Gikan sa Among mga Magbabasa

Pagsalig Gibati ko nga nabug-atan tungod kay gibudhian sa pipila ka higala ug mga paryente. Nagsugod ako sa pagduhaduha sa pagkakasaligan sa tanang nakapalibot kanako. Apan ang seryal nga “Kinsay Imong Kasaligan?” (Pebrero 8, 1996) naghatag kanako ug mas timbang nga panglantaw sa pagsalig. Salamat alang sa maong tukma sa panahong impormasyon.

E. I., Korea

Sa daghang katuigan, nasinati ko nga gibudhian sa akong amahan, nga nag-abuso kanako, sa duha ka bana, ug sa usa ka Kristohanong igsoong lalaki. Nakaabot ako sa punto diin ako mihukom sa dili pagsalig kang bisan kinsa. Gikombinsir ko ang akong kaugalingon nga wala ko kinahanglana ang mga tawo. Apan ang artikulo nagtabang kanako nga mahimong mas timbang. Bisag malisod kaayo alang nako nga mosalig, ako nagpadayon sa pagpaningkamot. Niining panahona ako mas mainampingon na kon kinsay akong pagasaligan.

C. H., Tinipong Bansa

Matterhorn Gibasa ko ang artikulong “Ang Talagsaong Matterhorn.” (Pebrero 8, 1996) Ang larawan niining maanindot nga bukid nakadani gayod sa akong pagtagad! Ang artikulo nagpaapresyar pa kanako ug dugang sa kalalangan sa Diyos.

J. W., Tinipong Bansa

Mga Mansanas Salamat gayod kaayo sa artikulong “Ang Usa ka Mansanas Kada Adlaw Magpahilayo sa Doktor.” (Pebrero 8, 1996) Nakatukbil kini sa akong pagtagad, sanglit kami may kapin sa 100 ka punoan sa mansanas diha sa among gamayng umahan. Nalingaw kami sa pagpul-ong ug paglimpiyo niining mga kahoya aron makabungag maayo. Gipabilhan namo ang katukma sa tanan ninyong mga artikulo. Kini nagtaganag makapalagsik, kasaligang impormasyon.

P. B., Tinipong Bansa

Mapugsanong Panggawi Salamat sa maayo kaayong artikulo nga “Mapugsanong Panggawi​—Gigamhan ba Niini ang Imong Kinabuhi?” (Pebrero 8, 1996) Ako 20 anyos lamang, ug nag-antos ako sa mapugsanong panggawi. Subsob ko nga gihangyo si Jehova pinaagi sa pag-ampo nga magpadala kanakog impormasyon bahin sa nahitabo kanako.

M. A. C., Espanya

Nagsugod ako sa pagkatugaw sa dili-kinabubut-on, dili-matinahurong mga hunahuna bahin sa Diyos sa panahong nagsugod ako sa pagpayunir, nga nag-alagad ingong usa ka bug-os panahong magsasangyaw. Nagtuo ako nga nakahimo na akog dili mapasaylo nga sala, ug kanunay akong naghilak. Dili mo mahanduraw kon unsa nay akong gibati karon, nga nakitang gihubit nga tin-aw kaayo ang akong mga pagbati. Wala ako maghunahuna nga adunay ubang tawo nga nag-antos niini. Salamat, mga igsoon, nga kamo kanunayng anaa alang kanamo.

C. B., Nigeria

Gibasa ko ang artikulo nga sublisubli, nga naghilak. Naghubit kini kanako nga detalyado kaayo! Nahibulong ako kon nabuang na ba ako o kon ang mga demonyo migahom sa akong hunahuna. Makahupay ang pagkasayod nga ang uban taliwala sa mga igsoon nag-antos sa samang kakulian.

K. T., Hapon

Ako midangop kanunay kang Jehova alang sa tabang niini nga problema. Apan mihukom ako sa pag-undang tungod kay gibati ko nga kawang kini ug nga walay makatabang kanako. Karon ako nakasabot sa akong kaugalingon, ug gibati ko nga nahupayan. Nakita ko nga ang artikulo gisulat nga mahigugmaon kaayo. Segurado ako nga si Jehova nagatagad gayod kanato.

J. F., Republika sa Czech

Gihasol ako pag-ayo sa mapugsanong mga hunahuna sulod sa pito ka tuig na karon. Kini naghatag kanakog maluya ug masulub-ong pagbati. Gibati ko gayod ang kaulaw ug pagkasad-an sa paghisgot niini ngadto kang bisan kinsa. Nagtuo gayod ako nga ako nabuang na. Sa dihang gibasa ko kining artikuloha, dili ako makatuo niini. Adunay laing tawo ang nakasinati sa akong nasinati! Ang mga luha mitulo sa akong mga mata. Wala na ako mag-inusara. Wala ako makahimog dili mapasaylo nga sala, ug si Jehova wala masuko kanako.

S. B., Habagatang Aprika