Gikan sa Among mga Magbabasa
Paglipaylipay Ako 12 anyos, ug nalingaw gayod ako sa artikulong “Mga Batan-on Nangutana . . . Nganong ang Ubang mga Kabataan Makahimo sa Tanang Paglipaylipay?” (Hulyo 22, 1996) Kaniadto nakapangutana ako sa mao gihapong pangutana. Sa akong tunghaan ang usa ka tawo mahimong magpalista alang sa mga salosalo, mga sayaw, ug ubang mga kalihokan. Kasagaran buot nakong moadto. Apan ang artikulo nakatabang kanako sa pagsabot nga ako manubag kang Jehova sa mga pagpili nga akong himoon. Busa suod akong makig-uban sa akong Kristohanong mga higala.
A. S., Tinipong Bansa
Dihay mga panahon nga akong nasinati ang gibati ni Asap [magsusulat sa Bibliya], ingon sa inyong gihisgotan sa artikulo. Kining artikuloha naghatag kanako ug dugang kusog nga akong gikinahanglan sa tunghaan.
A. S., Hapon
Tinuod nga ang pipila ka batan-on mobati gayod nga sinalikway o hinikawan tungod kay sila wala “tugoti” sa pag-apil sa kalibotanong mga salosalo. Apan dili ang tanang anak sa mga Saksi ni Jehova ang mibati nga ingon niana! Sa akong bahin, ako nayugot sa daghang butang nga nagakahitabo diha sa kalibotanong mga salosalo, ug ang akong Kristohanong mga higala mibati sa samang paagi. Kami—ug sa walay duhaduha daghang uban pa—wala mobating gihikawan!
C. H., Tinipong Bansa
Brewery Gulch Ako nagsulat aron suginlan kamo nga nalingaw ako pag-ayo sa artikulong “Nanubo ang Espirituwal nga mga Bulak Gikan sa Brewery Gulch.” (Hulyo 22, 1996) Nagpahinumdom kini sa daghang kahibulongang mga handomanan sa 21 ka bulan nga akong gigugol didto katuigan kanhi. Ako nahilayo sa balay sa unang higayon. Ang pipila sa mga pamilya nga inyong gihisgotan diha sa artikulo—ang mga Smith, mga Griffin, ug mga Pugh—nahimong samag mga inahan, mga amahan, mga iyaan, ug mga uyoan nako. Sila mitabang kanako nga mohamtong ingong Kristohanon. Gumikan sa pagbasa sa artikulo nangandoy ako nga mahibalik uban kanila. Nahinumdoman ko silang tanan uban ang dulot nga gugma ug apresasyon.
P. A., Tinipong Bansa
Mga Dahon sa Balanghoy Salamat sa artikulong “Mga Dahon sa Balanghoy—Matag-Adlawng Pagkaon Alang sa Minilyon.” (Hulyo 8, 1996) Sa Aprika gipabilhan pag-ayo ang balanghoy tungod kay kini maoy among pangunang pagkaon sulod sa kasiglohan. Hinunoa, sa Nigeria diyutay lang ang among nasayran bahin sa mga dahon sanglit ang mga unod sa gamot ang nagtagana kanamo sa among paboritong mga pagkaon, sama sa gari ug foo-foo. Makapaikag ang pagkahibalo nga sa ubang bahin sa kalibotan, ang mga dahon gigamit dili lamang ingong tambal kondili alang sa lamiang mga pagkaon. Salamat kang Jehova tungod sa paghimo sa balanghoy!
J. S. E., Nigeria
Lain na nga mga Butang ang Giuna Kinahanglan ko kamong sultihan nga nadasig gayod ako sa artikulong “Kon Nganong Lain na nga mga Butang ang Iyang Giuna.” (Hulyo 22, 1996) Nag-alagad ako ingong bug-os-panahong ebanghelisador sulod sa kapin sa 13 ka tuig, ug ang pagpili kon unsay butang nga unahon dili kanunayng sayon sa atong nagakapit-os nga kalibotan. Kada tuig, ang pagpabilin sa bug-os-panahong ministeryo nahimong labi pang mahagiton. Ang paghunahuna nga si Jeremy mibiya sa usa ka magantihong karera ingong tigbantay sa usa ka luna nga gipanalipdan ang kinaiyahan aron mahimong bug-os-panahong ministro nagpasalig pag-usab kanako nga ang pag-una sa ministeryo diha sa akong kinabuhi takos gayod sa paningkamot.
N. C., Tinipong Bansa
Tamboanan sa Tagoangkan Di pa dugay nahibaloan nako nga ako nagsabak. Tungod sa sayop nga medikal nga paagi, dihay kapeligrohan nga ang akong anak makabaton ug mga depekto sa pagkatawo. Ang inyong artikulong “Usa ka Tamboanan sa Tagoangkan” (Agosto 8, 1996) nakatabang kanako sa paghukom nga dili ipakuha ang akong bata. Akong nadawat ang magasin usa ka semana una ko masayri nga nagsabak ako.
M. C., Tinipong Bansa
Dyslexia Daghang salamat sa inyong artikulong “Pagbuntog sa Kapakyasan sa ‘Dyslexia.’” (Agosto 8, 1996) Sa tibuok kong kinabuhi ako nahibalo nga aduna akoy diperensiya, apan wala gayod ako mahibalo kon unsa. Di pa dugay gidayagnos ako ingong may dyslexia sa usa ka espesyalista sa Attention Deficit Disorder. Karon ako nagtuon sa paggamit sa akong mga tudlo ingong tabang sa pagbasa.
P. C., Tinipong Bansa