Nahibulong Ka ba Sukad?
UNSA ba gayod ang giingon sa Bibliya bahin kang Maria, ang inahan ni Jesus? Kadaghanang magtutuo sa Kakristiyanohan hugot nga nagtuo sa doktrina nga ang Amahan maoy Diyos, ang Anak maoy Diyos, ug ang Espiritu Santo maoy Diyos ug bisan pa niana dili sila tulo ka diyos, apan tulo sa usa. Sa laing pagkasulti, ang Trinidad. Alang sa dakong bahin sa Kakristiyanohan (Katoliko, Anglikano, ug Ortodokso), kining maong pagtulon-an makataronganong mitultol ngadto sa pagtuo nga si Maria, ang inahan ni Jesus, sa ingon mao ang “Inahan sa Diyos.” Ingon ba gayod niana? Giunsa pag-isip ni Jesus ang iyang inahan? Giunsa siya pag-isip sa mga tinun-an? Susihon nato kon unsay tubag sa Bibliya:
1. Kanus-a unang gihisgotan si Maria sa Bibliya?—Mateo 1:16.
2. Unsang relihiyon ang gituman ni Maria sa panahon sa pagkatawo ni Jesus?—Lucas 2:39, 41.
3. Si Maria ba mihalad alang sa iyang mga sala?—Lucas 2:21-24; itandi ang Levitico 12:6, 8.
4. Si Maria ba usa ka birhen sa dihang nagsamkon kang Jesus? Nganong hinungdanon kadto?—Mateo 1:22, 23, 25; Lucas 1:34; Isaias 7:14; Hebreohanon 4:15.
5. Sa unsang paagi namabdos si Maria?—Lucas 1:26-38.
6. Sa unsang paagi misanong si Maria sa iyang talagsaong mga sirkumstansiya?—Lucas 1:46-55.
7. Sa unsang paagi gipakita ni Maria nga siya usa ka mahangawaong inahan?—Lucas 2:41-51.
8. Nakabaton ba si Maria ug ubang mga anak sa ulahi?—Mateo 13:55, 56; Marcos 6:3; Lucas 8:19-21; Juan 2:12; 7:5; Buhat 1:14; 1 Corinto 9:5.
9. Sa unsang paagi nato nahibaloan nga ang mga igsoong lalaki ug babaye ni Jesus dili gayod niya mga ig-agaw?—Itandi ang Marcos 6:3; Lucas 14:12; ug Colosas 4:10.
10. Giisip ba ni Jesus si Maria ingong “Inahan sa Diyos”?—Juan 2:3, 4; 19:26.
11. Giisip ba ni Maria ang iyang kaugalingon ingong ang “Inahan sa Diyos”?—Lucas 1:35; Juan 2:4, 5.
12. Gihatagan ba ni Jesus ang iyang inahan ug bisan unsang linaing pagdayeg o pagsimba?—Marcos 3:31-35; Lucas 11:27, 28; Juan 19:26.
13. Sa unsang paagi giisip ni Maria ang iyang bahin diha sa mga katuyoan ni Jehova?—Lucas 1:46-49.
14. Si Maria ba usa ka tigpataliwala tali sa Diyos ug sa tawo?—1 Timoteo 2:5.
15. Pila sa 66 ka basahon sa Bibliya nga si Maria ginganlan?
16. Gibayaw ba sa Kristohanong mga magsusulat si Maria diha sa ilang mga basahon ug mga sulat?—Juan 2:4; 2 Corinto 1:1, 2; 2 Pedro 1:1.
17. Pila ka beses nga si Maria gihisgotan diha sa 21 ka sulat nga gisulat ni Pablo, Pedro, Santiago, Juan, ug Judas?
18. Unsay paglaom ni Maria ingong sumusunod ni Jesus?—1 Pedro 2:5; Pinadayag 14:1, 3.
19. Si Maria ba ang babaye nga gihisgotan sa Genesis 3:15 ug Pinadayag 12:3-6?—Isaias 54:1, 5, 6; Galacia 4:26.
20. Unsa ang presenteng kahimtang ni Maria?—2 Timoteo 2:11, 12.
Ang mga Tubag sa Bibliya
1. “Si Jacob nahimong amahan kang Jose ang bana ni Maria, nga kaniya natawo si Jesus, kinsa gitawag Kristo.”—Mateo 1:16.
2. “Sa dihang ila nang natuman ang tanang butang sumala sa balaod ni Jehova, sila mibalik ngadto sa Galilea sa ilang kaugalingong siyudad sa Nasaret. Karon nabatasan sa iyang mga ginikanan nga moadto tuig-tuig sa Jerusalem alang sa kasaulogan sa paskuwa.” (Lucas 2:39, 41) Ingong mga Hudiyo, gisunod nila ang Balaod ni Moises.
3. “Sa dihang ang mga adlaw alang sa paglunsay kanila sumala sa balaod ni Moises nabug-os na, ilang gidala siya sa Jerusalem aron ipresentar siya kang Jehova, ingon sa nasulat sa balaod ni Jehova: ‘Ang matag lalaki nga nagabukas ug tagoangkan pagatawgong balaan ngadto kang Jehova.’” (Lucas 2:22, 23) “Kong ang mga adlaw sa pagputli kaniya matuman na tungod sa anak nga lalaki o tungod sa anak nga babaye magdala siya ug usa ka nating karnero nga may usa ka tuig ang panuigon alang sa halad nga sinunog ug usa ka kuyabog nga salampati o usa ka tokmo alang sa halad tungod sa sala ngadto sa pultahan sa balongbalong nga pagatigoman ngadto sa saserdote. Apan kong siya dili makaabot sa pagdala sa usa ka nating karnero, nan magdala siya ug duha ka tokmo o duha ka kuyabog nga salampati, ang usa alang sa halad nga sinunog ug ang usa alang sa halad tungod sa sala, ug ang saserdote magabuhat ug pagtabon sa sala alang kaniya, ug mamahinlo siya.”—Levitico 12:6, 8.
4. “Wala siyay [Jose] pakigduol kaniya hangtod nga napahimugso niya ang usa ka anak nga lalaki; ug siya nagtawag sa iyang ngalan nga Jesus.” (Mateo 1:25) “Si Maria miingon sa anghel: ‘Unsaon pagkahimo kini, nga wala man ako makigduol sa usa ka lalaki?’” (Lucas 1:34) “Si Jehova mismo mohatag kaninyo ug usa ka timaan: Tan-awa! Ang usa ka ulay mismo manamkon, ug manganak siya ug usa ka anak nga lalaki, ug siya magatawag sa iyang ngalan nga Emmanuel.” (Isaias 7:14) “Kita adunay ingong hataas nga saserdote, dili usa nga dili makasimpatiya sa atong mga kaluyahon, apan usa nga nasulayan sa tanang paagi sama kanato, hinuon walay sala.”—Hebreohanon 4:15.
5. “Ang anghel miingon kaniya: ‘Kunsaran ka sa balaang espiritu, ug pagalandongan ikaw sa gahom sa Labing Hataas. Tungod nianang katarungana usab ang matawo pagatawgong balaan, Anak sa Diyos. . . . Sa Diyos walay kapahayagan nga maimposible.’”—Lucas 1:35, 37.
6. “Si Maria miingon: ‘Ang akong kalag nagapadako kang Jehova, ug ang akong espiritu dili makapugong nga magngaya sa hilabihan sa Diyos nga akong Manluluwas . . . Ang gamhanang Usa nagbuhat ug dagkong mga buhat alang kanako, ug balaan ang iyang ngalan.’”—Lucas 1:46, 47, 49.
7. “Karon dihang ilang nakita siya nahingangha sila, ug ang iyang inahan miingon kaniya: ‘Anak, nganong giingon mo man kami niini? Ania, ang imong amahan ug ako nabalisa sa pagpangita kanimo.’ Apan siya miingon kanila: ‘Nganong gipangita pa man ninyo ako? Wala ba kamo mahibalo nga ako kinahanglang maania sa balay sa akong Amahan?’”—Lucas 2:48, 49.
8. “Dili ba mao man kini ang anak sa panday? Dili ba ang iyang inahan gitawag ug Maria, ug ang iyang mga igsoong lalaki si Santiago ug Jose ug Simon ug Judas? Ug ang iyang mga igsoong babaye, dili ba silang tanan uban man kanato?” (Mateo 13:55, 56) “Siya ug ang iyang inahan ug mga igsoon [Grego, a·del·phoiʹ] ug ang iyang mga tinun-an [Grego, ma·the·taiʹ] nanglugsong ngadto sa Capernaum, apan wala sila moestar didto ug daghang adlaw.”—Juan 2:12.
9. Adunay lahi nga Gregong mga pulong alang sa igsoon ug ig-agaw. “‘Mao kini ang panday nga anak ni Maria ug ang igsoon [Grego, a·del·phosʹ] nila ni Santiago ug Jose ug Judas ug Simon, dili ba? Ug ang iyang mga igsoong babaye [Grego, a·del·phaiʹ] ania uban kanato, dili ba?’ Busa sugod silang nangapandol kaniya.” (Marcos 6:3) “Ayaw tawga . . . ang imong mga paryente [Grego, syg·ge·neisʹ].” (Lucas 14:12) “Si Marcos nga ig-agaw [Grego, a·ne·psi·osʹ] ni Bernabe . . .” (Colosas 4:10)—Tan-awa ang The Kingdom Interlinear Translation of the Greek Scriptures.
10. “Si Jesus miingon kaniya: ‘Unsay labot ko kanimo, babaye? Wala pa moabot ang akong takna.’” “Si Jesus, pagkakita sa iyang inahan ug sa tinun-an kinsa iyang gihigugma nga nagbarog sa duol, miingon sa iyang inahan: ‘Babaye, tan-awa! Ang imong anak nga lalaki!’” (Juan 2:4; 19:26) Ang paggamit ni Jesus sa pulong nga “babaye” maoy dili kawalay-pagtahod sumala sa paggamit sa maong panahon.
11. Walay teksto sa Bibliya nga naggamit sa pahayag nga “Inahan sa Diyos.”
12. “Usa ka babaye gikan sa panon sa katawhan mipatugbaw sa iyang tingog ug miingon kaniya: ‘Malipayon ang tagoangkan nga nagdala kanimo ug ang mga suso nga imong gisusohan!’ Apan siya miingon: ‘Dili, hinuon, Malipayon kadtong nagapatalinghog sa pulong sa Diyos ug nagasunod niini!’”—Lucas 11:27, 28.
13. “Si Maria miingon: ‘Ang akong kalag nagapadako kang Jehova . . . tungod kay gilantaw niya ang ubos nga kahimtang sa iyang ulipong babaye. Kay, tan-awa! sukad karon ang tanang kaliwatan magapahayag kanako nga malipayon.’”—Lucas 1:46, 48.
14. “Kay adunay usa ka Diyos, ug usa ka tigpataliwala tali sa Diyos ug sa mga tawo, usa ka tawo, si Kristo Jesus.”—1 Timoteo 2:5.
15. Lima—Mateo, Marcos, Lucas, Juan, ug Buhat. Gihisgotan siya ingong “Maria” 19 ka beses, ingong “inahan” ni Jesus 24 ka beses, ug ingong “babaye” kaduha.
16. Gawas sa upat ka magsusulat sa Ebanghelyo, si Maria wala gayod hisgoti—wala gani sa mga pasiuna sa apostolikanhong mga sinulat. “Si Pablo, usa ka apostol ni Kristo Jesus pinaagi sa kabubut-on sa Diyos . . . Hinaot nga kamo adunay dili-takos nga kalulot ug kalinaw gikan sa Diyos nga atong Amahan ug sa Ginoong Jesu-Kristo.” (2 Corinto 1:1, 2) “Si Simon Pedro, usa ka ulipon ug apostol ni Jesu-Kristo, . . . pinaagi sa pagkamatarong sa atong Diyos ug sa Manluluwas nga si Jesu-Kristo.”—2 Pedro 1:1.
17. Wala bisan kas-a.
18. “Kamo mismo usab ingong buhing mga bato gipanagtukod man ingong usa ka espirituwal nga balay alang sa usa ka balaang pagkasaserdote, aron magtanyag ug espirituwal nga mga halad nga dalawaton sa Diyos pinaagi kang Jesu-Kristo.” (1 Pedro 2:5) “Nakita ko, ug, tan-awa! ang Kordero nga nagabarog diha sa Bukid Zion, ug may uban kaniya nga usa ka gatos ug kap-atag-upat ka libo nga nagabaton sa iyang ngalan ug sa ngalan sa iyang Amahan nga nahisulat diha sa ilang mga agtang. Ug ilang ginaawit ang ingon sa usa ka bag-ong awit atubangan sa trono . . . , ug walay usa nga nakahimo sa pagkat-on sa bug-os sa maong awit gawas sa usa ka gatos ug kap-atag-upat ka libo, kinsa gipalit gikan sa yuta.”—Pinadayag 14:1, 3.
19. “‘Tuaw nga malipayon, ikaw nga apuli nga babaye nga wala manganak! Magmangayaon pinaagi sa malipayong pagtuaw ug singgit sa makusog, ikaw nga wala gayod mag-antos sa pagpanganak, kay ang mga anak sa biniyaan labi pang daghan kay sa mga anak sa babaye nga may bana,’ nag-ingon si Jehova. ‘Kay ang imong Dakong Magbubuhat mao ang imong bana, si Jehova sa mga panon mao ang iyang ngalan; ug ang Balaang Usa sa Israel mao ang imong Manunubos. Ang Diyos sa tibuok nga yuta siya pagatawgon.’” (Isaias 54:1, 5) “Ang Jerusalem sa itaas gawasnon, ug siya ang atong inahan.” (Galacia 4:26) Ang simbolikong babaye sa Diyos, ang langitnong Zion, ang langitnong organisasyon ni Jehova, gitandi sa usa ka asawa ug inahan, ug siya mao ang “babaye” niining mga tekstoha.
20. “Kasaligan ang pamulong: Tinong kon kita magkauban nga mamatay, kita usab mabuhi nga magkauban; kon kita padayong molahutay, kita usab magkaubang magmando ingong mga hari; kon kita molimod, siya usab molimod kanato.” (2 Timoteo 2:11, 12) Kon si Maria nagpabiling matinumanon hangtod sa kamatayon, siya karon nagmando sa langit kauban sa uban pa sa 144,000 nga nagmando uban kang Kristo.—Pinadayag 14:1, 3.