Kamatay—Usa ka Ilhanan sa Kataposan?
ANG mga kamatay ba sa atong adlaw nagpasabot nga ang kataposan sa kalibotan haduol na? Sa dili pa nato tubagon kanang pangutanaha, konsiderahon nato kon unsay ipasabot sa pahayag nga “ang kataposan sa kalibotan.”
Daghang tawo ang nagtuo nga ang kataposan sa kalibotan nagkahulogan nga ang Diyos maglaglag sa yuta ug sa tanang kinabuhi diha niana. Apan, ang Pulong sa Diyos nag-ingon nga siya “nag-umol [sa yuta] aron pagapuy-an.” (Isaias 45:18) Ang iyang katuyoan mao ang pagpuno sa planeta sa himsog, malipayon nga mga tawo nga mahinamong mopahiuyon sa iyang matarong nga mga sukdanan. Busa ang kataposan sa kalibotan wala magkahulogan ug kataposan sa yuta ug sa tanang molupyo niini. Hinunoa, kini nagkahulogan ug kataposan sa presenteng sistema ug niadtong anaa niana nga modumili sa pagbuhat sa kabubut-on sa Diyos.
Gipakita kini ni apostol Pedro, kinsa misulat: “Ang kalibotan [sa adlaw ni Noe] nakaagom sa kalaglagan sa dihang gilunopan kini sa tubig.” Sa dihang ang kalibotan gilaglag sa panahon ni Noe, ang mga daotan maoy nangamatay. Ang yuta nagpabilin ug mao man usab ang matarong nga si Noe ug ang iyang pamilya. Sumala sa sunod nga gisulti ni Pedro, ang Diyos molihok pag-usab sa umaabot aron sa pagpahinabog “kalaglagan sa mga tawong dili-diyosnon.”—2 Pedro 3:6, 7.
Ang ubang mga teksto sa Bibliya kanunayng nagpaluyo niining maong panglantaw. Pananglitan, ang Proverbio 2:21, 22 nag-ingon: “Ang mga matul-id mao ang magapuyo sa yuta, ug ang mga hingpit mao ang magpabilin diha niana. Mahitungod sa mga daotan, sila pagaputlon gikan mismo sa yuta; ug mahitungod sa mga maluibon, sila pagalukahon gikan niana.”—Tan-awa usab ang Salmo 37:9-11.
Mga Kamatay ug ang Kataposan sa Kalibotan
Apan kanus-a kini mahitabo? Upat sa mga tinun-an ni Jesus misukna niana kaniya. Sila nangutana: “Unsa man unya ang ilhanan sa imong pagkaanaa ug sa katiklopan sa sistema sa mga butang [o, sumala sa giingon sa ubang hubad sa Bibliya, “ang kataposan sa kalibotan”]?” Si Jesus mitubag: “Ang nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa usa ka dapit human sa laing dapit.” (Mateo 24:3, 7) Sa susamang asoy sa Lucas 21:10, 11, si Jesus midugang: “Aduna unyay . . . sa usa ka dapit human sa lain mga kamatay . . . , ug aduna unyay makalilisang nga mga talan-awon ug gikan sa langit dagkong mga ilhanan.”
Matikdi nga si Jesus wala moingon nga ang mga kamatay lamang ang magpakita nga ang kataposan haduol na. Hinunoa, gilista usab niya ang dagkong mga gubat, mga linog, ug mga kanihit sa pagkaon. Sa iyang detalyadong tagna nga makaplagan sa Mateo 24 ug 25, Marcos 13, ug Lucas 21, gitagna ni Jesus ang daghang ubang butang nga mahitabo. Kanang tanan kinahanglang dungang mahitabo sa dili pa molihok ang Diyos sa pagtapos sa pagkadaotan dinhi sa yuta. Lig-on ang pamatuod nga kita nagkinabuhi na nianang yugtoa.
Ang Paraiso nga Moabot
Ang umaabot dili magpahinabog kalaglagan sa katawhan, pinaagi man sa kamatay o sa gahom sa Diyos. Si Jehova nga Diyos nagsaad nga himoon kining yutaa nga usa ka paraiso. (Lucas 23:43) Lakip sa ubang mga butang, iyang wagtangon ang mga sakit nga naghasol sa katawhan.
Kita gipasaligan niini sa dihang atong konsiderahon ang ministeryo ni Jesu-Kristo, kinsa hingpit nga nagsumbalik-silaw sa mga hiyas sa iyang Amahan. Gihatagag gahom sa iyang langitnong Amahan, si Jesus nag-ayo sa mga bakol, pungkol, buta, o amang. (Mateo 15:30, 31) Giayo usab niya kadtong gisakit sa sanla. (Lucas 17:12-14) Giayo niya ang usa ka babaye nga nagtalinugo, usa ka tawo nga mikuyos ang kamot, ug usa ka tawo nga nanghupong. (Marcos 3:3-5; 5:25-29; Lucas 14:2-4) Gipasig-uli niya sa kahimsog ang “patolon ug mga tawong paralitiko.” (Mateo 4:24) Sa tulo ka higayon nagbanhaw pa siya ug mga patay!—Lucas 7:11-15; 8:49-56; Juan 11:38-44.
Kining milagrosong mga pagpang-ayo nagpalig-on sa saad sa Diyos nga sa umaabot iyang ipahinabo nga, “walay molupyo nga moingon: ‘Ako masakiton.’” (Isaias 33:24) Wala na gayoy kamatay nga maghikaw sa katawhan sa kahimsog ug kinabuhi. Pagkamapasalamaton nato nga ang atong mahigugmaong Maglalalang adunay katakos ug kabubut-on sa pagwala sa bug-os sa balatian ug sakit, sa walay kataposan!—Pinadayag 21:3, 4.
[Hulagway sa panid 9]
Si Jesus gihatagag gahom sa Diyos sa pag-ayo sa masakiton
[Hulagway sa panid 10]
Sa umaabot nga yutan-ong Paraiso, si Jehova magwala sa balatian ug sakit