Ampingi ang Imong Pangdungog!

USA ka bag-ong surbi sa 400 ka batan-on sa Pransiya nagbutyag nga 1 sa matag 5 kanila ang nag-antos gumikan sa pagkabungol. Ang samang pagtuon usa ka dekadang mas sayo nagpakita nga 1 lamang sa matag 10 ka batan-on ang nag-antos sa maong pagkabungol. Milihok uyon niining kalit nga pag-uswag sa pagkabungol sa mga batan-on, sa miaging tuig ang French National Assembly mibotar sa paglimite sa gikusgon sa tingog gikan sa kaugalingong mga stereo ngadto sa 100 ka decibel.

Ang gibasol pag-ayo sa pagkabungol gitumong sa kusog kaayong tingog gikan sa mga headphone sa personal nga mga stereo. Ang siruhano sa dalunggan nga si Jean-Pierre Cave nag-ingon nga ang gikusgong sobra sa 100 ka decibel moresulta sa permanenteng kadaot human sa pipila ka oras. Dangtan lamag mga minutos nga ang maong kadaot mahitabo sa dihang ang gikusgon mosobra sa 115 ka decibel. Ang FNAC, usa ka nangunang Pranses nga tigmenudo ug mga elektroniks, nag-ingon nga kadaghanan sa ilang personal nga mga stereo motingog ug kapin sa 100 ka decibel. Ang pipila ka personal nga mga stereo makapatunghag 126 ka decibel, nga maoy 400 ka pilo nga mas kusog kay sa 100 ka decibel!

Ang mga konsiyertong rock lagmit mas nakadaot pa sa mga batan-on kay sa personal nga mga stereo, sumala pa sa Pranses nga espesyalista sa pangdungog nga si Christian Meyer-Bisch. Sa pagkatinuod, ang regular nga mga tigtambongan sa mga konsiyertong rock adunay dili-tiaw nga pagkabungol kon itandi sa mahimsog nga mga 18-anyos. Maoy hinungdan nga ang diputado sa French National Assembly nga si Jean-François Mattei nagpahimangno: “Kita nagpatunghag usa ka kaliwatan sa mga tawong bungol.”

Busa aron maampingan ang imong pangdungog, bantayi kana nga gikusgon!