Pangutana

◼ Unsang mga pasidaan ang angay natong bantayan sa dihang magsangyaw ngadto sa mga binilanggo?

Sa tibuok kalibotan dunay labing menos walo ka milyong binilanggo, nga ang pipila kanila nagpakitag interes sa maayong balita. (1 Tim. 2:4) Ang usa ka sangang buhatan nakadawat ug mga 1,400 ka sulat matag bulan gikan sa mga binilanggo ug sa mga membro sa ilang pamilya nga naghangyog mga literatura o personal nga pagduaw. Bisan tuod ug sinsero ang interes nga gipakita sa daghang binilanggo, gipakita sa eksperyensiya nga may pipila nga nagpakaaron-ingnon nga interesado, nga naggamit sa katawhan sa Diyos alang sa hinakog nga bentaha. Tungod niini, ang tanan angayng magbantay sa mosunod nga mga pasidaan maylabot sa pagsangyaw ngadto sa mga binilanggo.

Sa daghang kahimtang ang mga binilanggo ginasangyawan pinaagig sulat. Giawhag gayod nga ang mga sister dili mosulat ngadto sa lalaki nga mga binilanggo, bisan pag ang tumong mao ang paghatag ug espirituwal nga tabang. Kana nga responsabilidad angayng dumalahon lamang sa takos nga mga igsoong lalaki. Ang takos nga mga sister mahimong iasayn sa pagsulat sa babayeng mga binilanggo nga nagpakitag interes sa kamatuoran sa Bibliya. Ang salapi o personal nga mga gasa dili gayod ipadala ngadto sa mga binilanggo, bisan pa sa kamatuoran nga gihangyo ang maong mga butang.

Sa dihang mopakitag interes ang usa ka tawong binilanggo, ang iyang ngalan ug adres angayng ihatag ngadto sa kongregasyon diin nahisakop ang pasilidad sa bilanggoan. Sagad ang takos nga mga igsoong lalaki didto nahibalo kon unsaon pagdumala ang nagkalainlaing mga situwasyon nga mahimong motungha. Kon wala mahibaloi ang kongregasyon, ang maong impormasyon angayng ipadala ngadto sa sangang buhatan.

Dili man supak alang sa mga igsoong lalaki nga mopahigayon ug mga tigom uban sa mga binilanggo aron ubay-ubay ang makatuon sa usa lang ka panahon. Apan, ang espesyal nga mga okasyon diin ang mga magmamantala gawasnong makig-uban sa mga binilanggo dili angayng himoon diha sa mga bilanggoan. Dugang pa, dili maayo alang sa mga magmamantala nga mobisita sa bilanggoan bisan kanus-a nga wala planoha ug may suod nga pakig-uban sa mga binilanggo.

Hinaot nga “magmabinantayon [kita] ingon sa mga halas apan inosente ingon sa mga salampati” samtang ipaambit nato ang maayong balita ngadto sa mga binilanggo.​—Mat. 10:16.