Georgia—Usa ka Karaang Kabilin Gitipigan
SINULAT SA KORESPONSAL SA PAGMATA!
GUSTO ba nimong mopuyo sa usa ka nasod nga dunay daghag-abot nga mga walog nga nahimutang taliwala sa 4,600 metros-gitas-on naputos sa niyebe nga kabukiran, diin adunay pipila ka tawo nga nabuhi hangtod sa pangedaron nga 100 ug saylo pa? Alang sa mga molupyo sa Georgia, kini dili usa ka damgo lamang. Kini maoy tinuod.
Ang Georgia nahimutang ubay sa geograpikanhon ug kultural nga utlanan tali sa Uropa ug Asia. Sa karaang kapanahonan, ang Georgia maoy hinungdanong ang-ang sa nabantog nga Silk Road, ang mao gihapong dalan nga gisubay ni Marco Polo paingon sa Tsina. Ang Georgia nakabatog kaayohan sa pinansiyal ug kultural gikan niining maong koneksiyon tali sa Sidlakan ug Kasadpan, apan usahay ang mga manunulong nakakaplag usab nga takos nga mosubay sa maong agianan. Sumala sa usa ka banabana, ang kaulohan sa Georgia, ang Tbilisi, nalumpag sa 29 ka beses! Karong adlawa, ang Tbilisi maoy puliki ug sadya nga siyudad, nga adunay usa ka subwey ug modernong mga tinukod nga nasagolan sa dugay nang arkitektural nga mga monumento.
Mga 87 porsiyento sa yuta sa Georgia maoy bukiron. Nagadagayday gikan sa yelohon ug umaw nga ilaya ug latas sa kapatagan nag-agos ang 25,000 ka suba, ang kadaghanan puno sa isdang trout. Kapin sa un-tersiya sa nasod maoy lasang o napuno sa kalibonan. Ang Caucasus nga lumbay sa kabukiran sa amihanang utlanan sa Georgia nagsalipod sa sulod nga bahin sa nasod gikan sa bugnaw nga klima nga naggikan sa amihanan. Kining maong kahimtang nagtugot sa kasadpang Georgia nga mainitan sa umogong hangin gikan sa Itom nga Dagat—usa ka katarongan kon nganong ang Georgia nahimong paboritong destinasyon sa mga bakasyonista. Ang kasarangang klima nakaamot usab sa usa sa kinakaraanan ug kinamaayohang kabilin sa paghimog bino. Sa pagkatinuod, ang Georgia naggamag kapin sa 500 ka lainlaing matang sa mga ubas ug bino!
Apan, ang kinadak-ang kahinguhaan sa Georgia mao ang mga tawo niini. Nailhan sila latas sa katuigan tungod sa ilang kaisog, kaintelihente, ug bukas nga pagkamaabiabihon, maingon man sa ilang pasiaw ug gugma sa kinabuhi. Ang ilang kultura dagaya sa awit ug sayaw, ug ang mga awit sa banika kanunay gihapong ginaawit sa kan-anan diha sa Georgianhong mga panimalay.
Ang Georgia aduna usab ing taas nga kasaysayan sa katitikan, nga masubay ngadto sa ikalimang siglo. Ang Georgian mao ang usa sa kinaunahang mga pinulongan nga niana gihubad ang Bibliya, nga naggamit sa talagsaon ug matahom nga Georgian nga alpabeto. Kining tanang kultura naghimog kutay sa kagahapon sa Georgia—usa ka karaang kabilin nga gitipigan sa usa ka modernong nasod.
[Picture Credit Line sa panid 24]
Pat O’Hara/Corbis
[Mga hulagway sa panid 25]
1. Georgian nga Bibliya
2. Pipila ka molupyo nabuhi sa pangedaron nga 100 ug saylo pa!
3. Usa ka puliking dalan sa Tbilisi
[Credit Line]
Dean Conger/Corbis