Andam Ka na Bang Mobakasyon?

HAPIT na ang ting-init sa Amihanang Hemisperyo. Sa dili magdugay minilyon ang mobakasyon. Apan ang mga bakasyon ginahimo dili lamang sa ting-init. Ang turismo nahimong tibuok-tuig nga negosyo, nga nagpasulod ug bilyonbilyong dolyar matag tuig. Bisan tuod ang kadaghanang bakasyonista mobiyahe sa ilang kaugalingong nasod, ang pagbiyahe gawas sa nasod, nga mga sapian ra ang makaarang kaniadto, ordinaryo na.

Ang panahon sa bakasyon nga gihatag sa mga empliyado nagkalainlain gikan sa nasod ug nasod. Niadtong 1979, 2 porsiyento lamang sa mamumuo sa Alemanya ang nagdawat ug unom ka semanang bakasyon, apan karon mao na kanay madawat sa kadaghanan. Ang aberids nga bakasyon sa mga trabahante sa pabrika sa Kasadpang Uropa maoy kapin sa lima ka semana.

Makaayo ang mga Bakasyon

Ang bakasyon sa sinugdan lahi kaayo ug kahulogan sa kahulogan niini karon. Ang The New Encyclopædia Britannica nagbatbat: “Ang modernong batasan sa mga bakasyon . . . maoy kaatbang sa kahulogan niini sa karaang relihiyosong kalendaryong Romanhon. Kapin sa 100 ka adlaw sa tuig maoy mga adlaw sa pista nga gipahinungod sa nagkalainlaing mga diyos ug mga diyosang Romanhon. Sa mga adlaw sa sagradong mga pista, ug busa balaang mga adlaw, ang mga tawo mopahulay gikan sa ilang adlaw-adlawng mga kalihokan. Ang mga adlaw nga wala isipa nga sagrado gitawag ug dies vacantes, bakanteng mga adlaw, nga sa maong panahon ang mga tawo nagtrabaho.” Imbes mga adlaw sa pagtrabaho, ang “bakanteng mga adlaw” sa modernong panahon maoy mga adlaw sa pagpahulay.

Gusto kaayong tawgon sa mga Aleman ang mga bakasyon nga “ang labing maayong mga semana sa tuig.” Sa laing bahin, lantawon sa mga trabahoso ang “bakanteng mga adlaw” nga bakante gayod, nga walay makahuloganong kalihokan. Apan hingapin ra kini nga panghunahuna. Ang timbang nga panghunahuna nagadawat sa kaalam sa matag karon ug unya nga paghunong sa normal nga rotina, sa pagbuhat ug usa ka lahi nga butang, ug magpahayahay.

Ang positibong mga bahin sa mga bakasyon napamatud-an sa 1991 nga surbi sa mga manedyer sa negosyo sa Uropa, 78 sa matag 100 miingon nga ang mga bakasyon “gikinahanglan gayod aron ang mga manedyer dili maugtas.” Setentay-singko porsiyento nagtuo nga ang mga bakasyon makauswag sa pagkaepisyente sa trabaho, ug kapin sa dos-tersiya nag-ingon nga ang mga bakasyon makapauswag sa pagkamamugnaon. Mas mabulokon pa, 64 porsiyento sa mga babaye ug 41 porsiyento sa mga lalaki miuyon niini: “Mabuang ako kon walay regular nga bakasyon.”

Pagbiyahe, Usa ka Edukasyon Mismo

Ang ika-17ng siglong Ingles nga doktor ug magsusulat nga si Thomas Fuller misulat: “Siya nga nagabiyahe kanunay daghag nahibaloan.” Ang pagbiyahe makapasinati kanato sa mga tawo gikan sa ubang mga dapit, makakat-on bahin sa ilang mga kostumbre ug sa ilang paagi sa kinabuhi. Ang pagbiyahe sa mga nasod nga ubos ang sukdanan sa kinabuhi kay sa atoa makatudlo kanato nga mahimong mapasalamaton sa atong nabatonan ug makapukaw kanato ug mga pagbatig kaluoy sa mga tawo nga dili kaayo bulahan kay kanato.

Kon magpaimpluwensiya kita niini, ang pagbiyahe makapausab sa mga sayop nga hunahuna ug makamenos sa mga pagpihig. Kini maghatag ug higayon sa pagkakat-on mismo sa labing menos ug diyutay sa usa ka bag-ong pinulongan, sa pagtilaw sa mga pagkaon nga tingalig makaangay kita, o makadugang sa atong album sa mga letrato sa pamilya, sa koleksiyon sa slide, o librariya sa video nga may mga larawan sa matahom nga kalalangan sa Diyos.

Siyempre, aron makapahimulos gayod, labaw pa ang atong himoon kay sa pagbiyahe lang. Ang turista nga mobiyahe sa katunga sa tibuok kalibotan ug moabot sa usa ka hotel uban sa isigkaturista​—nga ang kadaghanan kanila maoy iyang kataginasod​—maglangoylangoy sa pribadong pool o dagat sa hotel, ug mokaon sa mao ra gihapong pagkaon nga iyang ginakaon sa iyang nasod wala kaayoy makat-onan. Pagkaanugon! Sumala sa mga taho, ang kadaghanan sa mga tigbiyahe dayag wala kaayoy interes sa mga nasod nga ilang giduaw o sa katawhan niini.

Hustong Pagpangandam

Si Samuel Johnson, usa ka 18ng-siglong Ingles nga magsusulat ug magbabalak, miingon nga ang tawo nga mobiyahe “kinahanglang magdala ug kahibalo uban niya, kon buot niya nga mopauli nga adunay kahibalo.” Busa kon ikaw makahigayon sa pagbiyahe, pangandam sa imong biyahe. Pagbasa mahitungod sa imong destinasyon sa dili ka pa molakaw. Planoha kon unsay imong gustong tan-awon, ug desidir kon unsay imong gustong buhaton. Dayon pangandam sumala niana. Pananglitan, kon buot kang maglakawlakaw sa baybayon o mokatkat ug mga bukid, pagdalag angay nga mga sapatos ug besti.

Ayaw han-oki ug daghan kaayo ang imong eskedyul ug sa ingon mabalhin ang tensiyon sa matag adlaw nga kinabuhi diha sa imong bakasyon. Paggahin ug daghang wala-planohang panahon sa pagbuhat sa mga butang nga wala damha. Ang usa sa tinuod nga mga benepisyo sa pagbakasyon mao ang pagkabaton ug panahon sa paghunahuna ug pagpalandong nga dili mabug-atan sa estriktong eskedyul, nga mobating nahupayan sa tensiyon ug mga restriksiyon sa inorasan nga pagkinabuhi.

Ang mabungahon kaayong bakasyon mahimong maglakip pa ug kugi nga pagtrabaho. Ang pagbuhat ug usa ka lahi nga butang sagad mao ang yawi sa maayong bakasyon. Pananglitan, usa ka dili-negosyo nga organisasyon sa Tinipong Bansa nanawag ug Boluntaryong mga Bakasyon nga naghikay sa mga boluntaryo sa pagpalabay sa mga bakasyon sa pagmentinar sa nasodnong mga parke o mga lasang. Ang usa ka boluntaryo miingon nga siya naghagog maayo, apan nalingaw kaayo siya niini nga siya mihukom sa pagsubli sa eksperyensiya sa sunod tuig.

Sagad gamiton sa mga Saksi ni Jehova ang mga bakasyon sa pagbiyahe sa Kristohanong mga kombensiyon o sa pagpauswag sa ilang publikong ministeryo. Gigamit sa uban ang ilang mga bakasyon sa pagtrabaho diha sa mga hedkuwarter o sa pasilidad sa sanga sa mga Saksi ni Jehova diha sa ilang tagsatagsa ka nasod, ug sila nalingaw sa kasinatian. Human niadto, daghan niini nila ang misulat ug mga sulat sa apresasyon sa pribilehiyo.

Oo, ang mga bakasyon mahimong makalingaw kaayo, bisan sa labing maayong mga semana sa tuig. Dili ikahibulong nga iphon sa kabataan ang mga adlaw hangtod moabot kini! Bisan pa niana, adunay mga butang nga kinahanglan nimong bantayan. Hisgotan kini sa sunod nga artikulo.