Usa ka Relihiyosong Karnabal

Sinulat sa koresponsal sa Pagmata! sa Italya

KADTO maoy sa Pebrero 1995 nga nagsugod pagkaylap ang mga taho labot sa gituohang usa ka modernong-adlawng milagro: Usa ka estatwa ni Madonna sa Civitavecchia gikaingong nakit-an nga naghilak ug dugo. Sukad niadto, ang mga Katoliko sa tibuok kalibotan nanuaw aron makita nila mismo ang estatwa.

Bisan pa niana, sumala sa mantalaang La Repubblica, daghang Katoliko ang naglagot sa “karnabal nga kahimtang” palibot sa dapit nga duawanan sa turista. Bisan ang daghang teologo gigil-asan bahin sa daghang tawo nga nagpanon sa pagpasidungog sa estatwa. Pananglitan, si Luigi Pizzolato, usa ka magtutudlo sa Katolikong Unibersidad sa Milan, nagsaway sa simbahan sa pagkakontento na sa “napukaw sa emosyon” nga pagtuo. Siya miingon nga ang mga bunga nga gipatungha niining gitawag-kunohay nga milagro “nadaot pinaagi sa patuotuo.” Laing teologo, si Carlo Molari, nagpahinumdom kanato nga “sa Bag-ong Testamento, usa ka Simon Magus ang migamit ug labaw sa kinaiyanhong mga gahom alang sa iyang kaugalingong kaayohan​—aron makasapi, ingon sa paghubit nato niana karong adlawa.”​—Buhat 8:​9-​24.

Si Jesus nagpasidaan sa iyang mga tinun-an nga magbantay niadtong kinsa nagahimog “dagkong mga ilhanan ug mga katingalahan.” (Mateo 24:​3, 24) Bisan kon ang maong mga ilhanan daw tinuod, ang pagtuo sa usa ka Kristohanon dili ikapasukad diha sa gituohang mga milagro. (Hebreohanon 11:​1, 6) Hinunoa, pinaagi sa pagbaton ug tukmang kahibalo sa Pulong sa Diyos ug pagpadapat sa tambag niini nga ang malig-ong pagtuo mahimong mabatonan. (Juan 17:​3; Roma 10:​10, 17; 2 Timoteo 3:16) Buot ba nimong makabaton sa maong matang sa pagtuo? Nganong dili tugotan ang mga Saksi ni Jehova nga motabang kanimo sa sunod higayong sila moduaw?

[Picture Credit Line sa panid 31]

AGF/La Verde