Usa ka Komunidad nga Tinukdan

Sinulat sa koresponsal sa Pagmata! sa Benin

“ANG Ganvié maoy usa sa pangunang mga atraksiyon sa turista sa Benin,” matod pa sa usa ka giya sa pagbiyahe ngadto sa Kasadpang Aprika. Matod pa sa lain: “Ang mga Aprikano mismo mahinam sa Ganvié; makakita ka ug daghang turistang Aprikano nga sama ka daghan sa mga taga-kasadpan.”

Tagsaon gayod ang Ganvié. Usa kini ka balangay sa 15,000 ka lumolupyo nga natukod sa mga tukon ibabaw sa katubigan sa Lake Nokoué, amihanan sa Cotonou, Benin. Walay mga bisikleta, mga kotse, mga aseras, ug kadalanan sa Ganvié. Kon ang mga molupyo buot moadto sa tunghaan, sa tiyanggihan, sa klinika sa panglawas, sa balay sa silingan, o bisan asa, mokatkat sila ngadto sa sakayan nga kinulit gikan sa kahoyng iroko.

Ang kadaghanang pamilya adunay daghang sakayan—usa alang kang Papa, usa kang Mama, ug usahay usa alang sa mga anak. Sayo nga makakat-on ang mga bata sa pagbugsay. Sa pagka-singko anyos, ang usa ka bata makapamangka na nga mag-inusara. Sa di-madugay masaligon na kaayo siyang motindog sa sakayan nga molabay ug gamay nga pukot. Ang ubang kabataan malipay nga mopasundayag alang sa mga bisita sa pagtindog pinaagi sa ulo diha sa ilang mga sakayan.

Sa naglutaw nga tiyanggihan sa Ganvié, ang mga negosyante, kasagaran mga babaye, manglingkod sa ilang mga sakayan uban sa ilang mga paninda nga natapok sa ilang atubangan—mga panakot, prutas, isda, medisina, sugnod, serbesa, o bisan gani mga radyo. Nalandongan sa kainit sa adlaw pinaagi sa ilang dagko lagpad nga mga kalong uhot, mamaligya sila niadtong mamugsay sa ilang mga sakayan aron mopalit. Usahay ang mga tindera maoy batan-ong mga babaye. Ayaw pailad sa ilang edad! Sayo silang nakakat-on sa arte sa negosyante sa inantigong paghangyoay.

Samtang mamalit ug mamaligya ang mga babaye sa tiyanggihan, ang mga lalaki puliki sa pagpangisda, o pagbuhig isda aron mas tukma. Ang ilang paagi sa pangisda naglakip sa pagtusok ug ginatos ka sanga ngadto sa lapokong linaw sa ilalom, nga makahimog baga nga lasang sa mga tugsok. Ang isda maningaon sa nagkadunot nga mga sanga. Human sa pipila ka adlaw ang mga lalaki mamalik dala ang ilang mga pukot aron anihon ang mga isda.

Gikan sa Tagoanan Ngadto sa Pagkahimong Atraksiyon sa Turista

Ang Toffinu sa Ganvié dili kanunay “Katawhan sa Tubig,” ingon sa ilang pagkanailhan karon. Sayo sa ika-18ng siglo, mikalagiw sila ngadto sa mga lanaw ug kalamakan aron moikyas sa paglutos sa usa ka silingang Aprikanhong gingharian. Ang mga eskolar nag-ingon nga ang ngalang Ganvié nagbanaag niining kasaysayana, sanglit kay sa sinultihang Toffin, ang pulong gan mahubad nga “naluwas ta” ug ang pulong vie nagkahulogang “komunidad.” Busa, ang ngalan niining kaulohan sa balangay sa lawa maingon natog hubad nga “ang komunidad sa katawhan nga sa kataposan nakakaplag ug kalinaw.”

Ang pag-ikyas sa kalamakan palibot sa Lake Nokoué maoy usa ka epektibong estratehiya, tungod kay ang relihiyosong pagtuo sa kaawayng gingharian dili magtugot kang bisan kinsang sundalo nga motahak ngadto sa tubig o mga dapit nga lagmit mabahaan. Busa ang lawa nakataganag panginabuhian ug dapit dalangpanan batok sa kaaway. Kahimut-anan nga kining karon iladong komunidad, nga panonpanong turista moduaw sakay sa mga bangkang de-motor, kanhi usa ka tagoanang dapit.