Pagkalingkawas sa Kawalay-Trabaho—Sa Unsang Paagi ug Kanus-a?

SAMA sa iyang Maglalalang, ang tawo makatagamtam ug kalipay sa buluhaton, nga sa tukma gibatbat ingong usa ka “gasa sa Diyos.” (Ecclesiastes 3:12, 13; Juan 5:17) Ang usa ka makaiikag nga trabaho makahatag ug kalipay kanato ug mopabati kanatong mapuslanon ug kinahanglanon. Si bisan kinsa dili gusto nga kawad-ag trabaho, bisan pag wala kaayo siya mahimuot niini. Gawas nga mogarantiya sa suweldo, ang binayrang trabaho mohatag ug kahikayan, katuyoan, ug usa ka sentido sa ilhanan sa pagkinabuhi sa usa. Dili katingad-an nga kasagaran “ang walay-trabaho nagkinahanglag trabaho nga labaw kay sa bisan unsa pa.”

Pagpangitag Trabaho

Sumala sa ato nang nakita, kuti kaayo ang kahimtang sa panarbaho. Ingong sangpotanan, adunay daghang angayang mga paagi sa pagpangitag trabaho. Si bisan kinsang takos niana makapahimulos sa mga hinabang sa gobyerno sa mga walay-trabaho kon duna man; ug kon angay, makapatala sila sa mga opisina labot sa mga walay-trabaho ug makapahimulos sa mga serbisyo nga gitanyag. Ang uban makakitag trabaho pinaagi sa pagmugna ug kaugalingon nilang trabaho. Apan angay nga magbantay. Kasagarang ang dunay kinaugalingong trabaho kinahanglang mogastog dako sa sinugdan nga mahimong lisod nga mabayran. Kinahanglan usab nga mahibaloan ug mosunod sa pinansiyal nga mga balaod ug sa buluhisan​—nga lisod kaayo nga matuman sa pipila ka nasod!​—Roma 13:1-7; Efeso 4:28.

Aron makakitag trabaho, ang pipila naghimo nga trabaho sa pagpangitag usa ka trabaho, nga ang ilang kaugalingon gidedikar nganha niana uban sa metodo ug kamalugoton. Gisulatan sa uban ang mga kompaniyang nangitag mga trabahante, o ilang gibutang ang mga anunsiyo sa lokal nga mga mantalaan​—pipila niana mopatik nga libre sa mga anunsiyo bahin sa hangyo alang sa trabaho. Ang Pagmata! kasagarang mohatag sa mapuslanon ug praktikal nga tambag bahin sa ulohan​—alang sa parehong mga batan-on ug hamtong.a​—Tan-awa ang mga kahon, panid 11.

Kinahanglan nga magmapahiuyonon ka​—andam motrabaho sa tanang matang sa trabaho, lakip ang mga trabahong tingali wala nimo magustohi. Ang mga eksperto nag-ingon nga apil sa unang mga butang nga isukna panahon sa mga interbiyo sa trabaho mao ang nangaging kasinatian sa trabaho ug gidugayon sa pagkawalay-trabaho. Ang dugay nga pagkawalay regular nga rutina sa trabaho giisip nga negatibong butang sa umaabot nga amo.

Ang usa ka tawo nga sa kamaalamon migugol sa iyang panahon sa tunghaan aron makabaton sa mga kahanas adunay mas maayong kahigayonan nga makakita sa una niyang trabaho. “Ang kawalay-trabaho,” matod ni Alberto Majocchi, magtutudlo sa pinansiyal nga mga siyensiya, “ilabinang mag-apektar sa mga obrerong walay kahanas.”

Ang Kahinungdanon sa Emosyonal nga Pagpaluyo

Mahinungdanon ang positibong panglantaw. Kini makahimog kalainan tali sa pagkakita ug dili pagkakitag trabaho. Pabilhan pag-ayo sa walay-trabaho ang emosyonal nga pagpaluyo, nga mobulig kanila nga molikay sa pagpalain sa ilang kaugalingon o pagkatumpawak sa pagkadili-mabination. Mopukgo usab kini sa pagkahanaw sa pagtahod-sa-kaugalingon nga mahimong moresulta nga itandi ang kaugalingon sa uban nga wala kawad-i sa ilang mga trabaho.

Ang pagkinabuhi sa gamay nga salapi mahimong dili sayon. “Kay ako mabalak-on, ako nalisdan nga pahimuslan pag-ayo ang libre nakong panahon,” matod ni Stefano. “Nabalisa kaayo ako tungod sa kahimtang,” nahinumdom si Francesco, “nga ako misugod pagpangitag sayop sa pipila ka minahal kong mga higala.” Mahinungdanon niini ang pagpaluyo sa pamilya. Kinahanglang ang tanang membro sa pamilya magpahiuyon tungod sa menos nga kinitaan aron ipaubos ang sukdanan sa pagkinabuhi. Si Franco, nga gipuwera sa edad nga 43 human sa pagtrabahog 23 ka tuig alang sa mao rang kompaniya, miingon: “Sukad sa panahong ako napuwera, ang akong asawa maoy positibo ug tuboran sa dakong pagdasig.” Mapasalamaton ilabina si Armando sa iyang asawa tungod sa “iyang pagkamaalamon kaayo sa pagpamalit.”​—Proverbio 31:10-31; Mateo 6:19-22; Juan 6:12; 1 Timoteo 6:8-10.

Ang mga prinsipyo sa Bibliya makatabang nato sa paghupot sa positibong espiritu ug dili malimot sa mas hinungdanong mga prinsipyo. Kadtong gihinabi sa Pagmata!, nga gihisgotan sa itaas, nakabaton ug makapahupay nga pasalig gikan sa Bibliya. Kini nakapabati nilang mas suod sa Diyos. (Salmo 34:10; 37:25; 55:22; Filipos 4:6, 7) Ang pagbaton ug suod nga relasyon kang Jehova nga Diyos labing hinungdanon, kay siya nagsaad: “Dili ko gayod ikaw pagabiyaan ni sa bisan unsa mang paagi magatalikod kanimo.”​—Hebreohanon 13:5.

Kon adunay trabaho o wala ang usa ka tawo, ang Pulong sa Diyos nagdasig sa tanan sa pag-ugmad sa mga hiyas nga mapuslanon alang sa adlaw-adlaw nga pagkinabuhi. Dili sulagma nga may panahong ang mga Saksi ni Jehova pangitaon ug pabilhan ingong matinud-anong mga obrero. Sila nagsunod sa tambag sa Bibliya nga magmakugihon ug mahimong kasaligan, dili taspokan.​—Proverbio 13:4; 22:29; 1 Tesalonica 4:10-12; 2 Tesalonica 3:10-12.

Pagkalingkawas sa Kahadlok sa Kawalay-Trabaho

Nga nagpahipi sa kawalay-trabaho, adunay usa ka lintunganayng hinungdan​—ang kahakog ug kadalo sa tawo. Sumala sa giingon sa Bibliya, “ang tawo nagmando sa tawo sa iyang kadaotan.”​—Ecclesiastes 8:9.

Ang suliran sa kawalay-trabaho​—ug ang ubang mga suliran usab​—masulbad pinaagi sa pagwagtang sa tawhanong pagmando, nga karon anaa sa “kataposang mga adlaw” niini. (2 Timoteo 3:1-3) Adunay panginahanglan sa usa ka kalibotan nga bag-o gayod. Oo, usa ka kalibotan diin ang usa ka matarong nga tawhanong katilingban makapuyo ug makatrabaho ubos sa makataronganon ug makiangayong pagmando, diin wala na ang kadalo. (1 Corinto 6:9, 10; 2 Pedro 3:13) Kanay hinungdang si Jesus nagtudlo sa mga tawo nga iampo nga moabot ang Gingharian sa Diyos ug nga ang Iyang kabubut-on matuman sa yuta.​—Mateo 6:10.

Matagnaong nagbatbat sa pagkawagtang sa pipila sa pangunang mga suliran sa katawhan, ang Pulong sa Diyos naghulagway sa mga epekto sa maong Gingharian: “Sila magatukod gayod ug mga balay ug magapuyo niana; ug sila magatanom gayod ug mga kaparasan ug magakaon sa ilang bunga. Sila dili magatukod ug lain ang magapuyo; sila dili magatanom ug lain ang magakaon. . . . Ang buhat sa ilang kaugalingong mga kamot pagapahimuslan sa bug-os sa akong mga pinili. Sila dili magahago sa walay kapuslanan, ni sila manganak alang sa kasamok.” (Isaias 65:21-23) Ang kahadlok sa kawalay-trabaho duol nang mawagtang hangtod sa hangtod. Kon buot nimong dugang nga mahibalo mahitungod sa solusyon sa Diyos, palihog kontaka ang mga Saksi ni Jehova sa inyong dapit.

[Footnote]

[Kahon sa panid 11]

Pagmugnag Trabaho sa Balay

• Pagbantay ug bata, pag-atiman ug bata

• Pagbaligyag tinanom-sa-balay nga mga utan o mga bulak

• Pagpanahi, pagremodel, ug pagreper ug sinina

• Pinirasong trabaho alang sa mga pabrikante

• Paglutog keyk ug pagkaon

• Quilting, paggansilyo, pag-niting; paggamag macramé, paggamag kolonong butang; ubang kinamot nga trabaho

• Pag-upholster

• Paghupot ug libro de benta, pagmakenilya, mga serbisyo sa kompiyuter sa balay

• Serbisyo sa pagtubag sa telepono

• Pagpangulong

• Pagdawat ug mga kasera

• Pag-adres ug pagsulod sa mga sobre alang sa mga tigpaanunsiyo

• Paghugas ug pagpasinaw sa kotse (parokyano magdala sa kotse nganha sa inyong balay)

• Pag-areglar ug pag-ehersisyo sa binuhing hayop

• Pagreper ug kandado ug paggamag yawi (buhatan diha sa balay)

• Ang mga anunsiyo sa kadaghanan niining trabahoa ikabutang nga libre o barato diha sa mantalaan sa pamalit sa hinapos sa semana o sa mga buletin sa dagkong tindahan

[Kahon sa panid 11]

Pagmugnag Trabaho Gawas sa Balay

• Pagbantay ug balay (dihang ang mga tawo magbakasyon ug gustong bantayan ang ilang balay)

• Pagpanglimpiyo: mga tindahan; mga opisina; mga balay ug mga apartment human sa konstruksiyon, human sa mga sunog, human mopahawa ang mga tawo; buluhaton sa balay (sa mga balay sa uban); mga bintana (negosyo ug sa balay)

• Mga pagreper: tanang matang sa mga aplayans (mga librarya dunay sayon-sundon nga mga libro bahin sa mga pagreper)

• Mga trabahong bisan unsa na lang: paghapin sa mga bungbong sa balay; paggamag mga kabinet, mga pultahan, mga pantawan; pagpintura; pagkoral; pagtaod ug atop

• Trabaho sa uma: pagtanom o pag-ani sa mga tanom, pagpamupog prutas

• Pag-adorno sa sulod ug pag-atiman sa tanom sa: mga opisina, mga bangko, mga plasa sa mga tindahan ug mga atrium, mga pasilyo

• Pagdumala sa propiedad: mga dyanitor, superintendente (usahay maglakip ug libreng puy-anan)

• Insyurans, propiedad real

• Pagtaod ug alpombra, paghinlo

• Mga ruta sa mantalaan (mga hamtong ug mga bata), ubang mga serbisyo sa paghatod: mga anunsiyo, mga bayranan sa mga munisipyo

• Pagbalhin, pagpondo sa mga butang

• Pag-adorno sa lagwerta, pagpamul-ong sa mga kahoy, pag-atiman sa tugkaran, paggabas sa mga tabla

• Drayber sa bus sa eskuylahan

• Pangletrato (mga dagway ug publikong mga okasyon)

• Paon alang sa mga mangingisda

• Bayloay ug trabaho: ibaylo ang mga pagreper ug kotse sa elektrikal nga trabaho, pagtahi sa pagtubero, ubp.

[Hulagway sa panid 10]

“Ang buhat sa ilang kaugalingong mga kamot pagapahimuslan sa bug-os sa akong mga pinili.”—Isaias 65:22