Gikan sa Among mga Magbabasa
Mga Anak Mobiya sa Panimalay Nahupay ako sa mga seryeng “Sa Dihang ang mga Anak Mobiya sa Panimalay.” (Enero 22, 1998) Tulo sa among upat ka anak mibiya sa panimalay tulo ka tuig kanhi. Bisan tuod gimatuto ko sila nga nagdahom nga moabot ang panahon nga sila mobiya, wala gayod ako maghunahuna nga ang tulo magdungan pagbiya! Ako gayong gipabilhan ang kabalaka nga gipakita sa Watch Tower Society sa pagbati sa mga ginikanan.
M. S., Hapon
Sa pagkakaron, ang akong asawa ug ako nag-alagad ingong espesyal nga mga payunir, o bug-os panahong mga tig-ebanghelyo, sa gawas sa among nasod. Ang inyong tambag kon unsaon pagpakita sa among mga ginikanan nga bisan tuod halayo kami, sila sa gihapon among gihigugma ug gimahal mosaler gayod.
M. M. S., Brazil
Ako 11 anyos. Wala nako hunahunaa ang mga buluhaton sa panimalay ingong pagbansay sa pagkahamtong. Apan kining mga artikuloha nagtabang nako sa paghunahuna sa lahi nga paagi. Salamat sa pagtagad namong mga batan-on.
D. U., Yugoslavia
Mga Gorilya Ang artikulong “Pagduaw sa mga Gorilya sa Bukid” (Enero 22, 1998) makalingaw basahon. Ako wala gayod maghunahuna nga ang usa ka tawo makapaduol pag-ayo sa mga gorilya nga walay pintas nga panag-away. Sa mga sine sila kanunayng gisalida ingong mabangis nga mga hayop. Salamat sa maong ekselenteng artikulo.
R. P., Venezuela
Pagnganga Akong sinserong mga pasalamat sa artikulong “Kon Giunsa Nako Pagsagubang ang Pagnganga.” (Enero 22, 1998) Ilabinang nakapadasig nako ang kasinatian ni Sven Siever, sanglit nag-atubang ako sa samang pakigbisog. Sa nanglabayng katuigan, ang Tunghaan sa Teokratikanhong Ministeryo nakatabang nako nga mahimong mas larinong mamumulong.
E. Z. S., Brazil
Ang Tunghaan sa Teokratikanhong Ministeryo gidumala matag semana sa lokal nga mga Kingdom Hall sa mga Saksi ni Jehova.—ED.
Nakadayeg ako sa positibong tinamdan ni Sven Siever bisan pa sa hinayng pag-uswag. Sa among kongregasyon dunay usa ka igsoong lalaki nga nakigbisog sa pagnganga. Makigsulti na ako karon kaniya nga mas matinahuron ug mabination.
K. K., Hapon
Tignganga usab ako sukad sa pagkabata. Pintok ang inyong punto sa dihang miingon kamo nga angayng sulayan sa usa ang pagsabot sa tignganga inay kay kaluy-an siya. Salamat niining artikuloha.
E. C., Italya
Ginikananhong Pagsupak Mao pay akong pagkadawat sa Enero 22, 1998, nga isyu ug nabasa ang “Mga Batan-on Nangutana . . . Unsa na man Kon Supak ang Akong mga Ginikanan sa Akong Pagminyo?” Sa akong hunahuna ako nasayop sa pagsupak sa pagminyo sa akong anak nga babaye. Apan ang artikulo naglakip sa tanang butang nga nakapabalaka kanako—ang iyang batan-ong edad, ang personalidad sa umaabot nga kapikas, ang palaaboton sa iyang pagpakigminyo sa dili magtutuo, ang posibilidad sa AIDS, ug ang mga kalainan sa kultura. Akong giampo nga kining artikuloha motidlom sa kasingkasing sa akong anak nga babaye.
N. B., Tinipong Bansa
Pagkanindot nga pagkasulat nga artikulo! Naghisgot kamog tandogonong ulohan ug gitagad kini sa tukma kaayong paagi. Daghang nagkalainlaing isyu ang gihisgotan, nga nagtabang sa magbabasa sa pagbaton ug bukas nga hunahuna niining mga butanga.
S. C., Tinipong Bansa
Walo ka tuig na akong bug-os panahong tig-ebanghelyo. Kristohanon usab ang akong mga ginikanan, ug duna kamiy di-pagkasinabtanay bahin sa akong desisyon sa pagminyo. Salamat kaayo sa pagtagana niining makatabang nga impormasyon.
T. C. F., Tanzania