Gikan sa Among mga Magbabasa
Luwas Gikan sa Binuhi Sa artikulong “Luwas ba ang Kabataan Uban sa Inyong Iro?” (Hulyo 8, 1997), inyong gisugyot ang pagbutang sa higdaanan sa iro diha sa kosina. Apan, sa miaging mga artikulo, inyong giingon nga angay natong likayan nga may mga binuhi diha sa mga dapit nga andamanan ug pagkaon gumikan sa mga rason sa kahinlo.
R. H., Espanya
Among gidayeg kining obserbasyona. Ang among artikulo nasentro sa kahilwasan sa mga bata, ug ang mga kahangawa sa kahinlo wala hisgoti. Busa among isugyot nga tagdon sa mga magbabasa ang artikulong “Himoang Luwas ang Inyong Pagkaon” (Hunyo 22, 1989), nga nag-ingon: “Ang mga binuhi ug ubang mga hayop kinahanglang ipalayo gikan sa mga dapit nga andamanan ug pagkaon.” Tingali ang balaybalay sa gawas o usa ka lawak sa gawas sa kosina mahimong mas haom nga dapit nga katulgan sa iro.—ED.
Kinabuhi sa Ubos Gusto kong pasalamatan kamog dako sa mainiton, apan buhi, nga artikulo bahin sa Australia, nga ginganlag “Lahi ang Kinabuhi sa Yuta sa Ubos.” (Oktubre 8, 1997) Bisan tuod daghan na ang akong nabasa bahin niining makalingaw ug punog-kadaiyahan nga nasod, ang inyong artikulo nakatabang kanako sa pagsabot nga angay gayod kitang magmapasalamaton kang Jehova tungod sa iyang kahibulongang kalalangan.
L. K., Alemanya
Walay Suliran nga Paraiso Ako mapasalamaton kaayo sa serye nga “Usa ka Walay Suliran nga Paraiso—Kanus-a?” (Oktubre 8, 1997) Ang akong apohang babaye namatay una pa ako mahimugso. Namatay siya sa kanser. Apan sa Paraiso, wala na unyay sakit. Kining artikuloha nagdasig kanako sa pagpabiling matinumanon aron ako siyang makita sa Paraiso.
M. J., Trinidad
Pagkatulog sa Kahayopan Buot nakong ipahayag ang akong apresasyon sa artikulong “Mga Sekreto sa Pagkatulog sa Kahayopan.” (Oktubre 8, 1997) Kahimut-anan kadto—ug akong nakat-onan ang ubang kahibulongang mga butang bahin sa kalalangan.
J. G., Puerto Rico
Nagbuhi akog isda, ug gusto kong masayod kanunay kon matulog ba ang isda. Busa nalipay ako sa pagkasayod nga kon akong makita kining wala maglihok, mipahulay lamang kini.
A. P. L. M., Brazil
Gasakit nga mga Tiil Ang inyong artikulong “Tabang Alang sa Gasakit nga mga Tiil” (Oktubre 8, 1997) daw gisulat ilabina alang sa mga babaye. Apan, pipila ka adlaw human mabasa ang artikulo, ang akong bana nagmulo nga nagsakit ang iyang tiil—nga iyang gidaladala sulod na sa pito ka tuig. Nakahinumdom sa artikulo, miadto kami sa tindahan ug sapatos. Motuo ka ba—nagsapatos siyag numero 8 nga medyum dihang siya nagkinahanglag numero 9 nga lapad! Nakasinati na siyag kahupayan, tungod sa Pagmata!
S. J., Tinipong Bansa
Nagtindog ako halos sa tibuok adlaw sa trabaho, ug nagsugod na ako sa pagkaproblema tungod sa pagsul-ob ug tag-as nga mga tikod. Niining bulana ako nag-alagad ingong oksilyare payunir (dili-bug-os-panahong ebanghelisador), ug sa tabang sa artikulo, mipalit akog tulo ka parisan sa komportableng mga sapatos. Salamat sa pagkahimong interesado sa among panglawas ug sa paghatag kanamo kanunay ug kasayoran.
C. L., Alemanya
Gubat ug Kabataan Daghan kaayong salamat sa serye nga “Kon Unsay Nahimo sa Gubat Ngadto sa Kabataan.” (Oktubre 22, 1997) Nakatabang gayod kini kanato sa pagsabot nga gikinahanglan gayod nato pag-ayo ang Gingharian ni Jehova aron sa pagtapos sa makadaot nga mga epekto sa gubat. Tinuod nga makapalamdag, nga nagpakita kanato sa kapintasan sa ubang kayutaan nga wala masayri sa kadaghanan kanato.
Y. C., Inglaterra
Dili ko gustong mobasa bahin sa pagmaltratar sa kabataan. Karon mismo ako kahilakon. Makapalagot gayod kanako ang paglantaw sa kalibotan nga nagakaugmad ngadto sa walay-hunahunang katilingban sa di-mabinationg mga tawo. Nakadayeg ako kaninyo sa inyong kaprangka sa pagpresentar niining makapalamdag nga artikulo.
K. E., Tinipong Bansa