Kon Unsaon Pagpalit ug Ginamit Nang Kotse

KINSAY dili gustong mopalit ug usa ka kotse nga katunga sa orihinal nga prisyo o menos pa? ‘Posible ba gayod kana?’ mangutana ka. Oo​—kon kini maoy usa ka awto nga may unang tag-iya, nga mas nailhang ginamit nang kotse. Ang suliran mao, daghan ang nahadlok nga ang ginamit nang kotse dili maayong pagpalit. Ang mga kotse, sama sa ubang makinarya, madaan. Busa, ang bili sa usa ka kotse mous-os duyog sa edad, kilometraheng nadaganan, ug paggamit.

Mahimo bang ipailaila ko ang akong kaugalingon? Ako usa ka mekaniko ug awto sulod na sa kapig 15 anyos. Busa pasugira ako sa pipila ka butang nga akong nakat-onan. Ang mosunod maoy pipila ka pangutana nga isukna sa imong kaugalingon sa dili pa mopalit ug ginamit nang kotse.

Pilay Maabot Nako nga Gastohon?

Una, kalkuloha kon pila ang itugot sa imong badyet aron gastohon diha sa usa ka kotse. Unya ang mga anunsiyo sa mantalaan makahatag kanimog ideya sa tuig ug modelo sa mga kotse nga malakip sa mga limitasyon sa imong ikabayad. Sa pila ka nasod, ang mga bangko, mga institusyong tigpahulam, ug pipila ka librarya adunay binulan nga mga giya nga naglista sa mga prisyo sa ginamit nang mga kotse. Tinoa ang pagkalkulo dili lamang ang prisyo sa usa ka kotse kondili hasta ang gastos sa buhis, rehistro, ug insyurans. Magplano usab nga adunay diyutayng kuwarta alang sa wala-damhang mga alayohon nga mahimong gikinahanglan sa kotse human nimo kana palita.

Unsang Matang sa Kotse ang Akong Gikinahanglan?

Sa dihang magadesidir kon unsay imong gikinahanglan, tinoa kon unsay hinungdanon alang kanimo. Tagda ang gidak-on sa imong pamilya ug kon unsang mga kalihokan nga gamitan sa kotse, sama sa pagsakay paingon sa trabaho, paghatod sa imong mga anak ngadto sa eskuylahan, ug paghimo sa Kristohanong ministeryo. Ang kotse gamiton ba sa lokal nga mga biyahe o lagyong mga distansiyang biyahe? Ayaw ilimite ang imong kaugalingon sa usa ka espesipikong klase ug modelo; hinunoa, pangitaa ang usa ka kotse nga maayong pagkaatiman ug anaa sa maayong kondisyon. Palita ang kotse nga sayon nga mentenahon. Sa ngadtongadto ang tanang kotse magkinahanglag mga piyesa. Sa inyong dapit aduna bay tigsuplay sa nahiangayng mga piyesa? Ang mga piyesa sa mga kotse nga kapig napulo ka tuig sa edad mahimong lisod nga mapalit. Kon limitado ang imong badyet, likayi ang pagpalit sa maluho o importadong linaing mga kotse, kay ang mga piyesa ug pagserbisyo sa walay duhaduha mas mahal. Bisan pag ang maong mga kotse mahimong kasaligan kaayo, kana sila mahimong mahal usab kaayo nga mapanag-iya.

Kini ba Usa ka Maayong Kotse?

Ang usa ka maayong kotse mao ang usa nga maayog mentenans. Sa kasagaran, labing maayo nga likayan ang mga kotse nga taas kaayog kilometraheng nadagan​—ilabina kon kini mao ang resulta sa pagmaneho diha sa siyudad inay sa dagkong mga karsada. Ang taas kaayog kilometraheng nadagan mahimong magkalainlain sa lainlaing mga dapit. Walay ginamit nang kotse ang hingpit. Bisan pa niana, makaabot ka ba sa mga ayohonon nga gikinahanglan sa kotse? Kasagaran nga ang mga pagpang-ayo dili mopadako sa bili sa kotse. Pananglitan, kon mopalit kag kotse sa $3,000 ug unya mogastog $1,000 diha sa gikinahanglang mga pagpang-ayo, ang kotse dili gayod mobilig $4,000. Sa kasagaran, mas barato ang pagpalit ug kotse nga maayog kondisyon kay sa pagpalit ug kotse nga dili maayog kondisyon ug unya ayohon kana.

Aniay pila ka sugyot sa pagpilig usa ka maayong kotse:

• Bug-os nga susiha ang kotse sa dili pa nimo paliton kini. Aron makatimbangtimbang sa tinuod nga bili sa kotse, likayi ang pagtan-aw sa usa ka kotse sa magabii o kon mag-ulan. Libot sa madali sa kotse. Unsay imong hunahuna bahin niini? Ang sulod ug gawas ba nagpadayag nga ang nangaging tag-iya nagmahal ug nag-atiman pag-ayo sa kotse? Maayo ba kanang pagkamentenar? Ang tigbaligya makahatag ba ug rekord sa mentenans nga gihimo diha sa sakyanan? Kon dili, lagmit nga ang kotse napasagdan. Mahimong dili na nimo gustong motan-aw sa dugang sa maong kotse.

• Padagana ang kotse aron masulayan. Pakusga ang dagan sa kotse abot sa katulinon sa haywey sa maong sulay nga pagpadagan. Himoa usab ang hunong-dagan nga pagmaneho diha sa bungtorong dalan ug sa patag nga mga dalan.

Makina:

Moandar ba dayon ang makina?

Ang trambutso ba dili daghag aso?

Maayo bag andar ang makina?

Hapsay ba ang dagan niini?

Wala bay mga kalangas sa makina?

Ang makina ba may igong puwersa alang sa pagpakusog sa dagan?

Kon ang tubag maoy dili sa bisan hain sa mga pangutana sa itaas, nan ang makina mahimong nagkinahanglag pag-tune up o mas seryosong mga pag-ayo. Kining mga kondisyona mahimong mga ilhanan usab sa daan nang makina. Magbantay kon ang tigbaligya moingon nga nagkinahanglan lamang kinig tune-up. Ang mga tune-up angay nga nahimong bahin sa regular nga mentenans sa kotse.

Transmisyon:

Ang awtomatikong transmisyon ba modaplis o dili mokaw-it sa dihang ipaenggansa?

Dili ba hapsay ang pagbalhin niini?

Mokugiot ba ang mga enggansa?

Kon ang tubag maoy oo sa bisan hain sa maong mga pangutana, ang transmisyon mahimong nagkinahanglang ayohon.

Mga brek ug suspensiyon:

Ang kotse ba mopakilid inigdrayb nimo o inigbrek?

Ang kotse ba mokurog sa tinong mga katulinon o inigbrek nimo?

Aduna bay mga kalangas inigbrek o inigliko o inig-agi sa mga bundo?

Kon oo ang tubag sa bisan hain sa maong mga pangutana, basin kinahanglang ayohon ang brek o suspensiyon sa kotse.

• Pangitaa ang ubang mga bahin nga kinahanglang ayohon. Pagsul-ob sa sinina nga dili nimo igsapayan nga mabuling aron tan-awon ang kotse sa sulod, sa gawas, ug sa ilalom.

• Susiha kon gitaya ba ang lawas. Likayi ang mga kotse nga gitay-an na. Kadaghanan sa bubag-o pang mga kotse maoy “usag-lawas” nga pagkagama. Ang mga piyesa sa lawas gigamit aron palig-onon ang gambalay diha sa ubay-ubayng mga bahin. Kon tay-on ang maong mga piyesa, kasagaran mahal kaayo ang pag-ayo niini sa bug-os. Ang taya sa tapaludo mahimong pangibabaw lamang apan kasagaran maoy usa ka ilhanan nga ang mga bahin sa gambalay dunay taya usab. Tan-awa ang ilalom sa kotse kon may taya ba. Magbantay sa bag-ong mga pininturahan; ang kotse mahimong usa ka pinaputi nga lubnganan.

• Pangitag kadaot gumikan sa aksidente. Susiha kon may natagong kadaot sa ilalom sa dulong sa kotse ug sa kargahan sa luyo. Ang mga pultahan, tapaludo, ug kargahan dili ba mokang-a? May mga ilhanan ba sa pintura nga giespre diin dili kini angay, sama diha sa mga sira sa pultahan? Duna bay mga liki sa kargahan o sa mga bahin nga may alpombra? Ang maong mga liki makapahinabog taya.

• Susiha ang aseite sa makina. Tan-awa ang sukdanan sa aseite. Ubos ba ang lebel sa aseite? Kini mahimong resulta sa kusog nga paggamit sa aseite o mga pagtulo. Ang aseite hugaw ba kaayo o itom na? Daw balason ba kini? Pangitag mga ilhanan sa pagkabasa sa aseite libot sa mga tak-op sa balba. Sakay sa kotse, ug lisoa ang swits sa pagpaandar, apan ayawg padagana ang kotse. Mosiga ba ang sugang pasidaan sa menos nga presyon sa aseite? Kon ang kotse nasangkapan sa sukod sa presyon sa aseite, kini angay nga mabasang sero. Karon paandara ang makina, nga hinaya ang andar sa makina, ug matikdi kon unsa ka dugay nga mapalong ang suga sa presyon sa aseite o ang sukod mabasang normal nga presyon sa makina. Ang kapin sa duha ka segundo aron mapalong ang suga o aron ang sukod mabasang normal nga presyon mahimong magpasabot sa dakodakong kadaot sa makina. Sa pipila ka bubag-ong mga kotse sa Tinipong Bansa, ang “Check Engine” o “Service Engine Soon” nga suga angay nga mosiga sa dihang giyawihan ang kotse apan ang makina wala mag-andar. Ang suga kinahanglang mapalong inig-andar sa makina. Kon ang suga magpabiling nagsiga uban sa makina nga nagaandar, kini sagad nagpasabot ug suliran sa makina, tingali sa sistemang magpamenos sa polusyon sa hangin o sa sistema sa pagpaagos sa gasolina.

• Susiha ang awtomatikong pluwido sa transmisyon. Ubos ba kini o nangitom? Pangitag mga liki sa ilalom sa transmisyon. Kining mga kondisyona mahimong magpasabot sa panginahanglan ug dakong trabaho sa transmisyon. Kon ang kotse dunay front-wheel drive, tan-awa sa ilalom niana aron makita kon gisi ang gomang nagtabon sa constant velocity joints. Kon gisi, ang grasa ikabuga, ug kini makapahinabog kusog nga kadaot sa mga sinumpayan, nga mahal nga ilisan.

• Susiha ang tanang upat ka ligid: Kon kana daan na kaayo, dahoma nga pulihan kana. Kon ang ligid nadaan sa talagsaong paagi, tingali gikinahanglan ang pagpahaom sa linya o pagpuli sa mga piyesa sa manibela.

• Susiha ang power-steering nga sistema. Ang pluwido ba daw nangitom o ubos? Paandara ang kotse ug lisoa sa makadaghan ang manibela gikan sa kilid ngadto sa kilid. Nagkinahanglan kinig managsamang presyon aron maliso sa tuo o wala. Aduna bay masakmitong lihok inigliso sa manibela? Ang paglihok sa de-koryenteng manibela angay nga hilom. Ang bisan unsang mga suliran sa pagpaandar mahimong magpasabot ug mahalong mga pag-ayo.

• Ubang mga pagsusi.

Susiha ang kondisyon sa mga bakos ug mga hose.

Susiha ang paglihok sa brek para emerhensiya sa usa ka bungtod.

Susiha kon dunay talagsaong gidak-on sa pagkadaot sa tumbanan sa brek.

Susiha ang kondisyon sa trambutso. Saba ba? Naluag ba?

Susiha ang mga shock ug mga spring. Duol na bang modapat ang kotse sa yuta tungod sa luyang suspensiyon, o inigduso nimo sa matag eskina nga magsunod, mountol ba kinig kapin sa tulo ka beses?

Kon adunay air conditioner, moobra ba kini sa tanang gikusgon sa paghuyop?

Ang mga suga ba, mga tigpahid, busina, mga bakos sa lingkoranan, ug mga bintana moandar?

Susiha ang ilalom sa sampot sa sakyanan kon aduna bay dayag nga mga ilhanan nga nataod ang koneksiyon sa usa ka treyler. Kon duna, gisugyot ang pagbantay, kay ang pagbira mahimong nakapabug-at sa transmisyon.

Kon dili ka segurado sa bisan hain sa mga pagsusi nga gihisgotan niining artikuloha, tingali maalamon nga ang kotse ipatimbangtimbang sa usa ka propesyonal nga mekaniko sa dili pa paliton kini. Hangyoa siya sa pagsusi sa kotse ug paghimog listahan sa mosunod:

1. Mga alayohon nga gikinahanglan dayon sa kotse ug banabana sa gastos sa mga piyesa ug trabaho.

2. Mga alayohon nga mahimong gikinahanglan sa kotse sa sunod tuig ug banabana sa gastos sa mga piyesa ug trabaho.

Ang maong inspeksiyon sa usa ka propesyonal nga mekaniko kinahanglang dili dangtag usa ka oras. Bisan pag kini tingali mokostar kanimo sa bili sa trabaho alang sa usa ka oras, ang gasto gamay kon itandi sa wala-hisayring gastos sa gikinahanglang mga alayohon. Susiha gikan sa tigbaligya kon unsang trabaho ang bag-o pang gihimo diha sa kotse. Hangyoa nga tan-awon ang mga rekord sa pagpaserbisyo. Ang aseite ba ug ang salaan sa aseite giilisan nga regular? Nahinloan ba sukad ang awtomatikong transmisyon? Kanus-a ang kataposang higayon nga na-tune up ang kotse? Hinumdomi, ang usa ka maayong kotse mao ang usa nga maayog mentenans ug dili kinahanglag daghang trabaho.

Lingkod ug banabanaa una ang gasto​—uban sa tanang kasayoran ug mga impormasyon bahin sa kotse. Unya ihukom kon ang kotse takos ba niini ug kon ikaw nagbadyet ug igong salapi aron makabayad dili lamang sa prisyo sa pagpalit kondili hasta ang ubang galastohan.​—Tinampo sa usa ka mekaniko ug awto.

[Mga hulagway sa panid 16, 17]

Sa unsang paagi makapaneguro ka nga ang ginamit nang kotse nga imong paliton maoy maayo? Gihulagway dinhi ang pipila sa daghang butang nga angay nimong tagdon

Ipasusi sa usa ka mekaniko ug awto ang kotse sa dili pa nimo kana paliton

Regular bang giilisan ang aseite ug salaan sa aseite?

Pangitag kadaot gumikan sa aksidente. Ang mga pultahan, tapaludo, ug kargahan dili ba mokang-a?

Ang talagsaong kadaot sa ligid mahimong magpasabot sa seryosong mga suliran sa alaynment o sa manibela