Mga Magmamantala sa Gingharian Nagtaho
Pagpakaylap sa Binhi sa Gingharian sa Matag Okasyon
ANG Pulong sa Diyos, ang Bibliya, nagdasig ug kamanggibuhaton. Si Haring Solomon miingon: “Sa buntag ipugas ang imong binhi ug hangtod sa gabii ayaw papahulaya ang imong kamot; kay wala ka masayod kon hain niini ang motubo, dinhi ba o didto, o kini bang tanan mahimong sama nga maayo.”—Ecclesiastes 11:6.
Sa matag tukmang okasyon, ang mga Saksi ni Jehova nagpugas ug “binhi” pinaagi sa pagsangyaw sa maayong balita sa Gingharian sa Diyos. Sa kapin sa 230 ka kayutaan ug mga grupo sa isla, sila nagpadayong “walay hunong sa pagpanudlo ug sa pagpahayag sa maayong balita bahin sa Kristo, si Jesus.” (Buhat 5:42) Ang mosunod nga mga kasinatian nag-ilustrar kon sa unsang paagi ang mga Saksi ni Jehova ‘wala magpapahulay sa ilang kamot’ diha sa pagsangyaw nga buluhaton.
Sa Republika sa Cape Verde, usa sa mga Saksi ni Jehova naglakaw ubay sa usa ka prisohan samtang nakig-ambit diha sa ministeryo sa kanataran. Sa nataran sa prisohan, ang pipila ka binilanggo naglingkod diha sa usa ka kahoy. Nakamatikod sa Saksi sa ubos, ang mga binilanggo nangayog pipila ka magasin. Gihigot sa Saksi ang pipila ka magasing Bantayanang Torre ug Pagmata! sa usa ka bato ug milabay niana ngadto sa sulod sa paril sa prisohan. Ingong resulta niining pasiunang interes, 12 ka panagtuon sa Bibliya ang nasugdan. Tulo sa mga binilanggo ang nagpahinungod sa ilang mga kinabuhi ngadto sa Diyos ug gitanyag ang ilang kaugalingon alang sa bawtismo sa tubig. Usa sa mga binilanggo nag-alagad na ingong bug-os-panahong ebanghelisador, o payunir, sa kapin na karon sa usa ka tuig. Apan, giunsa man nila paghimo ang buluhaton sa pag-alagad sa kanataran sa prisohan? Una ang prisohan gibahin ngadto sa mga teritoryo. Dayon ang teritoryo gihatag ngadto sa tulo ka Saksi ug nagkobre niana matag selda. Kini nga mga magwawali sa Gingharian nagpaloap sa interes nga susama gayod sa paagi nga ginahimo sa mga Saksi ni Jehova sa tibuok kalibotan—pinaagig mga pagbalikduaw. Usa ka kalainan, hinunoa, mao ang kasubsob nga niana ang mga panagtuon sa Bibliya ginahimo. Inay himoon ang pagtuon sa Bibliya nga kausa o kaduha sa usa ka semana sa usa o kapin sa oras, ang pipila ka binilanggo nagtuon matag adlaw! Dugang pa, ang mga Saksi gihatagag permiso sa direktor heneral sa prisohan sa pagdumala sa tanang tigom sa kongregasyon sulod sa prisohan.
Usa ka babaye sa Portugal nakapanunod ug daghang publikasyon sa Watch Tower human sa kamatayon sa iyang lola. Sanglit siya dili usa sa mga Saksi ni Jehova, wala siyay interes sa paghupot sa mga basahon. Apan, dili niya buot nga daoton kini. Usa ka adlaw iyang giingnan ang usa sa mga Saksi ni Jehova nga miduaw kaniya diha sa pultahan-sa-pultahan nga ministeryo bahin sa librarya. Ang Saksi nagsukna kaniya kon nasayod ba siya sa tinuod nga bili sa librarya. Ang babaye mitubag: “Ang tinuod, wala ako masayod sa tinuod nga bili niini, apan unsaon man nako pagkasayod?” Ang babaye midawat ug pagtuon sa Bibliya, ug sa wala madugay iya nang gipakabahandi ang librarya sa iyang lola. Karon siya usab usa na ka bawtismadong Saksi ni Jehova. Dugang pa, ang iyang anak nga babaye ug usa ka suod nga higala sa pamilya nagatuon na usab sa Bibliya. Pagkabililhong kabilin niini nga koleksiyon sa mga basahon!