Gikan sa Among mga Magbabasa
Kabalaka sa Impormasyon Nagsulat ako aron pasalamatan kamo alang sa seryeng “Kabalaka sa Impormasyon—Sa Unsang Paagi Naapektahan Ka Niini?” (Enero 8, 1998) Mahilig akong mobasa, apan karon lamang ako nakaamgo nga ako nahimong mabalak-on sa akong tinguha nga masayran ang tanang butang nga mahimong masayran. Kining mga artikuloha nakatabang nako sa pagbaton ug timbang nga punto de vista.
M. E., Italya
Gusto kong pahalipayan kamo bahin sa mabug-osong mga artikulo. Magpasalamat kaayo ako kon tugotan nga ipatik pag-usab ang pasiunang artikulo diha sa usa ka pulyeto sa balita alang sa among edukasyon ug teknolohiya sa media nga asosasyon. Ang giingong superhaywey sa impormasyon puno kaayo, ug maoy pinaagi sa ingong mga artikulo nga ang usa mahibalo sa tinuod ug makasagubang sa panahon sa impormasyon.
G. D., Ghana
Gihatag ang permiso nga ipatik pag-usab ang artikulo.—ED.
Pagkahadlok sa Diyos? Gibati kong napugos sa pagpahayag sa akong kahimuot tungod sa artikulong “Ang Hunahuna sa Bibliya: Sa Unsang Paagi Ikaw Mahadlok sa Usa ka Diyos sa Gugma?” (Enero 8, 1998) Sa taastaas nga panahon ako namalandong sa maong pangutana. Akong nasabtang ang pagkahadlok sa Diyos nagkahulogan sa pagbaton ug angayang kahadlok sa pagpasuko kaniya. Sa gihapon, gibati ko nga kinahanglang hisabtan ko nga mas bug-os pa kining ulohana. Unya akong nabasa kadtong artikuloha. Sa kataposan, makapatagbaw kaayong paghisgot kon unsay kahulogan nga mahadlok sa Diyos!
M. J. T., Tinipong Bansa
Inhustisya Natul-id Salamat alang sa artikulong “Ang Korte sa Uropa Nagtul-id sa Sayop.” (Enero 8, 1998) Ang pagkabati mahitungod sa pagdangop sa atong mga igsoong lalaki sa korte aron dili mapugos sa pagsulod sa militaryong serbisyo nagpahinumdom kanako kon sa unsang paagi ang atong mga igsoon nakadaog sa katungod sa pagsangyaw sa pultahan-sa-pultahan sa ma-Dominggo. Ang maong mga asoy makatabang kanako nga dili gayod sayonsayonon lamang kining pribilehiyoha.
S. V., Tinipong Bansa
Mga Inca Human mabasa ang artikulong “Kon sa Unsang Paagi Nawad-an ang mga Inca sa Ilang Bulawanong Imperyo” (Enero 8, 1998), ipahayag ko gayod ang akong dakong apresasyon alang nianang sugilanona nga nindot pagkahulagway ug makapahinuklog. Ang paningkamot ninyong mga Saksi sa paghatag sa inyong makapalipayng mensahe ngadto sa mga kaliwatan sa mga Inca sa walay duhaduha maghatag kanilag dakong kahupayan. Salamat kaninyo, Pagmata!, tungod sa pagsulti sa tinuod.
S. B., Nigeria
Ako diyes anyos, ug buot kong magpasalamat kaninyo alang sa artikulo. Nahingangha ako sa pagkadaghang milya sa karsada nga gibuhat sa mga Inca. Miangay usab ako kon sa unsang paagi sila magpadala sa mga mensahe.
F. C., Tinipong Bansa
Mga Anak nga Mobiya sa Balay Ako mapasalamaton sa seryeng “Sa Dihang ang mga Anak Mobiya sa Panimalay.” (Enero 22, 1998) Ang pagtugot nga mobiya ang akong mahal nga mga anak makapaguol ug hinay. Hinuon, husto kamo. Ang pagpuyo sa balay nga wala nay mga anak mahimong mas maayo sa paglabay sa panahon ug uban sa pagkamasinabtanon. Kaming mga ginikanan makapabag-o sa mga bugkos sa kaminyoon uban sa among mga kapikas.
A. E., Canada
Ang mga artikulo maoy tubag sa akong mga pag-ampo. Ang pagbiya sa mga anak sa balay mamahimong tinubdan sa kapaitan ug panagbangi. Apan tungod sa maayong tambag niining artikuloha, ang pakigdait ug gugma magmadaogon.
P. N., Pransiya
Akong gibati nga ang mga artikulo gisulat nga alang gayod kanako. Bag-o pa akong mibiya sa balay aron pag-alagad sa usa ka dapit diin adunay panginahanglan sa bug-os-panahong mga magsasangyaw. Kining mga artikuloha nakatabang nako sa pagsabot kon unsay gibati sa akong mga ginikanan ug pagbuntog sa akong kaugalingong pagbati nga sad-an tungod sa pagbiya kanila. Dugang pa, sundon nako ang tambag diha sa seksiyong “Sugyot Alang sa Dagko Nang mga Anak—Tabangi ang mga Ginikanan nga Makabuhi.” Bisan pag ako halayo, makahimo ako sa pagbating suod sa akong mga ginikanan. Salamat alang sa mga artikulong sama niini nga kanunayng moabot sa hustong panahon.
G. U., Italya