Ang Hunahuna sa Bibliya
Ang Yuta Malaglag ba Pinaagi sa Kalayo?
NAPAIG tungod sa nukleyar nga sunog, nasunog sa miburot nga adlaw, o gisilaban sa usa ka nasukong diyos—magkalain tingali ang paagi sa paglaglag, apan kombinsido ang daghang tawo nga ang planetang Yuta, ang pinuy-anan sa tawo, makaagom sa iyang kataposan pinaagi sa makaylapong dilaab sa kalayo, sa bug-os nga kalaglagan.
Ang pipila mositar ug mga teksto sa Bibliya nga nagpaila sa gisugo-sa-Diyos nga pagsunog ingong panimalos sa mga kalapasan sa tawo batok sa yuta. Ang uban nagpalanog sa opinyon ni Paul Davies, usa ka propesor sa University of Adelaide, Australia, kinsa misulat mahitungod sa iyang giisip nga dili-kalikayang pagkabanlod sa yuta sa kalayonhong kalaglagan. Gipangagpas niya diha sa iyang librong The Last Three Minutes: “Samtang ang adlaw labi pang mobukad, lukpon niini . . . ang Yuta sa kalayo. Ang atong planeta mahimo na lamang abo.” Unsa ang kamatuoran bahin sa dulnganan sa yuta? Unsaon nato pagsabot ang mga teksto sa Bibliya nga mopatim-awng nagtagna ug kalayonhong kalaglagan?
May Pagtagad ba ang Diyos?
Sa Jeremias 10:10-12, kita gipahibalo: “Si Jehova sa pagkamatuod maoy Diyos. . . . Siya mao ang Magbubuhat sa yuta pinaagi sa iyang gahom, ang Usang lig-ong nagtukod sa mabungahong yuta pinaagi sa iyang kaalam, ug ang Usang pinaagi sa iyang salabotan nagbuklad sa kalangitan.” Gibuhat sa Diyos ang yuta ug lig-ong gitukod kini. Busa uban ang kaalam, gugma, ug salabotan, mainampingon niyang giandam ang yuta aron molungtad sa panahong walay katinoan ingong usa ka matahom nga pinuy-anan alang sa tawo.
Mahitungod sa paglalang sa Diyos sa mga tawo, ang Bibliya nagtaho: “Lalaki ug babaye iyang gilalang sila. Dugang pa, ang Diyos nagpanalangin kanila ug ang Diyos nag-ingon kanila: ‘Magmabungahon ug magdaghan ug pun-a ang yuta ug gamhi kini.’” (Genesis 1:27, 28) Sa nahuman niya ang iyang buluhaton sa paglalang, siya nakapahayag nga way-sipyat nga “kadto maayo kaayo.” (Genesis 1:31) Gusto niyang kana magpabiling ingon. Maingon nga ang pipila ka umaabot nga mga ginikanan magdisenyo ug mag-adorno sa usa ka lawak sa bata alang sa ilang gihulat nga bag-ong matawo, ang Diyos nagtanom ug matahom nga tanaman ug nagbutang sa tawong si Adan didto aron tikaron ug atimanon kana.—Genesis 2:15.
Si Adan nawad-an sa kahingpitan ug sa iyang katungdanan sa pag-atiman sa yuta. Apan gibiyaan ba sa Maglalalang ang Iyang katuyoan? Ang Isaias 45:18 nagpailang wala: “Kini ang giingon ni Jehova, ang Maglalalang sa kalangitan, . . . ang Mag-uumol sa yuta . . . , ang Usang lig-ong nagtukod niini, kinsa wala maglalang niini alang lamang sa walay kapuslanan, kinsa nag-umol niini aron pagapuy-an.” (Tan-awa usab ang Isaias 55:10, 11.) Bisan pag gipasagdan sa tawo ang iyang katungdanan sa pagkamagbalantay, ang Diyos nagpadayon sa pagtuman sa iyang kontrata alang sa yuta ug sa kinabuhi ibabaw niini. Ang Balaod nga gihatag sa karaang nasod sa Israel nagpaigo sa “usa ka igpapahulay sa bug-os nga pahulay alang sa yuta” kada ikapitong tuig. Nalakip niini ang makitawhanong mga balaod nga naghatag ug usa ka sukod sa panalipod alang sa mga hayop. (Levitico 25:4; Exodo 23:4, 5; Deuteronomio 22:1, 2, 6, 7, 10; 25:4; Lucas 14:5) Kini maoy pipila lang ka pananglitan diha sa Bibliya nga tin-awng nagpaila nga ang Diyos dako kaayog pagtagad sa katawhan ug sa tanan nga iyang gitugyan nga atimanon sa tawo.
“Ang Kanhing Yuta”
Busa unsaon nato pagpahiuyon ang mga teksto sa Bibliya nga daw nagkasumpakiay sa usag usa? Usa niana mao ang 2 Pedro 3:7, nga, sumala sa King James Version, nag-ingon: “Ang mga langit ug ang yuta, nga mao karon, pinaagi sa samang pulong gitipigan, gitagana sa kalayo sa adlaw sa paghukom ug kapildihan sa dili-diyosnong mga tawo.” Ang lain mao ang Pinadayag 21:1, nga nag-ingon: “Nakita ko ang usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na.”
Kon ang mga pulong ni Pedro pagasabtong literal ug ang planetang Yuta pagaut-oton sa tinuod nga kalayo, nan ang literal nga mga langit—ang mga bituon ug ang ubang mga butang sa langit—pagalaglagon usab pinaagig kalayo. Kining saysaya, hinunoa, mosumpaki sa pasalig nga makita sa mga kasulatan sama sa Mateo 6:10: “Ipahinabo ang imong kabubut-on, maingon sa langit, nganhi usab sa yuta,” ug sa Salmo 37:29: “Ang mga matarong mismo magapanunod sa yuta, ug sila magapuyo ibabaw niana sa walay kataposan.” Dugang pa, unsa ba unyay epekto sa kalayo diha sa init na kaayong adlaw ug mga bituon, nga padayong nagpahinabog nukleyar nga mga buto?
Sa laing bahin, ang Bibliya kasagarang mogamit sa pulong “yuta” sa masambingayong diwa. Pananglitan, ang Genesis 11:1 nag-ingon: “Karon ang tibuok yuta nagpadayong may usa ka pinulongan.” Dinhi, ang pulong “yuta” nagtumong sa katawhan sa katibuk-an, o sa tawhanong katilingban. (Tan-awa usab ang 1 Hari 2:1, 2; 1 Cronicas 16:31.) Ang konteksto sa 2 Pedro 3:5, 6 nagpasabot sa samang masambingayong gamit sa “yuta.” Nagtumong kini sa adlaw ni Noe sa dihang ang usa ka tuman-kadaotang tawhanong katilingban nalaglag sa Lunop apan si Noe ug ang iyang panimalay ingon man ang globo mismo napreserbar. (Genesis 9:11) Sa susama, sa 2 Pedro 3:7, kini nag-ingon nga ang mga pagalaglagon maoy “dili-diyosnong mga tawo.” Ang maong hunahuna maoy uyon sa nahibiling bahin sa Bibliya. Ang tuman-kadaotang katilingban nga gitagana sa kalaglagan mao usab “ang kanhing yuta” nga gitumong sa Pinadayag 21:1, nga gikutlong sayosayo.
Sa tinuoray, maingon nga ang usa ka matinagdanong yutan-ong amahan mohimo sa tanang lakang nga posible aron maseguro nga dili madaot ang iyang balay, si Jehova nga Diyos dulot nga mabalak-on bahin sa iyang kalalangan. May panahong iyang gipapahawa ang imoral ug tuman-kadaotang katawhan gikan sa tabunok nga Walog sa Jordan ug nagpasalig sa bag-ong mga mag-aatiman sa yuta, kinsa may pakigtugon uban kaniya, nga kon ilang sundon ang iyang mga lagda, ‘ang yuta dili magsuka kanila tungod sa ilang paghugaw niini sa samang paagi nga nagsuka gayod kini sa mga nasod nga nanghiuna kanila.’—Levitico 18:24-28.
“Usa ka Bag-ong Yuta”
Karong adlawa, ang usa ka katilingban nga mahilayon, mabangis, ug sa politikanhong paagi hiwi naghugaw sa yuta. Ang Diyos lamang ang makaluwas niini. Kana mao gayod ang iyang buhaton. Sa Pinadayag 11:18, siya nagsaad nga ‘pagagun-obon ang nagagun-ob sa yuta.’ Ang napasig-uli ug nabag-ong yuta pagapuy-an sa mga tawong nahadlok sa Diyos ug tim-os nga nahigugma sa ilang mga isigkatawo. (Hebreohanon 2:5; itandi ang Lucas 10:25-28.) Ang mga kausaban nga mahitabo ilalom sa langitnong Gingharian sa Diyos maoy dako kaayo nga ang Bibliya naghisgot sa “usa ka bag-ong yuta”—usa ka bag-ong tawhanong katilingban.
Kon magbasa kita sa mga kasulatan nga sama sa Salmo 37:29 ug atong masabtan ang pamulong ni Kristo sa Mateo 6:10, kita makombinsir nga ni ang mga puwersa sa kinaiyanhon ni ang tawo uban ang tanan niyang gahom sa paglaglag ang maglaglag sa atong planeta. Dili kini magpakyas sa katuyoan sa Diyos. (Salmo 119:90; Isaias 40:15, 26) Ang matinumanong katawhan magpuyo sa yuta taliwala sa mga kahimtang sa way-kinutobang katahom ug way-kataposang kalipay. Kana mao ang kamatuoran bahin sa dulnganan sa yuta, kay kini mao ug sa kanunay mao ang katuyoan sa mahigugmaong Maglalalang sa tawo.—Genesis 2:7-9, 15; Pinadayag 21:1-5.