Gikan sa Among mga Magbabasa
Ang Gasa sa Pandungog Buot kong ipahayag ang akong apresasyon sa artikulong “Ang Imong Pandungog—Usa ka Gasa nga Angayng Pabilhan.” (Septiyembre 22, 1997) Sa wala pa mabasa ang artikulo, ako naghunahuna nga ako adunay igong pagsabot kon unsay nagakahitabo diha sa dalunggan ug kon sa unsang paagi kita makadungog. Bisan pa niana, wala ako makaamgo sa akong pagkawalay-alamag. Ang ilustrasyon sa panid 23 maoy kahibulongan! Ako nahingangha sa gidak-on sa hunahuna ug panlimbasog nga gigugol sa pagmugna nianang ilustrasyon sa dalunggan. Ako labaw pang nahingangha sa kon unsay gikinahanglan sa paglalang sa tinuod nga dalunggan!
A. S., Tinipong Bansa
Ang akong higala ug ako maoy parehong medikal nga mga espesyalista, ug kami sinserong nagtuo nga sa among daghang tuig sa sekular nga pagtuon, kami wala pa makabasa ug artikulong yano kaayo ug tukmang naghubit sa dalunggan. Kining artikuloha naghimo kanamong mouyon sa mga pulong sa Salmo 139:14: “Sa makalilisang nga paagi ako kahibulongang gibuhat.”
M. B. ug Z. B., Venezuela
Biktima ako sa usa ka hubog nga drayber. Human sa usa ka bulan nga walay panimuot, ako nahigmata nga dili na makadungog. Human sa 18 ka tuig ako sa gihapon bungol pa, apan uban sa tabang sa mga hearing aid, ako makadungog sa usa ka sukod. Kining tukma sa panahong artikulo nagtabang gayod niadtong makadungog nga mobati niadtong kinsa adunay diperensiya sa pandungog.
K. C., Tinipong Bansa
Kilimanjaro Ako sa tinuoray nalingaw sa artikulong “Kilimanjaro—Ang Kinapungkayan sa Aprika.” (Septiyembre 8, 1997) Nakita ko ang Bukid sa Kilimanjaro sa Enero 1994 samtang nagtambong sa usa ka internasyonal nga kombensiyon sa mga Saksi ni Jehova sa Kenya. Ako sa tinuoray natandog gayod sa talan-awon ug nagpasalamat kang Jehova tungod sa iyang kahibulongang binuhat ingong atong mahigugmaong Maglalalang.
E. J., Tinipong Bansa
Dili Bahin sa Kalibotan Akong nagustohan ang artikulong “Ang Hunahuna sa Bibliya: ‘Dili Bahin sa Kalibotan’—Unsay Buot Ipasabot Niini?” (Septiyembre 8, 1997) Human sa pagtuon niana, ako mihukom sa paghunong sa paggamit sa pulong nga “kalibotanon” sa paghubit sa mga dili-Kristohanon. Kon buot hunahunaon, 30 ka tuig kanhi, ako dili pa usa ka Kristohanon. Kon ang tawo nga unang nagpailaila kanako sa Bibliya adunay mapahitas-ong tinamdan, nan malagmit nga dili na gayod ako buot makigsulti pag usab sa usa ka Saksi!
B. G., Tinipong Bansa
Mga Mangingilad Wala ko maggahin ug panahon sa pagbasa sa seryeng “Pagbantay sa mga Mangingilad!” sa dihang una kong nadawat ang Septiyembre 22, 1997, nga isyu. Sa pagkasunod adlaw, upat kanamo ang nabiktima sa usa ka daw mahigalaong drayber sa taksi kinsa mipahimulos sa among kawalay-kasinatian sa siyudad. Gipabayad kami ug dako kaayong kantidad sa salapi ug gipakanaog nga halayo gikan sa among destinasyon. Kon amo pa lang untang gipadapat ang mga pulong sa Proverbio 14:15, nga gikutlo sa kataposan sa mga artikulo: “Si bisan kinsa nga walay-kasinatian motuo sa tanang pulong, apan ang maalamong tawo magapalandong sa iyang mga lakang”!
J. P., Pilipinas
Mga Krusada Ako nagahimog panukiduki bahin sa ulohang mga Krusada dihang akong nadawat ang Oktubre 8, 1997, nga isyu, uban sa artikulong “Ang mga Krusada—Usa ka ‘Makapasubong Panglimbong.’” Amo gayong nadawat ang impormasyon sa hustong panahon! Napahinumdoman ako sa kahinungdanon sa pagbasa dayon sa magasin sa dihang akong madawat kini.
T. K., Pinlandia
Walay-Suliran nga Paraiso Ako nuybe anyos, ug buot kong pasalamatan kamo sa artikulong “Usa ka Walay-Suliran nga Paraiso—Sa Dili Madugay Usa ka Kamatuoran.” (Oktubre 8, 1997) Ang artikulo nakatandog gayod kanako tungod kay ang akong papa atua sa halayong lugar, ug sa gabii ang akong mama ug ako mahadlok bisan sa pag-abli sa bentana tungod kay basin adunay mosulod sa among balay. Busa sa dihang akong nabasa kon sa unsang paagi si Jehova nagsaad sa pagwagtang sa tanang krimen ug kapintasan, ako nahupayan.
D. M., Tinipong Bansa