Ang Lubnganan ni Kristo sa Hapon?

NIADTONG 1935, si Koma Takeuchi, usa ka paring Shinto, nagpahibalo nga iyang nadiskobrehan ang lubnganan ni Jesu-Kristo sa usa ka bungtod sa balangay sa Shingo, sa amihanang Hapon. Siya nangangkon nga ang mga dokumento nga nakaplagan sa bodega sa usa ka pamilya nagpakita nga si Jesus nagpuyo sa usa ka panahon sa Shingo ug namatay didto. Sa pagpangita sa gilubngan ni Jesus, nakadangat siya sa usa ka bungdo ug mihinapos nga kadto mao ang lubnganan.

Dayon, usa ka dokumentong Hebreohanon ang gikatahong nakaplagan sa altar sa pamilyang Takeuchi nga nag-ingong si Jesus nakaduaw sa Hapon makaduha ug nagtuon pa ug mistisismo uban sa mga paring Hapones. Ang asoy nag-ingon nga si Jesus, kay gibudhian, mikalagiw gikan sa Judea ngadto sa kamingawan sa Siberia, dayon mipanaw paingon sa Hapon, nakigminyo sa usa ka dalagita sa maong dapit nga ginganlag Miyuko, nanganak ug tulo ka anak babaye, ug namatay sa pangedarong 106. Sumala sa asoy, ang tawong gipatay sa Jerusalem dili si Jesus kondili ang iyang manghod nga igsoong lalaki nga si Isukiri.

Unsa kahay lagmit nga motibo sa maong sugilanon? Sumala sa mantalaang Mainichi Shimbun, ang kalangkitan tali ni Jesus ug sa Shingo “nagsugyot ug mga posibilidad sa ekonomiya nga niana ang lokal nga mga awtoridad nahibalo pag-ayo.” Busa, gidasig ang pagtan-aw didto. Ang dugang imbestigasyon wala idasig. “Tugotan ta nga kaloton ang lubnganan ug sila walay makita kondili ang karaang mga bukog sa baka,” miingon ang usa ka maniniid. “Handurawa kon unsa ka dako sa kahigawad nga bation unya sa matag usa.”

Busa matag tuig sa Mayo 3, ang mga bisita kanunayng nagtigom atubangan sa gituohang lubnganan ni Jesus sa pagsaulog sa “Piyesta ni Kristo.” Usa ka paring Shinto ang magdumala sa okasyon ug mag-abog sa daotang mga espiritu sa dili pa mosugod ang pagsayaw.

Aduna bay kamatuoran niini nga sugilanon? Wala. Ang Bibliya nag-ingon kanato nga sa pangedarong 30, si Jesus nailhan, dili ingong usa ka biyahedor sa kalibotan, kondili ingong usa ka anak sa panday nga nagdako sa Nasaret. Ang upat ka Ebanghelyo naundan sa mga asoy sa mga saksing nakakita sa pagsangyaw ni Kristo sa Israel gikan sa pangedarong 30 hangtod sa 33. Naglakip kini sa mga dapit ug mga petsa ug nagpamatuod nga si Jesu-Kristo mismo ang gipatay sa Jerusalem. Busa, ang tinuod nga mga Kristohanon dili magpadala sa hinobrang mga taho nga nagtinguha sa pagtuis sa kamatuoran sa Bibliya alang sa hinakog nga mga katuyoan.