Gikan sa Among mga Magbabasa
Kamatayon Diha sa Kuna Salamat sa tipik nga taho sa “Pagpaniid sa Kalibotan” nga may ulohang “Ang Panigarilyo Gilangkit sa mga Kamatayon Diha sa Kuna.” (Enero 22, 1997) Naglaom ako nga tagdon nga seryoso sa kada inahan kana nga taho. Hapit mamatay ang akong masusong lalaki tungod sa SIDS (Sudden Infant Death Syndrome) tungod kay nagsige akog panigarilyo kaniadtong nagburos pa. Sulod sa usa ka tuig human niadto nga insidente, kinahanglang itaod kaniya ang monitor sa kasingkasing matag katulog niya aron nga kon mohunong ang iyang kasingkasing, motingog ang monitor. Nangandoy lamang ako nga unta nailhan na nako si Jehova niadtong tungora. Nakahunong unta ako sa pagsigarilyo, ug nalikayan tingali nako ug sa akong anak lalaki kining makahahadlok nga hitabo.
A. C. A., Tinipong Bansa
Nag-antos sa Artraytis Buot kong ipahayag ang akong pasalamat alang sa kasinatian ni Luretta Maass, nga nag-ulohang “Sa Dihang Ako Maluya, Niana Ako Gamhanan.” (Enero 22, 1997) Nag-edad ako ug 27-anyos, ug nag-antos usab ako sa rheumatoid arthritis. Bisan pag makahuwas sa sakit ang terapiya, dunay mga higayon nga mobati akog gamayng pagkahigawad ug kaluya tungod kay ang akong sakit nagpugos kanako nga mohunong sa pag-alagad ingong tibuok-panahong magwawali. Makapadasig ang determinasyon ni Luretta Maass nga mag-alagad kang Jehova, bisan pa sa iyang sakit. Dili nako tugotan nga madaog ako sa pagkawalay-kadasig; buot ko nga mohimo ug labaw pa diha sa pagsangyawng buluhaton.
A. B., Italya
Kapin na sa 30 ka tuig nga nag-antos ang akong inahan sa rheumatoid arthritis. Ikasubo, lisod hupayon ang kasakit. Akong gipasigarbo ang akong inahan, tungod kay makahimo siya sa pagtambong halos sa tanang tigom sa kongregasyon. Nga naglingkod sa iyang weltsir, nagpakigbahin siya sa Tunghaan sa Teokratikanhong Ministeryo ug makahimo gihapon sa pagpakigbahin sa pagsangyawng buluhaton. Ug bisan pa sa iyang mga gibati, dili gayod siya moreklamo.
S. M., Alemanya
Lunop sa Adlaw ni Noe Ang artikulong “Ang Hunahuna sa Bibliya: Ang Lunop—Tinuod nga Hitabo o Sugilambong?” (Pebrero 8, 1997) nagtabang gayod kanako nga tamdong seryoso kining makasaysayanhong hitabo. Ako, sama sa daghan pang uban, gitudloan kabahin sa Lunop sa bata pa kaayong pangedaron. Apan, wala gayod ako makaamgo nga daghan ang nag-isip sa asoy bahin sa Lunop nga usa lamang ka sugilambong. Ang kamatuoran nga si Jesus nagtandi sa kataposang mga adlaw ngadto sa mga adlaw ni Noe nagpakita nga tinuod gayod nga nahitabo ang Lunop.
S. M., Tinipong Bansa
Pagsagubang sa Trahedya Dili pa dugay nga nag-atubang akog daghang pagsulay, nga sunodsunod. Misulat ko sa usa ka higala nga naghubit sa pipila niini nga mga pagsulay ug mikutlo sa Salmo 126:5: “Sila nga nanagpugas ug mga luha magaani sa kalipay.” Handurawa kon unsay akong gibati sa dihang, human dayon sa akong paghimo sa sulat, akong nadawat ang Pebrero 8, 1997, nga gula nga may artikulong “Nagpugas ug mga Luha, Nagaani sa Kalipay,” nga pinasikad sa maong kasulatan. Makapalig-on kaayo sa pagtuo ang kasinatian ni Raymond Kirkup.
P. B., Jamaica
Pag-atiman Ang seryeng “Pag-atiman—Pag-atubang sa Hagit” (Pebrero 8, 1997) dako kaayo ug paghupay nga nahimo kanako sa kinalisoran kaayong panahon. Ang akong gimahal nga inahan, nga matinumanong nag-alagad kang Jehova sa daghang tuig, nabiktima sa usa ka makapaluya nga sakit sa utok. Duna usab siyay sakit nga Parkinson ug grabeng artraytis. Nasubo ako ug nakuratan sa iyang daling pagkadaot. Ingong iyang bugtong nga anak lalaki, akong gibati ang kabug-at sa pag-atiman kaniya. Apan ang nindot nga artikulo masinaboton kaayo! Miabot kini ingong usa ka tinuod nga gasa gikan kang Jehova. Daghan kaayong salamat alang niining mahigugmaong pagpaluyo.
R. H., Inglaterra