubat?

“Ang among gipasabot mao ang daghan kaayong inagaw sa gubat nga gidala ni Tito gikan sa gubat batok sa mga Hudiyo,” miingon si Alföldy, “ug ilabina, ang mga dayandayan nga bulawan” sa templo sa Jerusalem. Kini nga templo nalumpag sa katumanan sa tagna ni Jesus. (Mateo 24:1, 2; Lucas 21:5, 6) Si Alföldy mihinapos nga ang Kolesiyo​—uban ang iladong Arko ni Tito, nga naglarawan sa mga mananaog nga Romano nga nagdalag inagaw nga kinuha sa gubat sa mga Hudiyo​—maoy usa ka monyumento niining makasaysayanhong kadaogan sa mga Romano.