Gikan sa Among mga Magbabasa

Maayong Kalingawan Ako nagtuon aron mahimong usa sa mga Saksi ni Jehova, ug buot kong pasalamatan kamo sa pagpatik sa seryeng “Pagpangitag Maayong Kalingawan.” (Mayo 22, 1997) Adunay pipila lamang ka butang sa telebisyon nga angay tan-awon, ug gihatag ninyo kanamong tanan​—batan-on ug tigulang​—ang kinamaayohang tambag. Naglaom ako nga kamo padayong magahatag ug kasayoran bahin sa mga isyu nga sama niini.

D. W., Tinipong Bansa

Ang Diyos Magpabilin Bang Akong Higala? Ako mapasalamaton gayod kaayo sa atong malulotong Maglalalang tungod sa talagsaong artikulong “Mga Batan-on Nangutana . . . Ang Diyos Magpabilin Bang Akong Higala?” (Mayo 22, 1997) Dili pa kaayo dugay, gitubag ko ang sinulat nga mga pangutana mahitungod sa kon pila ka higala ang mahimong mabatonan ko, ug ang resulta nagpasalig kanako nga ako kanunayng mapalibotan sa mga higala. Ikasubo, kini maoy bug-os bakak. Sa gihapon, akong naamgohan nga bugtong si Jehova nga Diyos lamang ang atong kinamaayohang Higala. Tinuod gayod nga kon dili nato higala si Jehova nga Diyos, nan ang tanang butang walay kahulogan.

A. T. M., Mexico

Salamat sa interes nga inyong gipakita sa mga batan-on. Nadawat nako ang artikulong “Mga Batan-on Nangutana . . . Ang Diyos Magpabilin Bang Akong Higala?” sa dihang gikinahanglan ko kaayo kini. Ako napalagpot ug bag-o pang nakabalik. Usahay mibati akong nag-inusara ug gisakit sa daghang pagduhaduha​—usa niana mao, Ang Diyos ba nagpatalinghog kanako? Human tukia ang panig-ingnan ni Pablo ubos sa ulohang “Ang Tunok Diha sa Unod,” nakahukom ako nga pangitaon ang panalangin gikan ni Jehova pinaagig regular nga pagtuon sa Bibliya ug tim-os nga pag-ampo. Ang usa ka pangutana, Si Jehova ba padayon nga mahimong akong higala? natubag nga tin-aw.

J. C. A., Argentina

Pagbuhig Putyukan Nagsulat ako mahitungod sa artikulong “Pagbuhig Putyukan​—Usa ka ‘Tam-is’ nga Sugilanon” (Mayo 22, 1997), diin sa mubo naghatag kamo ug hustong impormasyon bahin sa putyukan. Nagustohan ko ang haom nga kombinasyon sa mga pagpatin-aw, mga hulagway, ug mga panghunahuna​—nga walay mga sayop. Ang tigbuhig putyukan kasagaran makamatikod sa pagkadili-tukma o tipik lamang nga hustong impormasyon diha sa pamantalaan, apan walay bisan usa niana sa inyong artikulo. Usa ako ka masibotong tigbuhig putyukan, ug sagad kong nakita ang labawng ‘maayong panabot’ niini nga mga insekto kay sa diha sa daghang tawo. Mao nga sa akong hunahuna haom akong moingon nga sa paghisgot niini nga ulohan, kamo naghatag ug pasidungog sa kaanindot sa kinabuhi, ilabina sa gipatugbaw nianang gagmayng mga linalang.

P. G. M., Italya

Pag-atiman Salamat sa pagpatik sa seryeng “Pag-atiman​—Pag-atubang sa Hagit.” (Pebrero 8, 1997) Ang akong inahan may sakit nga kanser, ug ang pag-atiman kaniya sa kataposang mga yugto sa iyang sakit nakapaluya kanako. Ang mga artikulo tukmang naghubit sa mga pagbati sa usang tig-atiman ug nagpakita sa uban kon sa unsang paagi ipasundayag ang pagkamahunahunaon nganhi kanamong anaa niana nga kahimtang. Ang usa talagsa ra makakaplag sa ingon nga mga artikulo.

F. T., Taiwan

Mga Batan-on Nangutana . . . Ako maoy 12 anyos. Nagtungha ako ug nalingaw kaayo sa pagbasa sa inyong mga magasin. Sa wala ko pa masugdig basa sila, nalisdan ako sa pagpakig-uban kanilang mas edaran kay kanako. Apan human nga mabasa ang mga artikulo sa Pagmata! diha sa seksiyong “Mga Batan-on Nangutana . . . ,” nakaplagan ko kining mas sayong buhaton. Salamat!

N. T., Rusya

Gikan sa Among mga Magbabasa Ako usa ka regular nga magbabasa sa Pagmata! sulod na sa 26 ka tuig, ug sa gihapon ako nagpabili sa magasin nga sama ra gayod kay sukad masukad. Dili ko gayod pakyason ang pagbasa sa seksiyong “Gikan sa Among mga Magbabasa,” kay ang mga komento sagad motukmod kanako nga subliog basa ang usa ka artikulo. Salamat niining ekselenteng mga magasin.

M. B., Pransiya