Kontrolaha ang Imong Kinabuhi Karon!
ANG panukiduki sa siyensiya sa tawhanong paggawi ug panukmod nakahatag kanato ug kaayohan sa daghang paagi. Tingali kita natabangan sa pagsagubang sa sakit pinaagi sa pagbaton ug bug-os nga pagsabot bahin niana. Sa samang higayon, maalamon nga mag-amping labot sa pinasobrahang mga teoriya, ilabina niadtong daw magkasumpaki sa malig-on na kaayong mga prinsipyo.
Bahin sa ulohan sa mga genetika ug gawi, ang mga pangutana motungha: Makahimo ba kita sa pagtalikod sa atong mga responsibilidad ug dili modawat sa tulubagon sa atong mga lihok? Kita ba makapamalibad o kaha mopasangil sa uban o ubang butang gumikan sa kadanghag o daotang buhat, busa nakig-anib sa nagtubong gidaghanon niining “dili-ako” nga kaliwatan? Dili gayod. Ang kadaghanang tawo malipayng dayegon sa bisan unsang mga kalamposan sa kinabuhi, busa nganong dili usab sila malipayng modawat sa responsibilidad alang sa ilang mga sayop?
Busa, kita mahimong mangutana, Unsay ikasulti sa Pulong sa Diyos, ang Balaang Bibliya, bahin sa kon kinsa o unsa ang nagakontrolar sa atong mga kinabuhi karon?
Unsa ang Hunahuna sa Bibliya?
Ang unang butang nga kinahanglang atong ilhon mao nga kitang tanan natawo sa sala nga napanunod gikan sa atong orihinal nga mga ginikanan, si Adan ug Eva. (Salmo 51:5) Dugang pa, kita nagkinabuhi sa usa ka linain nga panahon, nga gitawag “kataposang mga adlaw,” sa dihang ang mga tawo makaagom ug “makuyaw nga mga panahong lisod sagubangon.” (2 Timoteo 3:1) Kini nagpakita nga, sa katibuk-ang pagkasulti, makaatubang kita ug dugang mga problema sa pagpasundayag ug maayong pagkontrolar sa atong mga kinabuhi kay sa nahimo sa atong unang mga ginikanan.
Bisan pa niana, ang tanang tawo maoy mga linalang nga may kagawasan sa pagpili, nga makahimo sa ilang kaugalingong personal nga mga pagpili. Sa ingon niana nga sukod sila ang nagakontrolar sa ilang mga kinabuhi. Ingon na niini ang kahimtang sukad pa sa unang mga panahon ug makita diha sa mga pulong ni Josue ngadto sa nasod sa Israel: “Pagpili kamo alang sa inyong kaugalingon karon kon kinsa ang inyong alagaron.”—Josue 24:15.
Ang Bibliya miila nga si Satanas nga Yawa gitambog na gikan sa kalangitan ug karon, labaw pa sukad masukad, adunay kusganong impluwensiya sa pagkadaotan sa tibuok tawhanong rasa. Kini nagtug-an usab kanato nga bisan sa mga adlaw ni apostol Juan, ang tibuok kalibotan nahimutang diha sa gahom sa tuman-kadaotang usa. (1 Juan 5:19; Pinadayag 12:9, 12) Apan, maingon nga ang Labing Gamhanang Diyos wala magkontrolar sa atong matag lihok o nagbuot kanatong daan ngadto sa usa ka kataposan nga siya lamang ang nahibalo, dili gayod nato direktang pasanginlan si Satanas alang sa matag usa sa atong mga sayop o mga kapakyasan. Ang nagatimbang nga Kasulatanhong kamatuoran mao nga “ang matag usa ginasulayan pinaagig pagkaganoy ug pagkahaylo sa iyang kaugalingong tinguha. Unya ang tinguha, dihang kini makapanamkon na, magpahimugso ug sala.” (Santiago 1:14, 15) Si apostol Pablo nagsulat niining dinasig nga mga pulong: “Ayaw pahisalaag: Ang Diyos dili usa nga kayagayagaan. Kay bisan unsay ginapugas sa usa ka tawo, kini usab iyang anihon.”—Galacia 6:7.
Busa ang matag usa kanato manubag kang Jehova nga Diyos sa atong mga lihok. Magbantay gayod kita nga dili nato ipakamatarong ang atong kaugalingon gumikan sa atong genetikanhong pagkagama ug napanunod nga mga pagkadili-hingpit. Gipanilngan sa Diyos ang mapintas, homoseksuwal nga komunidad sa karaang Sodoma ug Gomora sa ilang dunot nga mga buhat. Dayag, wala niya isipa ang mga molupyo ingong makaluluoy, alaot nga mga linalang nga tungod sa pipila ka gituohang diperensiya sa mga gene dili makapugong sa pagkahimong daotan. Sa susama, ang mga tawo nga nabuhi sa mga adlaw ni Noe adunay daghang daotang mga impluwensiya nga naglibot kanila; bisan pa niana, sila kinahanglang maghimo ug pagpili, usa ka personal nga desisyon, kon buot nilang maluwas sa Lunop nga mahitabo sa dili madugay. Pipila ang mihimog hustong pagpili. Ang kadaghanan wala.
Gipamatud-an sa Hebreohanong manalagnang Ezequiel nga gikinahanglan ang pagpugong sa kaugalingon aron kita takos sa pag-uyon sa Diyos: “Mahitungod kanimo, kon ikaw nakapasidaan sa usa nga daotan ug siya dili gayod mobiya sa iyang pagkadaotan ug sa iyang daotang dalan, siya mamatay sa iyang kasal-anan; apan mahitungod kanimo, naluwas mo ang imong kaugalingong kalag.”—Ezequiel 3:19.
Ang Labing Maayong Tabang nga Mabatonan
Siyempre, kitang tanan nagkinahanglag tabang sa pagkontrolar sa atong kaugalingon diha sa atong adlaw-adlawng kinabuhi, ug alang sa kadaghanan kanato, kini maoy usa ka dako nga hagit. Apan kita dili angay mawad-an ug paglaom. Bisan tuod ang atong napanunod makasasalang kiling dili dalawaton sa Diyos, kon kita buot nga magbag-o sa atong gawi, siya motagana kanato sa labing maayong tabang nga mabatonan—ang iyang balaang espiritu ug ang iyang dinasig nga kamatuoran. Bisan pa sa bisan unsang genetikanhong pagkahilig-daan nga anaa kanato ug sa bisan unsang gawasnong mga impluwensiya nga tingalig nagaapektar kanato, kita makahimo sa ‘paghukas sa daang pagkatawo uban ang mga buhat niini, ug sul-oban ang [atong kaugalingon sa] bag-o nga pagkatawo, nga pinaagi sa tukmang kahibalo ginahimong bag-o sumala sa larawan sa Usa kinsa milalang niini.’—Colosas 3:9, 10.
Daghang Kristohanon sa kongregasyon sa Corinto mihimog dagkong mga kausaban sa ilang gawi. Ang dinasig nga rekord nagtug-an kanato: “Walay mga makihilawason, ni mga tigsimbag idolo, ni mga mananapaw, ni mga lalaking nahuptan alang sa dili-kinaiyanhong mga katuyoan, ni mga lalaking nakigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos. Ug gani ingon niana ang pipila kaninyo kaniadto. Apan kamo hinlo nang nahugasan, apan kamo nabalaan na, apan kamo napahayag na nga matarong sa ngalan sa atong Ginoong Jesu-Kristo ug sa espiritu sa atong Diyos.”—1 Corinto 6:9-11.
Busa kon kita nagapakigbisog sa atong mga pagkadili-hingpit, dili kita magpadala niini. Daghang modernong-adlawng mga Kristohanon nakapamatuod nga uban sa tabang ni Jehova, sila nakahimo sa ‘pagbag-o sa ilang kaisipan ug nagpamatuod sa ilang kaugalingon ang maayo ug dalawaton ug hingpit nga kabubut-on sa Diyos.’ Ilang ginapakaon ang ilang mga hunahuna sa bisan unsang mga butang matuod, matarong, maputli, hiligugmaon, maligdong, dalayegon; ug sila ‘padayong nagaisip niining mga butanga.’ Sila nagakaon ug magahing espirituwal nga pagkaon ug pinaagi sa paggamit niini nakabansay sa ilang mga gahom sa pag-ila sa husto ug sayop.—Roma 12:2; Filipos 4:8; Hebreohanon 5:14.
Makapadasig nga mahibalo sa ilang mga pakigbisog, sa ilang lumalabay nga mga kapakyasan, ug sa ilang kalamposan sa ulahi uban sa tabang sa balaang espiritu sa Diyos. Ang Diyos nagpasalig kanato nga ang pagbag-o sa atong gawi sagad naglangkit sa kasingkasing ug sa pangibog niini: “Sa dihang mosulod ang kaalam sa imong kasingkasing ug ang kahibalo makapahimuot sa imong kalag, ang katakos sa panghunahuna magabantay kanimo, ang pagsabot magapanalipod kanimo, sa pagluwas kanimo gikan sa dalan nga daotan.”—Proverbio 2:10-12.
Busa, kon buot mo nga mahimong tumong sa imong kinabuhi ang kinabuhing walay kataposan—kinabuhi nga walay mga suliran sa daotang kalibotan ug libre sa makapaluya nga mga pagkadili-hingpit—‘panlimbasog’ sa pagkontrolar sa imong kinabuhi karon ug pagpagiya sa langitnong kaalam. (Lucas 13:24) Pahimusli mismo ang tabang sa balaang espiritu ni Jehova aron makapatungha ka sa bunga sa pagpugong-sa-kaugalingon. Himoa nga maoy tumong sa imong kasingkasing ang pag-agak sa imong kinabuhi nga mahiuyon sa kasugoan sa Diyos, ug patalinghogi ang tambag: “Labaw sa tanang butang nga pagabantayan, bantayi ang imong kasingkasing, kay gikan niini mao ang mga tuboran sa kinabuhi.” (Proverbio 4:23) Ang paghawid sa “tinuod nga kinabuhi” diha sa bag-ong kalibotan sa Diyos—diin ayohon ni Jehova nga Diyos ang tanang mga diperensiya sa mga gene pinasukad sa halad lukat ni Jesu-Kristo—takos sa tanang mga paningkamot nga imong pagahimoon sa pagkontrolar sa imong kinabuhi niining kalibotana!—1 Timoteo 6:19; Juan 3:16.
[Hulagway sa panid 9]
Ang pagtuon sa Bibliya makahatag kanato ug kusog sa pagbuntog sa dulot nga pagkatisok nga mga kahuyangan
[Hulagway sa panid 9]
Ang pagtuon sa Bibliya makatabang kanato sa pagpabiling maunongon sa mga sukdanan sa Diyos sa moral