Ang mga Balikduaw Motultol Ngadto sa mga Pagtuon sa Bibliya
1. Nganong hinungdanon gayod ang buluhatong pagbalikduaw?
1 Gisugo ni Jesus ang iyang mga sumusunod dili lang sa pagwali kondili usab sa “paghimog mga tinun-an . . . , nga magatudlo kanila.” (Mat. 28:19, 20) Ang usa ka magwawali nagamantala, apan ang usa ka magtutudlo nagabuhat ug labaw pa. Siya motudlo, mopatin-aw, ug mopamatuod. Ang usa ka paagi nga kita nagatudlo sa uban maoy pinaagi sa pagbalikduaw sa interesadong mga tawo uban ang tumong nga makasugod ug mga pagtuon sa Bibliya uban kanila.
2. Kinsay atong balikduawon?
2 Kinsay imong balikduawon? Paneguroang mabalikduaw ang tanang midawat ug literatura o nagpakitag bisan gamayng interes sa maayong balita. Kon makakaplag kag interesado sa dihang nagsangyaw sa publiko, sulaying kuhaa ang adres sa maong tawo o numero sa telepono aron maugmad ang interes. Magmapositibo bahin sa pagsugod ug mga pagtuon sa Bibliya. Padayong pangitaa kadtong modawat sa tanyag nga tun-an ang Bibliya, ug lagmit imong makaplagan sila.—Mat. 10:11.
3, 4. Unsay nalangkit sa paghimog epektibong mga balikduaw?
3 Ipakita ang Personal nga Interes: Ang pagpangandam alang sa epektibong balikduaw magsugod sa unang duaw. Matikdan sa malamposong mga ebanghelisador kon unsay nakapainteres sa tagbalay, ug gamiton nila kana ingong pasukaranan sa dugang mga panaghisgot. Nakaplagan sa pipila nga mapuslanon ang pagpatunghag pangutana sa kataposan sa maong duaw aron mapukaw ang interes sa tagbalay alang sa sunod nga pagbisita. Ang atong sinserong interes sa mga tawo makapahunahuna nato kanunay bahin kanila bisan human sa atong pagbiya sa tagbalay, ug motukmod kini kanato sa pagduaw pag-usab nga walay langan. Kon mahimo, paningkamoti ang pagbalik samtang lab-as pa ang interes—tingali bisan sulod sa usa o duha ka adlaw.
4 Sa dihang mobalikduaw, tinguhaang mahisgotan ang inyong unang panaghisgot. Himoang tumong ang pagpaambit ug labing menos usa ka makapalig-ong Kasulatanhong punto sa matag higayon, ug magmaandam sa pagpaminaw. Sayra pag-ayo ang tagbalay. Dayon sa mosunod nga mga duaw, ipaambit ang mga kamatuoran gikan sa Pulong sa Diyos nga laktod nga magpunting sa iyang mga kabalaka.
5. Unsang yanong paagi ang hayan magamit sa pagsugod ug mga pagtuon sa Bibliya?
5 Magmahunahunaon sa Pagsugod ug Pagtuon sa Bibliya: Paghimog mga balikduaw uban ang tumong nga makasugod ug pagtuon sa Bibliya. Unsaon kini paghimo? Ingna nga buot kang mopaambit ug makaiikag nga impormasyon, ug ablihi ngadto sa parapo sa librong Kahibalo o brosyur nga Gikinahanglan nga gituohan mong makadani sa maong tawo. Basaha ang parapo, tagda ang pangutana, ug hisgoti ang usa o duha ka teksto nga gisitar. Mahimo kini diha mismo sa pultahan sulod sa lima ngadto sa napulo ka minuto. Taposa pinaagi sa pagsukna sa sunod nga pangutana ug paghimog mga kahikayan nga padayonon ang panaghisgot sa laing higayon.
6. Sa unsang paagi atong ikapakita nga kita nagapabili sa kahinungdanon sa paghimog mga balikduaw?
6 Ang pag-ugmad sa tanang interes nga atong makaplagan hinungdanong bahin sa atong ministeryo. Busa, diha sa imong senemanang eskedyul paggahin ug panahon alang sa paghimog mga balikduaw. Ang paghimo niana makadugang sa kaepektibo sa imong ministeryo ug makahatag ug tinuod nga kalipay.