Mga Bihag Kami Panahon sa Usa ka Pag-alsa sa Prisohan

SA MGA alas tres ang takna sa kahaponon, sa Sabado, Marso 30, 1996, si Edgardo Torres, Rubén Ceibel, ug ako miabot sa Sierra Chica Maximum Security Prison, sa probinsiya sa Buenos Aires, Argentina. Gidisenyo sa paghupot ug mga 800 ka binilanggo, kining naghuot nga kuta nagpriso sa 1,052 ka kombiktadong mga kriminal. Ang ilang mga krimen naggikan sa pagpangawat ngadto sa sunodsunod nga pagbuno. Didto kami ingon nga mga bisita.

Alang kang Edgardo ug Rubén, usa kini sa daghang biyahe sa matag Sabado ngadto niining iladong prisohan. Ingong mga ansiyano sa lokal nga kongregasyon sa mga Saksi ni Jehova, regular silang nagduawan didto aron sa paghatag ug senemanang pakigpulong sa Bibliya sa mga 15 ka binilanggo. Alang kanako, nga usa ka nagapanawng magtatan-aw, usa kadto ka tagsaong kahigayonan, kay wala pa ako makadumala ug tigom sa prisohan.

Ang prisohan adunay 12 ka pundok sa selda nga gidisenyong samag paypay. Sa dihang kami misulod sa pasilidad, among nakita sa unahan ang upat ka binilanggo nga nangamay kanamong mainiton. Kining mga binilanggoa miuswag sa ilang pagtuon sa Bibliya ngadto sa punto sa pagkahimong di-bawtismadong mga magsasangyaw sa maayong balita sa Gingharian sa Diyos. Gikuyogan dayon kami ngadto sa pundok sa selda 9, diin adto namo himoon ang tigom. Didto, usa ka lawak ang gipinturahan ug gidayandayanan sa mga kortina, nga nakapahimo niining hapsay tan-awon.

Ang Pag-alsa Misugod

Apan, katingad-an kadto. Diha lamay 12 ka binilanggo nga mitambong inay sa kasagarang 15. Natingala kaming tanan kon ngano. Ang tigom misugod ingon sa naandan, pinaagi sa awit ug pag-ampo. Human sa pipila ka minuto, nahipugwat kami sa kusog nga butobuto sa pusil nga gisundan sa pagrakrak sa masinggan. Dayon among nadunggan ang sininggitay ug tiniyabaw. Ang pag-alsa sa bilanggoan misugod na!

Daghang tinabonan-ang-nawong nga binilanggo nga armadog inayom-ayom nga mga kutsilyo mibutho sa among gitigomang lawak. Natingala sila sa pagkakita kanamo​—tulo ka bisita! Gikuyogan dayon kami latas sa napuno-sa-asong agianan. Dihay nangasunog nga mga kutson, nagkaguliyang nga mga binilanggo, ug usa ka samdang guwardiya nga nagbuy-od sa salog. Ang torre sa guwardiya nga nahimutang sa tunga sa nataran sa bilanggoan nagdilaab gumikan sa hinimong bomba. Gidala kami sa gawas ug gipugos sa pagpatindog sa mga 50 metros gikan sa koral sa atubangan. Sa pagtan-aw sa unahan, among nakita ang mga polis ug mga guwardiya sa bilanggoan sa gawas sa koral, nga nagpunting sa ilang mga pusil ngari kanamo. Usa ka grupo sa mga binilanggo nagpasalipod kanamo, nga nagtion sa ilang mga kutsilyo sa among mga tutunlan. Gigamit nila kami ingong tawhanong mga taming.

Dugang Pang mga Bihag

Lima ka oras sa ulahi, human sa pagsalop sa adlaw, ang mga pangulo sa kagubot mitugot ug usa ka medikal nga doktor nga makasulod sa prisohan aron motambal sa mga nasamdan. Ang doktor usab nahimong bihag. Sa kataposan, sa mga alas nuybe sa gabii, gidala kami sa ospital sa prisohan. Didto miipon kami sa usa ka grupo sa mga guwardiya nga gidakop usab ingong mga bihag. Karon ang mga tigrayot mipugos sa tanang bihag nga magpulipuli ingong tawhanong mga taming.

Wala madugay, usa ka huwes ug iyang sekretaryo gitugotan sa pagpakigtagbo sa mga tigrayot, sa pagsulay nga husayon ang hitabo sa malinawong paagi. Apan ang krisis misamot sa dihang ang mga binilanggo sa kalampingasan midakop kanila ingong mga bihag.

Dihay panagsang pinusilay sa tibuok gabii. Misulay kami sa pagkatulog, apan maorag matag panahon nga kami mahitagpilaw, mahipugwat kami sa pagtagpilaw sa kusog nga singgit. Dayon, sa sayo kaayong mga takna sa kabuntagon, mao na usab ang among turno sa pagbarog ingong buhing mga taming.

Ang Kapintasan Misamot

Sa Dominggo, Marso 31, ikaduhang adlaw sa pag-alsa, migrabe pa ang kahimtang. Ang mga pangulo sa kagubot wala makauyon sa ilang mga gipangayo. Nakaduslit kini sa atmospera sa kasuko ug kapintasan. Ang mga grupo sa mga nagrayot mihimog kaguliyang, nga nagdaot ug nagsunog sa tanang butang sa ilang mga agianan. Ang dugay nang mga panagbingkil gihusay pinaagig kapintasan ug pagbuno. Gipamatay ang ubay-ubayng binilanggo nga midumili sa pag-apil sa rayot. Pipila ka lawas gisunog sa hurnohan sa tinapay.

Ang tanang matang sa hulungihong ug nagkasumpaking mga taho bahin sa pagpagawas kanamo mikaylap sa prisohan. Makuyaw kaayo kadto alang kanamong mga bihag. Usahay tugotan kaming motan-aw ug balita sa telebisyon. Nakurat kami sa pagkakitang layo ra sa tinuod ang mga taho sa telebisyon. Makapaluya kadto.

Giunsa namo paglahutay? Gitumong namo ang pag-ampo, pagbasa sa Bibliya, ug pagsulti ngadto sa uban bahin sa mga saad sa Bibliya sa malipayong umaabot. Mao kadto ang sekreto sa among emosyonal nga kalig-on sa panahon sa kalisdanan.

Sa pagka-Lunes, ang mga pangulo sa kagubot miuyon nga sugdan ang pagpakigsabot uban sa mga awtoridad. Maorag ang kataposan sa pag-alsa haduol na. Ang mga tigrayot migamit kang Edgardo ug daghan pang mga guwardiya sa prisohan ingong mga taming dihang miulbo ang pinusilay tali sa pipila ka binilanggo. Sa misunod nga kaguliyang, ang kapolisan, sa pagtuo nga gipamusil ang mga bihag, mipabuto sa ilang mga pusil. Wala maigo si Edgardo sa nagpungasi nga mga bala, apan napusilan ang pipila ka dinakpang guwardiya.

Kamatayon Daw Dili Kapugngan

Gidala kaming mga bihag ngadto sa atop aron ipakita sa mga awtoridad nga kami buhi pa. Apan nagpadayon sa pagpamusil ang mga polis. Nakapapungot kini sa mga tigrayot. Nagdungan pagpaninggit ang matag usa. Ang pipila misinggit: “Patya ang mga bihag! Patya sila!” Ang pipila nangamuyo: “Ayaw una! Maghulat ta!” Ang kamatayon daw dili kapugngan. Nagtinan-away mi ni Rubén nga daw nag-ingon, ‘Hangtod sa bag-ong kalibotan.’ Dayon hilom kaming miampo. Dihadiha, mibati kamig sulodnong kakalma ug kalinaw sa hunahuna, nga, ubos sa maong mga kahimtang, naggikan lamang kang Jehova.​—Filipos 4:7.

Sa kalit, mihunong sa pagpamusil ang mga polis, ug usa sa mga pangulo sa kagubot mikanselar sa pagpapatay kanamo. Ang batan-ong binilanggo nga naggunit kanako gimandoan nga ipasopaso ako sa atop, ingong pasidaan sa mga polis. Hilabihan ang iyang kakuyaw. Dihadiha mismo, nakasugod akog panaghisgot nga nakapakalma kanamong duha. Akong gisaysay nga gisugniban ni Satanas ug sa iyang mga demonyo ang tawhanong pag-antos ug sa dili madugay taposon ni Jehova nga Diyos ang tanang pag-antos.​—Pinadayag 12:12.

Sa dihang gibalik kami sa ospital sa prisohan, among nakaplagan nga daghan sa mga bihag nalisang pag-ayo. Misulay kami sa pagpakig-ambit sa among pagtuo sa mga saad ni Jehova uban sa among isigkabihag. Nakigsulti kami kanila bahin sa among pinasukad-sa-Bibliyang paglaom sa umaabot sa Paraiso sa yuta. Pipila sa mga bihag misugod sa pagsangpit sa ngalan ni Jehova. Nagpakitag linaing interes ang doktor ug misuknag pipila ka espesipikong pangutana. Mitultol kadto sa taas nga panaghisgot sa Bibliya ginamit ang librong Kahibalo nga Motultol sa Kinabuhing Walay Kataposan.

Pagsaulog sa Memoryal

Martes, ikaupat ka adlaw sa among pagkabihag, mao ang anibersaryo sa kamatayon ni Jesu-Kristo. Nianang adlawa minilyon sa mga Saksi ni Jehova ug interesadong mga tawo sa tibuok kalibotan magtigom aron handomon kining hitaboa sa pagsunod sa sugo ni Jesus. (Lucas 22:19) Naghimo usab kamig mga kahikayan sa pagsaulog sa Memoryal.

Usa ka kanto sa lawak gipili alang sa pribasiya. Walay tinapay nga walay lebadura o pulang bino aron magamit ingong mga emblema. Apan kaming tulo nakapahimulos sa pag-awit ug mga pagdayeg kang Jehova, pag-ampo, ug pagsubli sa asoy sa Bibliya bahin sa kataposang gabii ni Jesus ug uban pang mga hitabo nga naglibot sa iyang kamatayon. Mibati kaming suod kaayo sa among mga pamilya ug sa among espirituwal nga mga igsoong lalaki ug babaye samtang dungan nilang gisaulog ang Memoryal sa tibuok nasod.

Ang Kalisdanan Natapos

Ang atmospera sa kakuyaw, kahadlok, ug kakulba nagpadayon sa misunod nga upat ka adlaw. Apan, nahupayan kami sa daghang sulat gikan sa kaparyentehan ug mga higala, nga gitugot sa mga binilanggo nga among madawat. Sa usa ka okasyon gitugotan gani kami sa pagpakigsulti sa among mga pamilya pinaagig telepono. Pagkamakapahupay kadto nga madunggan ang ilang mga tingog ug pagbasa sa ilang mga ekspresyon sa gugma ug kabalaka!

Sa Sabado, ikawalo ka adlaw sa among pagkabihag, nagkasabot ang mga tigrayot ug mga awtoridad. Giingnan kami nga pagkasunod adlaw kami pagawason na. Dominggo, Abril 7, sa alas 2:30 sa hapon, among nadawat ang balita: “Pangandam sa pagbiya!” Ang mga binilanggo miorganisar ug ‘guwardiya de honor’ aron ihatod kami ngadto sa kagawasan! Samtang mibiya kami sa ospital, ang tigpamaba sa mga pangulo sa kagubot miduol kang Edgardo ug miingon: “Igsoon, nakadayeg ako pag-ayo sa imong panggawi. Akong isaad nga gikan karon ako motambong na sa inyong mga tigom sa Sabado sa prisohan. Magtigom gihapon kamo diri bisan human sa nahitabo, dili ba?” Mipahiyom si Edgardo ug mitubag: “Siyempre!”

Usa ka sorpresa nagpaabot kanamo sa gawas. Paggawas gilayon namo sa tinukod, ang tibuok populasyon sa mga piniriso mihugyaw sa pagpamakpak sa pagpasidungog kanamo. Paagi nila kadto sa pagpakita nga sila nasubo kon unsay nahitabo. Makapatandog kadtong gutloa. Sa walay duhaduha ang among Kristohanong panggawi sa miaging siyam ka adlaw nakapadayeg kanilang tanan, sa kadungganan ni Jehova.

Sa gawas sa koral sa prisohan, among gisugat ang among mga pamilya ug mga 200 sa among espirituwal nga mga igsoong lalaki ug babaye. Nagginaksanay kami sa usag usa sa dakong pagbati sa kahupayan. Nakalabang kaming buhi! Usa sa mga bihag miduol sa akong asawa ug miingon kaniya: “Sa akong hunahuna gitandog ni Jehova ang akong kasingkasing ug buot nga ako mosimba kaniya.”

Si Edgardo, Rubén, ug ako nakakat-on sa espesyal kaayong paagi nga si Jehova makapalig-on sa iyang mga alagad, bisan sa labing makalilisang nga kalisdanan. Among nasinati kon unsa ka kahibulongan nga moampo kang Jehova ug dunggon niya. Sama sa salmista, kami makaingon: “Pagadayegon ko ikaw, Oh Jehova, kay ikaw nagsapnay kanako ug wala nimo tugoti ang akong mga kaaway nga magmaya ibabaw kanako. Oh Jehova nga akong Diyos, ako mituaw kanimo alang sa tabang, ug ikaw miayo kanako. Oh Jehova, imong gikuha ang akong kalag gikan sa Sheol mismo; gihuptan nimo akong buhi, aron ako dili manaog ngadto sa bung-aw.” (Salmo 30:1-3)​—Sumala sa giasoy ni Darío Martín.

[Blurb sa panid 19]

Daghang tinabonan-ang-nawong nga mga binilanggo nga armadog inayom-ayom nga mga kutsilyo mibutho sa among gitigomang lawak

[Blurb sa panid 20]

Ang mga tigrayot migamit kang Edgardo ug daghang guwardiya sa prisohan ingong mga taming

[Blurb sa panid 21]

Ang mga binilanggo miorganisar ug ‘guwardiya de honor’ aron ihatod kami ngadto sa kagawasan!

[Hulagway sa panid 18]

Ang tulo ka nagaduawng mga ministro (wala patuo): Edgardo Torres, Rubén Ceibel, ug Darío Martín