Gikan sa Among mga Magbabasa
Urakan nga Pauline Kanunayng makapalipay kanako sa dihang ako mapahinumdoman nga bahin ako sa usa ka organisasyong tinuod nga may pagtagad sa mga tawo. Salamat sa ekselenteng artikulo nga “Duha ka Bahin sa Usa ka Katalagman.” (Oktubre 8, 1998) Pagkamakapatagbaw ang pagkahibalo nga ang uban nag-ila nga ang mga Saksi ni Jehova “organisado ug matinud-anon”!
D. F. S., Brazil
Pag-inusara Ang artikulong “Ang Hunahuna sa Bibliya: Ang Pagkahinungdanon sa Pag-inusara” (Oktubre 8, 1998) daw mapadapat kanako sa personal. Ang pag-inusara maoy usa ka butang nga kinahanglanon aron ako makapadayon nga maayog kahimtang sa espirituwal ug emosyonal. Hinunoa, akong hinumdoman ang punto nga ang pag-inusara maoy “usa ka magantihong dapit nga pagaduawon apan peligrosong dapit nga pagapuy-an.”
L. G., Tinipong Bansa
Batikano ug Holocaust Latas sa katuigan, ang mga Saksi nagduaw sa akong panimalay, ug sadya kami. Ugaling, akong nakaplagan ang inyong artikulong “Ang Iglesya Katolika ug ang Holocaust” (Oktubre 22, 1998) nga makapasilo. Si Papa Pio XII maoy usa ka balaanong tawo kinsa mihimo sa bug-os niyang maarangan sa pagtabang sa mga Hudiyo, ug linibo ang naluwas tungod sa iyang mga paningkamot!
J. P., Tinipong Bansa
Dili namo tuyo nga magpasilo sa Katolikong mga magbabasa kondili nga mohatag ug tukma nga taho bahin sa panagbangi mahitungod sa Batikanong dokumento nga “We Remember: A Reflection on the Shoah.” Ang mga pahayag nga gihimo diha sa artikulo maoy mga panglantaw sa tinahod nga mga historyano, magsusulat, ug hurado—ang pipila kanila maoy mga Romano Katoliko mismo. Dayag, dalayegon ang bisan unsang papel nga tingali gidula sa Batikano sa pagluwas ug mga kinabuhi. Bisan pa niana, tinuod nga ang papa napakyas nga mosulti sa dayag batok sa rehimen sa Nazi. Ang paghimo sa ingon lagmit gayod unta nga nakaluwas sa minilyon ka kinabuhi.—ED.
Paghigugmaay sa Usag Usa Ang seryeng “Maghigugmaay pa Kaha ang Tanang Tawo sa Usag Usa?” (Oktubre 22, 1998) ekselente gayod! Nagtabang kini kanako sa pagpugong sa kusog nga agda nga akong bation usahay sa paghambin ug kasuko ug pagdumot. Daghang salamat! Naglaom ko nga ang pagdasig nga akong nadawat gikan sa inyong mga publikasyon magtabang kanako nga mahimong alagad ni Jehova nga Diyos.
G. C., Italya
Maisogong mga Misyonaryo Human mabasa ang artikulong “Wala na Kami Magkinabuhi Alang sa Among Kaugalingon” (Oktubre 22, 1998), kinahanglan gayod akong magpasalamat kaninyo alang sa maong makapalig-on-sa-pagtuo nga impormasyon. Dinhi sa Britanya daghang kawalay-interes ang among ginasagubang. Apan gamay ra kini kon itandi sa nasinati ni Jack ug Linda Johansson. Ang artikulo nakatandog gayod sa akong kasingkasing ug naghimo kanakong mapasalamaton sa kon unsay akong nabatonan.
L. J., Inglaterra
Ang akong asawa ug ako maoy bug-os-panahong mga ministro sulod sa pipila ka tuig na karon, ug nahibalo kami nga ang pagpailin-ilin sa bag-ong asaynment mahimong usa ka tinuod nga hagit. Ang mga Johansson prangka sa pagpahayag sa ilang gibati sa dihang sila mibalhin. Ang ilang estorya nagpakita kanamo nga wala kami mag-inusara sa among mga pagbati ug nga angay kaming magpadayon sa pagsalig kang Jehova.
S. E. C., Brazil
Paghimo sa Kamatuoran nga Ako Na Ako 12 anyos, ug ako nalingaw sa artikulong “Mga Batan-on Nangutana . . . Sa Unsang Paagi Akong Mahimo ang Kamatuoran nga Ako Na?” (Oktubre 22, 1998) Karon nga nagsugod na ang pag-eskuyla, medyo mas lisod nga mangandam alang sa Kristohanong mga tigom. Apan kinahanglan nakong paliton ang panahon. Ako nagtuo nga kining artikuloha magtabang sa daghang batan-on sa pag-ugmad sa gugma kang Jehova ug lig-ong mga gamot diha sa kamatuoran.
C. S., Portugal
Usa ka tuig pa nga milabay ako nangutana sa akong kaugalingon sa susamang mga pangutana bahin sa kamatuoran. Wala ako makaseguro kon gihigugma ko ba gayod ang kamatuoran o ako anaa diha tungod sa akong pamilya. Dayon akong gihimo ang inyong gidasig nga himoon—ako kining gipamatud-an sa akong kaugalingon pinaagi sa paghimog panukiduki sa Bibliya. Malipayon na ako karon sa pag-ingon nga ang kamatuoran ako na. Ako naglaom nga mahimong usa ka bug-os-panahong ebanghelisador!
H. N., Tinipong Bansa