“Inyong Nausab ang Akong Impresyon sa mga Saksi ni Jehova”
INGON niana ang reaksiyon sa usa ka Polakong opisyal sa prisohan bahin sa artikulo mahitungod sa buluhaton sa mga Saksi ni Jehova, nga gitaho diha sa among Oktubre 15, 1998, nga gula. Ang artikulo, “Sa Dihang ang Matig-ang mga Kasingkasing Mahimong Masanongon,” nagtaho sa kalamposan nga nahimo sa mga Saksi ni Jehova sa pagtabang sa mga piniriso sa Wołów, Polandia.
Sa wala pa mapagawas sa publiko ang gihisgotan sa ibabaw nga magasing Bantayanang Torre, gihikay ang usa ka linaing miting aron ihatag kini sa mga piniriso sa Septiyembre 13, 1998, sa bilanggoan sa Wołów. Kadtong gidapit sa pagtambong naglakip sa lokal nga mga Saksi, bawtismado ug ubang interesadong mga piniriso, ug pipila ka opisyales sa bilanggoan. Ang mosunod mao ang pipila ka komento niadtong mitambong.
Si Jerzy, usa sa mga Saksi ni Jehova nga gibawtismohan sa prisohan kapin sa lima ka tuig kanhi, nag-ingon: “Nalipay ko kaayo, tungod kay akong nabasa karong adlawa ang bahin sa dakong paningkamot nga nahimo sa mga igsoon sa duol nga mga kongregasyon aron sa pagtabang kanamo.” Siya midugang: “Padayon akong naningkamot sa pagpauswag sa akong kaugalingon, ug akong makita kon sa unsang paagi si Jehova nagaumol kanako.”
Ang laing piniriso, nga ginganlag Zdzisław, miingon mahitungod sa buluhatong pagsangyaw diha sa prisohan: “Sa pagkakaron, upat ka piniriso ang nangandam alang sa bawtismo, ug ang bag-ong interesadong mga tawo padayong nagtambong sa mga tigom sa among tigomanan. Kining artikuloha maoy usa ka kusganong panukmod kanamo alang sa dugang kalihokan niini nga natad.” Pagkapositibong tinamdan, kon isipon nga si Zdzisław may 19 pa ka tuig nga igugol sa prisohan!
Human mabasa ang artikulo bahin sa bilanggoan sa Wołów, usa ka opisyal sa prisohan nag-ingon: “Kami ilabinang napasidunggan. Wala gayod ako maghunahuna nga kining maong bilanggoan makadawat ug ingon nianang positibong publisidad diha sa 130 ka pinulongan sa kalibotan. Nakaangay ako kaninyo, ug akong gipabilhan ang inyong mga paningkamot alang sa mga piniriso.” Laing opisyal midugang: “Inyong nausab ang akong impresyon sa mga Saksi ni Jehova. Sa una, gilantaw ko kamo ingong relihiyosong mga panatiko. Karon akong nasabtan nga kamo maoy de-prinsipyong mga tawo.”
Ang direktor sa prisohan sa Wołów, si Marek Gajos, mipahiyom ug miingon: “Sa sinugdanan abi namog gamay ra kaayo ang inyong mahimo. Abi namog laing relihiyon lamang kamo nga adunay mga tinguha nga magbag-o ang mga piniriso pinaagi sa pagtuon sa Bibliya. Apan, sa pagkakita sa mga resulta sa inyong unang kalihokan kami nakahukom nga makigtambayayong gayod. Kamo wala gayod kapoyi sa pagbalikbalik dinhi sulod na sa siyam ka tuig karon, ug akong gipabilhan pag-ayo ang inyong nahimo hangtod karon.”
Apan, giunsa man pagdawat ang artikulo sa katibuk-ang piniriso sa Wołów? Interesado kaayo ang mga piniriso mao nga ang mga Saksi sa prisohan nahutdan sa ilang suplay sa magasin. Ang mga opisyales sa prisohan nagpakita usab ug interes pinaagi sa paghangyo ug 40 ka dugang mga kopya para sa ilang kaugalingon. Aron matagan-an ang nagdugang nga hangyo, ang lokal nga mga kongregasyon mitabang ug mihatag ug 100 ka dugang mga kopya alang sa mga igsoon sa prisohan. Sa samang higayon, miuswag ang gidaghanon sa nanambong sa tigom diha sa prisohan.
Si Piotr Choduń, usa ka opisyal sa prisohan nga nakigtambayayong gayod sa mga Saksi ni Jehova, nag-ingon: “Kami nakadesisyon nga ibutang kining artikuloha diha sa tanang estante sa among bilanggoan. Nagalaom kami nga ang tanang piniriso nga wala pa magtuon sa Bibliya uban ninyo mobasa sa magasin.”
Ang maayong panig-ingnan sa mga Saksi ug ang ilang determinadong mga paningkamot sa pagsangyaw padayon nga dunay maayong mga resulta. Dugang pa sa 15 ka piniriso nga miuswag ngadto sa punto sa bawtismo, 2 ka opisyales sa prisohan ang nagpahinungod sa ilang mga kinabuhi kang Jehova, ug laing opisyal sa prisohan ang mihangyo ug usa ka pagtuon sa Bibliya. Siyempre, ang mga igsoong nagsangyaw diha sa prisohan sa Wołów naghatag sa tanang pasidungog ngadto kang Jehova nga Diyos tungod sa ilang kalamposan.—Itandi ang 1 Corinto 3:6, 7.
[Hulagway sa panid 28]
Tulo ka Saksi ug usa ka piniriso sa presentasyon sa magasin diha sa lawak-tigomanan sa prisohan