Ang Kasakit sa Pagbuhi

“Gipasidan-an ako sa akong bana sa adlaw nga natawo ang unang anak​—‘Ang pagmatuto ug mga anak, pinangga, maoy usa ka dugay kaayong palakat sa pagbuhi.’”—Ourselves and Our Children​—A Book by and for Parents.

ANG kadaghanang ginikanan malipay​—mangayaon pa​—sa dihang matawo ang ilang unang anak. Bisan pa sa mga kakulian, mga kahasol, mga kasakit, mga kahiubos, ug mga kabalaka nga dala sa pagkaginikanan, ang mga anak mahimong tuboran sa dakong kalipay. Duolan sa tulo ka libo ka tuig kanhi, ang Bibliya nag-ingon: “Ang mga anak maoy gasa gikan sa GINOO; sila maoy tinuod nga panalangin.”​—Salmo 127:3, Today’s English Version.

Bisan pa niana, ang Bibliya usab nagpadayag niining makasubong panagna: “Pagabiyaan sa lalaki ang iyang amahan ug ang iyang inahan.” (Genesis 2:24) Sa nagkalainlaing katarongan, ang dagko nang mga anak sagad mobiya sa panimalay​—aron mangitag edukasyon o karera, magpadako sa ilang Kristohanong ministeryo, magminyo. Apan alang sa ubang mga ginikanan, kini nga kamatuoran masakit ra kaayo. Ilang gitugotan ang kinaiyanhong pakigbisog sa ilang mga anak nga magkinaugalingon nga magtukmod kanila​—sumala sa pagkasulti sa usa ka magsusulat​—sa “pagbati nga giinsulto, gikasuk-an, gipakaulawan, gihulga o gisalikway.” Kini kasagaran mosangpot sa dili-matapos nga panagbingkil ug tensiyon sa pamilya. Nagadumili sa pag-atubang sa adlaw nga ang ilang mga anak mobiya sa salag, ang ubang mga ginikanan napakyas sa pag-andam kanila alang sa pagkahamtong. Ang naani gikan sa maong pagpasagad makahahadlok: mga hamtong nga dili-andam sa pagdumalag panimalay, pag-atiman ug pamilya, o bisan pagbaton ug trabaho.

Ang kasakit sa panagbulag tingali ilabinang malisod diha sa nag-inusarang-ginikanan nga mga pamilya. Ang nag-inusarang ginikanan nga ginganlag Karen nag-ingon: “Ang akong anak nga babaye ug ako suod; naugmad namo ang tinuod nga bugkos sa panaghigala. Bisan asa ako moadto, dad-on nako siya.” Ang suod nga relasyon sa ginikanan-anak kasagaran diha sa nag-inusarang-ginikanan nga mga panimalay. Masabot, ang paghunahuna nga mawala ang maong pagkasuod mahimong magun-obon.

Apan, ang librong Traits of a Healthy Family nagpahinumdom sa mga ginikanan: “Ingon niana ang pamilyahanong kinabuhi: ang pagpadako sa usa ka walay-mahimo nga masuso ngadto sa usa ka independente nga hamtong.” Dayon kini nagpasidaan: “Motungha ang daghang problema sa mga pamilya tungod kay ang mga ginikanan dili makamaong mobuhi.”

Ikaw komosta? Usa ba ikaw ka ginikanan? Kon mao, andam  ka ba sa adlaw sa dihang imong pagabuhian ang imong mga anak? Ug komosta ang imong mga anak? Ginaandam ba nimo sila nga makaarang sa pagkinaugalingon?