Gidayeg sa Prensa sa Rusya ang mga Saksi ni Jehova

ANG mga pasilidad sa sanga sa mga Saksi ni Jehova sa Rusya gipahinungod niadtong Hunyo 21, 1997. Ang pundok sa mga tinukod naglakip sa pito ka balayng puy-anan, usa ka dakong Kingdom Hall, usa ka komedor, ug usa ka dakong tinukod alang sa mga opisina ug bodega. Kini nahimutang mga 40 ka kilometros amihanan-kasadpan sa St. Petersburg, sa baryo sa Solnechnoye.

Ang dedikasyon nakadawat ug dakong publisidad pinaagi sa mga magsusulat nga gidapit sa programa. Ang usa kanila nagsulat diha sa Literaturnaya gazeta sa Moscow, usa ka basahon nga may sirkulasyon nga kapin sa un-kuwarto sa usa ka milyon: “Ang unang impresyon sa dihang makita nimo kini mao, Kini ang de-kalidad nga trabaho!”​—Tan-awa ang mga larawan diha sa mga panid 16 ug 17.

Ang magsusulat, si Sergey Sergiyenko, nagsaysay: “Ang tanan dinhi gihimo sa mga magtutuo sa ilang kaugalingong mga kamot: Ang trabaho sa konstruksiyon gihimo sa dakong bahin sa mga Pinlandes, mga Swiso, mga Olandes, mga Norwego, ug mga Aleman. Hinlong mga dalan nga ginama sa tisa; inalotang kabalilihan; mga tinukod nga inatopag tisa nga nindot tan-awon, dagkong mga bentana, ug bildong mga pultahan​—mao kini ang rehiyonal nga sentrong pangdumala sa relihiyosong organisasyon sa mga Saksi ni Jehova sa Rusya.”

Ang mga magsusulat gikan sa Moscow, nga kapin sa 650 ka kilometros sa habagatan-sidlakan sa sanga, gidapit sa dedikasyon ug gitagan-an ug transportasyon. Sila gipalibot aron sa pagtan-aw sa pasilidad nga may giya, ug human niana, usa ka pangutanag-tubag nga sesyon gihimo, diin niining panahona gidalit ang mga timotimo. Sumala sa iyang mga obserbasyon, si G. Sergiyenko nagsulat:

“Ang mga Saksi, sumala pa sa panultihon, makasaranganon ug simple . . . Kon ipahayag sa laing pagkapamulong ang iladong panultihong Ruso, ‘Ang mga Saksi nagpuyo [sa ilang balay] nga daw samag anaa sa sabakan ni Jehova.’ . . . Kanunay maluloton ngadto sa tanang tawo, ang mga Saksi, sa pagkamatuod, nagpakitag linaing pagtagad sa ilang kaugalingong mga igsoon.”

Usa ka artikulo nga gisulat ni S. Dmitriyev migula sa Moskovskaya Pravda, usa ka mantalaan nga may sirkulasyon nga duolan sa 400,000. Diha sa iyang artikulo nga nag-ulohang “Ikaw Makatukod ug Imong Kaugalingong Kalibotan Pinaagi Lamang sa Imong Kaugalingong mga Kamot,” ang magsusulat misaysay:

“Human nga giila sa legal nga paagi ang relihiyosong organisasyon sa mga Saksi sa Rusya [sa 1991], ang suliran mitungha bahin sa pagtukod ug ilang kaugalingong mga hedkuwarter. Sila nangita ug dapit duol sa Moscow sa dihang miabot ang wala dahomang report nga ang teritoryo sa kampo kanhi sa mga batan-on duol sa St. Pete[rsburg] ibaligya. Ang yuta gipalit, ug sila nagsugod sa pagtukod. . . .

“Sa miaging usag tunga ka tuig, sa Enero 1, 1996, ang sentro sa baryo sa Solnechnoye nahimong opisyal nga sanga sa relihiyosong organisasyon. Sa tungatunga sa Hunyo, usa ka pundok sa mga magsusulat sa Moscow nakahimo, pinaagi sa pagpalabay ug pipila ka panahon sa St. Pete[rsburg], sa pagsusi, Kinsa ba kining mga Saksi ni Jehova?”

Unsay tubag ni G. Dmitriyev? “Mga tawo, sama ra sa kang bisan kinsang tawo.” Bisan pa, sila lahi, ingon sa gipadayag sa konklusyon sa iyang artikulo: “May pakigdait sila sa usag usa, pakigdait sa tanang palibot. Usa ba kini ka damgo? Oo. Ug bisan pa kini naglungtad.”

Laing magsusulat sa Moscow, si Maksim Yerofeyev, nga nagsulat alang sa Sobesednik, usa ka mantalaan nga may sirkulasyon nga kapin sa 300,000, miingon: “Ang tanang relasyon niining gamayng komunidad gitukod sa mosunod nga prinsipyo: Walay bisan usa ang gipugos sa pagtrabaho, bisan pa niana ang tanan nagtrabaho.”

Human sa pagbatbat sa lawak nga puy-anan sa koordinetor sa Komiteba sa Sanga, si Vasily Kalin, si G. Yerofeyev miingon: “Ang among walay pagsalig nga kaubang mga reporter gustong motan-aw sa pipila sa ubang mga apartment nga ilang gustong tan-awon. Ang gidak-on ug ang mga gamit sa ubang mga lawak sa mga namuyo walay kalainan gikan sa makasaranganong pagkaareglar nga apartment ni Vasily Kalin.”

Laing reporter, si Anastasiya Nemets, nagsulat diha sa artikulong “Pagkinabuhi nga Malinawon sa Kaugalingon.” Ang sub-ulohan niana nga artikulo sa Vechernyaya Moskva maoy “Nagpakakat-on ang mga Tawo Niini Diha sa Usa ka Talagsaong Baryo sa Gawas sa St. Pete[rsburg].”

Naghubit sa lugar ug panagway sa mga pasilidad sa sanga, siya nagsulat: “Sa tibuok palibot, adunay mga lasang ug mga kapatagan. Ang Gulpo sa Pinlandia dili ra kaayo layo. Dinhi adunay gagmayng mga balay nga gitukod nga samag estilong Uropanhon, sinilhigang mga dalan nga ginama sa tisa, ug mabulokong mga tanaman sa mga bulak.

“Ang komersiyal nga mga kompaniya nagtukod ug sama niining gagmayng mga siyudad alang sa ‘bag-ong mga Ruso.’ Apan, ang mga tawo nga diyutay kaayog mga kahinguhaan nagpuyo niini nga baryo . . . Sila haruhayng nagkinabuhi, ug ang labing hinungdanon, sila nagkinabuhi ingong mga higala. Duolan sa 350 lamang ang mga tawo dinhi, gikan sa tanang suok sa kalibotan; madungog mo ang nagkalainlaing mga pinulongang ginasulti​—gikan sa Kinatsila ug Portuges ngadto sa Pinlandes ug Sweko.

“Sa lintunganay, kini maoy komunidad nga larawan sa usa ka dakong komunidad: Ang baryo adunay iyang kaugalingong pabrika ug mga talyer, diin posible ang pag-andam ug bisan unsang butang nga gikinahanglan sa daghag-pinulongang pamilya; gani sila aduna pay ilang kaugalingong klinika.”

Sa pagkatinuod, ang dedikasyon maoy usa ka malipayong okasyon alang sa 1,492 gikan sa 42 ka nasod nga mitambong sa Solnechnoye. Daghan maoy mga edaran kinsa nakaalagad sa daghang dekada sa gidili pa ang buluhatong pagsangyaw. Mahanduraw ba nimo ang bug-os nga kakurat ug kalipay niining mga karaan na samtang ilang gilibot pagtan-aw ang matahom nga mga pasilidad nga nahimutang niining samag-tanaman, 6.9 ka ektaryang lokasyon? Sila mapasaylo sa paghunahuna nga sila nagdamgo.

[Mga hulagway sa panid 18]

Mga magsusulat naglibot sa pagtan-aw sa mga pasilidad sa sanga

Sesyon sa pangutanag-tubag