Ang Arte sa Pagkorte ug Baston

Sinulat sa koresponsal sa Pagmata! sa Britanya

“AKO kanunayng mahibulong sa pagkasayod nga adunay dagkong dapit sa British Isles nga walay usang may ideya kon unsay imong ipasabot sa dihang moingon ka nga ang imong pasatiempo mao ang pagkorte ug baston,” matod sa usa ka hinite sa maong arte.

Daghan ang sinati na ug baston o sungkod sa magbalantay sa karnero. Ang pagkorte ug baston magpausab niining ordinaryong mga galamiton ngadto sa pagkahimong talagsaon nga kalaki sa arte. Sa kasiglohan, ang mga magbalantay sa karnero ug mga magbabaol nakakaplag nga kining madanihong trabaho nanginahanglag dakong kahanas​—ug tumang pailob. Apan unsay nalangkit sa pagkorte ug baston?

Pagpili sa Kahoy

Ang unang tikang mao ang pagpili sa kahoy. Magamit ang bisan unsang kahoy nga hustog mga sukod​—ang blackthorn, mansanas, o peras. Kasagarang gipili ang holly tungod sa dagko ug madanihong mga buko niini. Apan daghang tigkorte ug baston ang gustong mogamit ug kahoy sa hazel. Usahay ang usa ka kahoy adunay salingsing nga motubong ambihas ug diyutay tumong sa usa ka sanga o gamot. Magpaposible kini nga maporma ang enterong baston​—ang pul-an ug ang lawaslawas​—gikan sa usa ka bahin sa kahoy.

Kanus-a ang labing maayong pagputol sa lawaslawas? Sagad sa dihang wala na magtubo ang kahoy ug wala na mag-agos ang tagok, bisan tuod nga daghang tigkorte ug baston midason nga ang labing maayong panahon maoy dihadiha dayon​—una pa maunhan sa uban! Bisan hain niana, sa dihang ang tigkorte ug baston natagbaw na nga nakaputol na siyag angayng piraso sa kahoy, kinahanglan nga iyang grasahan o pintalan ang mga pinutlang tumoy, aron dili moliki ang kahoy. Dayon kinahanglang paughon ang kahoy, usa ka proseso nga dangtag duha ka tuig o labaw pa. Nianang panahona lamang nga ang tigkorte ug baston makasugod na sa paglilok.

Paglilok sa Pul-an

Kon ang sanga walay natural nga kuptanan, o pul-an, ang tigkorte makamugnag pul-an ginamit ang sungay sa baka, karnero, o sa kanding. Sama sa lawaslawas, ang sungay kinahanglang paughon, sagad sulod sa usa ka tuig. Dayon, ginamit ang pang-ipit, ang tigkorte ug baston magkulit sa sungay sumala sa iyang gustong disenyo. Sulod sa daghang kaliwatan ang mga magbalantay sa karnero naggamit ug hurnohan sa tigsalsal ug puthaw, nagbukal nga tubig, nagbagang mga uling sa karbon, o bisan ang kainit ibabaw sa lamparilya aron malubaylubay ang sungay. Kini mahimong himoon sa bisan unsay mahunahunaan ug magama sumala sa kahanas sa magbalantay sa karnero. Pananglitan, makalilok siyag kuptanan nga sama sa irong collie, langgam, kapehong isdang trout, ulo sa langgam nga pheasant, o sa gamayng mananap.

Samtang kuliton ang sungay, ayohog kulit sa tigkorte ug baston ang mga detalye. Kon, pananglitan nagkorte siyag usa ka trout, ang ikog ug ang mga bukog sa silik ipalakra ginamit ang binagang puthaw ug ang usa ka linginong iglalakra maoy gamiton sa pagporma sa matag usa ka himbis. Ang mga mata mahimo gikan sa sungay sa black buffalo. Tinta, inay pintura, ang gamiton sa pagkolor sa lawas. Kapin sa usa ka sapaw ang gikinahanglan, ug hayan makakapoy ang pagpahid sa tinta diha sa pinasinawng nawong. Ang kataposang himoon mao ang pagsapaw sa kolor pinaagig pagbarnis sa sungay.

Usa ka Hinashasang Buhat sa Arte

Gidugtong ang sungay sa lawaslawas pinaagi sa perno, lansang, o tusok nga kahoy. Dayon ang tigkorte ug baston sa kabatid magpahamis sa iyang buhat sa arte pinaagig pinong steel wool. Sunod, iyang pasinawon ug barnisan ang lawaslawas niini. “Akong mahuman sulod sa 100 ka oras ang pagpormag trout, pagkulit sa mga silik, ubp., pagpalakrag himbis sa lawas sa trout, pagkolor ug pagpasinaw aron makadaog sa bangga,” misulat ang usa ka sinati nga tigkorte ug baston.

Dili ikalimod, ang pagkorte ug baston maoy makuting trabaho. Apan ang mamugna mahimong usa ka tinuod nga buhat sa arte, ug ang pipila giapil pa ngani sa mga bangga. Sa bisan unsang kahimtang, ang tigkorte ug baston nagaisip sa iyang trabaho ingon nga makapahinumdom sa usa ka mas malinawong panahon, usa ka panghupay sa mga kalisod ug mga kapit-os sa modernong pagkinabuhi.