Gikan sa Among mga Magbabasa
Pagpangita sa Usa nga Sinagop Buot kong pasalamatan kamo tungod sa kasinatiang “Usa ka Makalilipay nga Sorpresa.” (Pebrero 22, 1997) Makapatandog gayod ang pagbasa kon sa unsang paagi kining bataa nakakaplag sa iyang tinuod nga inahan ug nahibaloan nga siya usab maoy iyang igsoong babaye sa espirituwal!
M. G. D., Italya
Nakahilak ako sa pagbasa sa sugilanon sa kinabuhi ni Dana Folz. Ako may igsoong lalaki nga sinagop nga nakahimamat sa iyang inahan sa dihang siya hamtong na. Dili kadto usa ka malipayong panagkitaay pag-usab. Bisan karon, siya aduna gihapoy dili maayong mga pagbati sa among pamilya. Ang artikulo nagtabang kanako nga masabtan ang kahinungdanon nga pakitaan siyag pailob ug gugma.
M. D. L., Argentina
Nakita ko ang inyong magasin diha sa kasilyas sa usa ka lokal nga patigayonan. Naundan kadto sa usa sa labing makaiikag nga mga sugilanon nga akong nabasa sukad! Ako kanunayng gipangutana: “Komosta kon ang bata gimabdos gumikan sa usa ka paglugos? Dili ka ba mouyon sa aborsiyon ubos niini nga mga kahimtang?” Wala nay labing maayong hangyo nga ikahatag alang sa kinabuhi sa wala pa matawong bata kay sa makaiikag, tinuod-kinabuhing drama ni Dana Folz.
M. P., Tinipong Bansa
Organisadong Krimen Usa ako ka magtatambag bahin sa seguridad ug membro sa Police-Community Relations Committee. Nakaplagan ko nga praktikal ug mapuslanon kaayo ang inyong mga sugyot bahin sa kon sa unsang paagi mapanalipdan ang pamilya sa usa gikan sa krimen. (“Organisadong Krimen—Kon sa Unsang Paagi Kini Nagaapektar Kanimo,” diha sa isyu sa Marso 8, 1997) Gipalibot ko na ang magasin ngadto sa ubang mga membro sa komite. Makapahupay ang pagkasayod nga usa ka adlaw moabot ang usa ka kalibotan nga walay krimen.
C. E. J. A., Nigeria
Ang mga artikulo ilabinang nakatabang tungod kay gitun-an ko sa Bibliya ang usa ka tawo nga membro sa organisadong krimen sulod sa miaging 11 ka tuig. Ang mga kalisod sa pagputol sa mga koneksiyon uban sa organisadong krimen tukmang gipatin-aw. Pinaagi sa tabang ni Jehova, siya usab makalingkawas kon siya mohukom sa pagbuhat niana.
A. M., Tinipong Bansa
Mga Bulak Ako diyes anyos, ug buot kong pasalamatan kamo tungod sa artikulong “Ang mga Bulak Nagpakita nga Adunay Nagatagad.” (Marso 8, 1997) Kini nagtudlo kanako kon unsaon pag-atiman sa mga bulak aron kini molungtad ug dugay.
L. C., Italya
Sa daghang tuig buot ko nga mahibalo kon unsaon pagpreserbar ang mga bulak, sanglit malingaw kaayo ako niini. Ugaling, kini sa subsob dali ra kaayong malawos. Ang mga sugyot sa Pagmata! nakatabang gayod kanako. Ako mapasalamaton kaayo tungod sa buluhaton nga inyong ginabuhat.
J. P., Mexico
Pagkahimugso sa Bituon Ang artikulong “Pagkahimugso sa Bituon Diha sa ‘Salag’ sa Agila” (Marso 8, 1997) nagpahinuktok kanakog maayo sa makadiyot bahin sa maanindot, wala-kahilabting kalalangan ni Jehova nga Diyos. Ako natandog gayod.
J. A., Australia
Pagsagop Ako daw mao gayod ang gihisgotan diha sa artikulong “Usa ka Kinasingkasing nga Hangyo.” (Marso 8, 1997) Ako napaangkan sa edad nga 19. Naglagot ug nayugot pag-ayo ang akong inahan, ug gipahibalo ako niya nga ang bata wala kinahanglana. Gibati ko nga mas makaayo sa akong bata nga lain ang moatiman kaniya. Human mahimong usa ka Kristohanon, ako miampo sulod sa 15 ka tuig nga mahimamat ko siya. Gitubag sa kataposan ang akong mga pag-ampo sa mga panahong miagi, ug nahimamat ko siya ug gipaambit kaniya ang maayong balita. Masinabtanon kaayo siya sa mga kahimtang nga nagtukmod kanako sa pagpasagop kaniya. Ang akong tambag sa mga babaye nga anaa niining kahimtanga mao ang padayong pag-ampo kang Jehova. Tingali moabot ang panahon nga ikaw mahiusa pag-usab uban sa imong anak. Kon dili man, ang Diyos mohatag kanimo ug kalinaw sa hunahuna ug sa kasingkasing kon bug-os ka nga mosalig kaniya.
G. S., Tinipong Bansa