‘Bisan ang Dila sa mga Nganga Makasulti sa Matin-aw’

SESYON sa hapon kadto sa usa ka adlaw nga espesyal nga asembliya sa mga Saksi ni Jehova sa Czechoslovakia (karon Republika sa Czech), ug ginatos ang nagtigom sa pagdawat sa pagtudlo sa Bibliya. Ako nagtindog sa likod sa plataporma nga nagrepaso sa akong bahin. Dili kini dakong bahin. Duha ka batan-ong mga Saksi mag-asoy ug mga eksperyensiya, ug tsirman lamang ako nianang bahina. Niadtong buntaga naghigwaos ako, ug karon kini misamot. Literal nga naparalisar ako, nabalaka pag-ayo, ug wala makasulti.

Tingali nagtuo ka nga halos ang tanan nerbiyoson nianang kahimtanga. Apan labaw pa kini kay sa pagkanerbiyos lamang. Tugoti ako nga makapatin-aw.

Ang Akong Problema sa Pagsulti

Sa edad 12, nahulog ako ug nadaot ang akong ulo, liog, ug taludtod. Human niana, may mga panahong magkanga ako o maglisod sa paglitok sa mga pulong, ilabina sa mga pulong nga magsugod sa mga letrang p, k, t, d, ug m. Usahay dili gani ako makasulti.

Wala kaayo ako matugaw niadtong panahona sa akong depekto; daw gamay lamang kadto nga kakulian. Apan sa midagan ang mga tuig, nakaugmad ako ug tinuod nga kahadlok sa bisan unsang matang sa pagsulti atubangan sa publiko. Nakuyapan ako kas-a samtang naghatag ug report sa usa ka ulohan diha sa eskuylahan. Ug usahay samtang namalit ako, sa dihang nangutana ang mga tindera kon unsay akong gusto, dili ako makatubag kanila. Samtang nagbarog ako nga nakigbisog nga makasulti, misamot ang ilang kalagot: “Pagdali. Dili ako makahulat sa tibuok adlaw. Naghulat ang ubang mga kustomer.” Tungod niini, dili ako makapalit sa mga butang nga akong gikinahanglan.

Ang akong tuig sa pag-eskuyla lisod kaayo. Sa dihang naghatag ako ug binabang mga taho, tiawtiawan sa mga kauban sa eskuylahan ang akong pagkanga. Bisan pa niana, migraduwar ako sa hayskul ug sa 1979 mipadayon sa pagtuon sa usa ka unibersidad sa Prague, Czechoslovakia. Sanglit gusto kaayo ako ug mga dula, mikuha akog mga kurso aron mahimong magtutudlo sa physical education. Apan unsaon ko sa pagkab-ot sa akong tumong? Bisan pa sa akong mga kabalaka, determinado ako nga mouswag.

Nangitag Tabang

Kinahanglang may paagi gayod nga mawala ko ang akong depekto sa pagsulti. Busa human nakagraduwar sa unibersidad, determinado ako sa pagkuha ug propesyonal nga tabang. Gipangita ko ang usa ka klinika sa Prague nga nag-espesyalisar sa pagtambal sa mga depekto sa pagsulti. Sa panahon sa unang pagkonsulta, misinggit ang usa ka nars: “Ang imong sakit sa utok lahi kaayo!” Nasakitan ako sa paghunahuna nga iya akong giisip nga daot ug utok, bisan pag ang mga espesyalista nagkauyon nga ang pagkanga dili usa ka kondisyon sa pagkadaot sa utok. Wala magdugay naamgohan ko nga nag-atubang ako ug talagsaong hagit: Usa ako ka batan-ong nag-edad ug 24, ug ang tanang ubang mga pasyente maoy gagmayng kabataan.

Sa ulahi ang tanang empleyado, lakip sa sikolohista, nalangkit sa pagtabang kanako. Ilang gisulayan ang tanang butang. Kas-a, gidid-an nila ako sa pagsulti kang bisan kinsa sa lima ka semana. Sa laing higayon, ila akong gipasulti sa usa lamang ka tono ug sa hinay k-a-a-y-o. Samtang kining paagiha nakatabang, nabansagan ako niini nga Maglalamat ug Bitin tungod kay daghan ang makatulog sa panahon sa akong mga pagreport.

Nahimamat sa mga Saksi ni Jehova

Usa ka adlaw sa ting-init sa 1984, samtang naglakaw ako sa sentro sa negosyo, giduol ako sa duha ka batan-ong lalaki. Dili ang ilang panagway sa gawas ang nakapahibulong kanako kondili ang ilang gisulti. Sila miingon nga ang Diyos adunay usa ka kagamhanan, usa ka Gingharian, nga motapos sa tanang problema sa katawhan. Gihatagan nila ako sa ilang numero sa telepono, ug sa ulahi giteleponohan ko sila.

Niadtong higayona ang mga Saksi ni Jehova wala ilha ingong usa ka legal nga relihiyosong organisasyon sa Czechoslovakia. Bisan pa niana, wala magdugay naikag kaayo ako nga misugod ako sa pagtambong sa ilang mga tigom. Nabati ko ang gugma ug kabalaka sa mga Saksi alang sa usag usa.

Ang Dalan Paingon sa Pagsalig sa Kaugalingon

Miabot ang tabang sa akong depekto sa pagsulti diha sa porma nianang gitawag nga Tunghaan sa Teokratikanhong Ministeryo, usa ka tunghaan nga ginadumala matag semana sa matag kongregasyon sa mga Saksi ni Jehova. Giawhag ako nga magpalista, ug nagpalista ako. Pinasukad sa mga sugyot nga gipresentar diha sa usa sa mga libro sa tunghaan, ang Giya sa Tunghaan sa Teokratikanhong Ministeryo, gisubay ko ang mga hiyas sa pagsulti sama sa kalarino, tukmang paglitok, pagpasiugda sa diwa, ug pag-usab-usab sa tingog.a

Ang akong unang pakigpulong ingong estudyante, nga usa ka pagbasa sa Bibliya, dako gayod nga kapakyasan. Ginerbiyos kaayo ako ug naglisod ako sa pagpauli. Pagkadako sa akong pasalamat sa makaparelaks nga mga epekto sa pagkaligo sa mainit nga tubig!

Human nianang unang pakigpulong, malulotong gihatagan ako sa magtatan-aw sa tunghaan ug personal nga pagtagad. Dili lamang kay gihatagan niya ako ug makapadasig nga tambag apan iya akong gihatagan ug komendasyon. Nakahatag kadto kanakog kaisog sa pagpadayon sa pagsulay. Wala magdugay human niadto, sa 1987, nahimo akong bawtismadong Saksi. Sa milabay ang pipila ka bulan, mibalhin ako gikan sa Prague ngadto sa hilom nga gamayng lungsod sa Žďár nad Sázavou. Mainitong giabiabi ako sa gamayng lokal nga grupo sa mga Saksi. Gidawat usab nila ang akong pagkanganga gihapon, ug kadto nagpalig-on sa akong pagtahod-sa-kaugalingon.

Sa kadugayan, nagsugod ako sa pagdumala sa usa ka gamayng grupo sa pagtuon sa Bibliya, ug unya gihatag ko ang akong unang publikong pakigpulong sa Bibliya. Sa ulahi, human nabag-o ang kagamhanan sa Czechoslovakia, nagsugod ako sa paghatag ug ingon niini nga mga pakigpulong sa silingang mga kongregasyon. Sa di-pamilyar nga mga palibot mobalik ang akong depekto sa pagsulti. Apan wala ako mosurender.

Giatubang ang Talagsaong mga Hagit

Usa ka adlaw gidapit ako sa usa ka Kristohanong ansiyano sa iyang trabahoan. Siya miingon: “Petr, may maayong balita ako kanimo! Buot namo nga makigbahin ka sa umaabot nga sirkitong asembliya.” Gibati ko nga kakuyapon ug kinahanglang molingkod. Sa kahigawad sa akong higala, gibalibaran ko ang tanyag.

Natugaw ako niadto nga pagbalibad. Dili ako makawala niini sa akong hunahuna. Sa panahon sa Kristohanong mga tigom sa matag panahong hisgotan ang pagsalig sa Diyos, kadto nga pagbalibad mobalik kanako nga may kasakit. Si Gideon, kinsa pinaagi sa pagtultol sa Diyos miatubang sa tanang kasundalohang Midianhon uban sa 300 lamang ka sundalo, usahay hisgotan diha sa mga tigom. (Maghuhukom 7:1-25) Aniay usa ka lalaki nga tinuod nga nagsalig sa iyang Diyos, si Jehova! Gisunod ko ba ang panig-ingnan ni Gideon sa dihang mibalibad sa maong asaynment? Sa tinuod, dili ako makaingon nga nakasunod ako. Gibati ako ug kaulaw.

Bisan pa niana, wala mosurender ang akong Kristohanong mga igsoon sa pagtabang kanako. Gitanyagan nila ako ug laing higayon. Ako gidapit sa pagpakigbahin sa programa sa adlaw sa espesyal nga asembliya. Niining higayona misugot ako. Sa pagkaprangka, bisag mapasalamaton ako niini nga pribilehiyo, nahadlok kaayo ako sa paghunahuna sa pagsulti diha sa dakong tigomanan nga puno sa mga tawo. Kinahanglang maningkamot gayod ako sa pagpadako sa akong pagsalig kang Jehova. Apan sa unsang paagi?

Pinaagi sa mainampingong pagpalandong sa pagtuo ug pagsalig sa ubang mga Saksi kaniya. Napalig-on ako niini. Bisan ang sulat sa sayes-anyos nga si Verunka, nga anak nga babaye sa usa ka higala, nagsilbing usa ka maayong panig-ingnan alang kanako. Siya misulat: “Sa Septiyembre, moeskuyla na ako. Wala ako mahibalo kon unsa unyay problema nga atubangon ko labot sa nasodnong awit. Nagtuo ako nga si Jehova makig-away alang kanako, sama sa iyang nahimo alang sa Israel.”

Buweno, kadto maoy pipila lamang sa mga hitabo nga mitultol ngadto sa sesyon sa hapon sa adlaw sa espesyal nga asembliya nga akong gihisgotan sa sinugdan. Kinasingkasing ako nga miampo. Karon wala na kaayo ako mabalaka bahin sa akong kalarino sa pagsulti sanglit hapit na nakong pagadayegon ang dakong ngalan sa Diyos atubangan niining dakong tumatambong.

Busa didto nagtindog ako nga may mikropono nga gipatindog sa akong atubangan, nga nag-atubang sa ginatos ka tawo. Unya, nakaamgo nga ang mensahe mas importante kay sa mensahero, miginhawa ako ug lawom ug misugod. Human niadto, nakapanahon ako sa pagtimbangtimbang sa mga butang. Ginerbiyos ba ako? Oo, ug nagkanga pa gani ako sa pipila ka higayon. Bisan pa niana, kon wala ang pagpaluyo sa Diyos ako nahibalo nga dili gayod unta ako makahimo sa pagsulti.

Sa ulahi nagsugod ako sa pagpamalandong sa gisulti kas-a sa usa ka Kristohanong igsoong lalaki kanako: “Magmalipayon ka nga may depekto ka sa pagsulti.” Sa higayong gisulti niya kadto, nahibulong gayod ako. Nganong nakaingon man siya niana? Sa paghinumdom ug balik, nakasabot na ako karon kon unsay iyang buot ipasabot. Ang depekto sa pagsulti nakatabang kanako sa pagsalig sa Diyos inay sa akong kaugalingon.

Milabay ang pipila ka tuig sukad sa hapon nianang adlaw sa espesyal nga asembliya. Niining mga tuiga nakadawat ako ug ubang mga pribilehiyo labot sa pagsulti atubangan sa dakong mga tumatambong. Natudlo ako ingong Kristohanong ansiyano sa Žďár nad Sázavou ug usab ingong payunir, nga maoy pagtawag sa bug-os-panahong mga ministro sa mga Saksi ni Jehova. Hunahunaa lang! Niadtong higayona nakagugol ako ug kapin sa usa ka gatos ka oras matag bulan sa pagpakigsulti sa uban bahin sa Gingharian sa Diyos, bisag dili na hisgotan pa ang panahong nagugol ko matag semana sa pagtudlo diha sa among Kristohanong mga tigom. Ug karon nag-alagad ako ingong magtatan-aw sa sirkito, nga naghatag ug mga pakigpulong sa nagkalainlaing kongregasyon matag semana.

Ang akong kasingkasing malipayon gayod sa pagpabili sa matag panahong mabasa nako kining partikular nga tagna sa basahon sa Bibliya sa Isaias: “Bisan ang dila sa mga nganga mahimong abtik sa pagsulti sa matin-aw nga mga butang.” (Isaias 32:4; Exodo 4:12) Si Jehova tinuod gayod nga nagauban kanako, nga nagtabang kanako nga ‘makasulti sa matin-aw nga mga butang’ sa iyang kadungganan, kadayegan, ug himaya. Ako kontento kaayo ug malipayon nga makahimo na sa pagdayeg sa atong labing maluluy-ong Diyos.​—Sumala sa giasoy ni Petr Kunc.

[Footnote]