Gikan sa Among mga Magbabasa
Diborsiyo Nagsulat ako aron ipahayag ang akong dakong pasalamat sa serye nga “Katungod sa Pag-atiman sa Bata—Unsa ang Balanseng Hunahuna?” (Disyembre 8, 1997) Human sa akong diborsiyo, dihay mga suliran sa pagtino kon unsa ka daghang panahon nga moduaw ang akong kanhing bana sa among anak nga babaye. Ang akong bag-ong bana mibati nga ang pagduaw kinahanglang idumili kutob sa maarangan. Apan ang Pagmata! nagtin-aw ning isyuha pinaagi sa pag-una sa kaayohan sa bata ug dili sa emosyon sa mga ginikanan o sa mga amaama o inaina.
L. C., Wales
Ang akong anak nga babaye, akong bugtong anak, gikuha gikan kanako sa dihang mihukom ang korte nga siya kinahanglang mopuyo uban sa iyang papa. Busa ang artikulo daw gisulat alang kanako. Usa ka panalangin ang pagkasayod nga si Jehova nagahatag kanato sa atong “pagkaon sa hustong panahon.”—Mateo 24:45.
D. B., Switzerland
Gipasalamatan ko si Jehova nga naghilak sa dihang akong nakita ang hapin sa Pagmata!, sanglit nakigbugno ako sa katungod sa pag-atiman sa bata sulod sa duha ka tuig. Makaguol kaayo kadto nga kasinatian. Giapresyar ko gayod ang impormatibo, gipamalandong-pag-ayong paagi nga niana kining ulohana gipresentar.
A. F., Tinipong Bansa
Sa bata pa ako, nagdiborsiyo ang akong mga ginikanan. Gibati kong nabahin tali kanilang duha. Busa inyong masabtan kon unsa ka dako ang akong kahinangop sa mga artikulo bahin niining ulohana. Dako ang akong pasalamat nga inyong gihisgotan kining sulirana sumala sa panglantaw sa mga bata.
K. D., Yugoslavia
Mga Parke sa Alpino Gusto kong pasalamatan kamo pag-ayo sa artikulong “Ang Katahom sa Nasodnong mga Parke sa Alpino.” (Nobyembre 22, 1997) Sa way-lipudlipod, gilabyan lamang nako ang unang mga artikulo bahin sa kinaiyahan. Apan akong nakita ang matahom nga mga hulagway nga duyog sa artikulo ug mihukom ako nga sugdan kana sa pagbasa. Dihang natapos na ako, akong naamgohan nga nalabyan ko pagbasa ang daghang ubang makapainteres nga mga artikulo bahin sa kinaiyahan.
T. M., Ukraine
Homoseksuwalidad Nahinam ako sa pagkadawat sa akong Disyembre 8, 1997, nga Pagmata!, nga may artikulong “Ang Hunahuna sa Bibliya: Angay Bang Dumtan sa mga Kristohanon ang mga Homoseksuwal?” Maayo kaayo kining pagkasulat ug timbang ang pagkobre sa usa ka tandogonon kaayong ulohan.
L. W., Tinipong Bansa
Kalaay Akong gitunolan ang akong superbisor ug usa ka kopya sa artikulong “Gilaayan Ka ba sa Imong Trabaho?” (Disyembre 22, 1997) Pagkaugma sa buntag sa trabahoan, iya kong giingnan nga ekselente kaayo ang artikulo. Iya kining gipasa sa akong ubang mga kaubanan sa trabaho ug nagbilig usa ka kopya sa artikulo diha sa among lawak. Tukma sa panahon ang pag-abot sa inyong artikulo!
V. L., Tinipong Bansa
Salamat sa makapainteres nga impormasyon. Ako 17 anyos ug bug-os-panahong nagtrabaho. Ang artikulo naghatag ug ekselenteng tambag kon unsaon paghimo sa akong trabaho nga mas makapahimuot. Salamat!
E. A., Italya
Daghan kaayong salamat sa artikulo. Nia ako karon sa ikaduhang tuig sa akong pag-aprentis ug gilaay na, wala na malingaw sa akong trabaho. Ang artikulo nagtabang kanako nga malipay pag-usab sa akong trabaho.
I. F., Alemanya
Mga “Rave” Ako 19 anyos ug nakagusto pag-ayo sa pagpaminaw sa musikang techno. Apan nakaangay ako kaayo sa artikulong “Mga Batan-on Nangutana . . . Ang mga ‘Rave’ Dili ba Makadaot nga Kalingawan?” (Disyembre 22, 1997) Kini ang unang artikulo nga akong nakita nga tukmang naghubit ning matanga sa musika. Ilabinang mapasalamaton ako sa seksiyon nga “Ang mga Rave ba Alang Gayod Kanimo?” Pinaagig mga pangutana ug mga kasulatan, natabangan ako sa pagkadangat sa usa ka yano ug makataronganong konklusyon.
A. P., Slovenia