Gikan sa Among mga Magbabasa

Pagdisdis Ang akong bana ug ako nagpasalamat kang Jehova gikan sa kinahiladman sa among mga kasingkasing sa artikulong “Pagdisdis nga Walay Kortang Pang-opera nga Gamiton.” (Pebrero 22, 1998) Gieskedyul ang akong bana alang sa operasyon sa utok tungod sa iyang arteriovenous malformation. Morag tubag sa among mga pag-ampo ang artikulo. Ang akong bana gioperahan sa pamaaging gihisgotan sa artikulo, ug maayo ra ang tanan.

L. J., Tinipong Bansa

Prensa sa Rusya Daghang salamat sa artikulong “Gidayeg sa Prensa sa Rusya ang mga Saksi ni Jehova.” (Pebrero 22, 1998) Buot ko lang kamong pahibaloon nga dili kini ang unang higayon nga ako mihilak sa pagbasa sa usa sa inyong talagsaong mga artikulo. Makapalipay ang pagkahibalo nga ang tibuok yuta sa usa ka adlaw mahimong ingon ka nindot sa bag-ong mga pasilidad sa sangang buhatan sa mga Saksi ni Jehova sa Solnechnoye.

I. C. S. A., Brazil

Dili-Magtutuong Amahan Nagbag-o Ang artikulong “Natandog ang Iyang Kasingkasing” (Pebrero 22, 1998) nagpahinumdom kanako sa akong kaugalingong pamilya. Dili usab magtutuo ang akong bana. Naghatag kanakog paglaom ang artikulo nga usa ka adlaw niana tingalig matandog ang iyang kasingkasing.

S. M., Tinipong Bansa

Nakasagubang ang Pamilya sa mga Nazi Wala pa gayod ako makabasa ug mas nindot nga kasinatian kay nianang kang Horst Henschel, diha sa artikulong “Gipalihok sa Pagkamaunongon sa Akong Pamilya Ngadto sa Diyos.” (Pebrero 22, 1998) Gikinahanglan kong mohunong sa pagbasa sa makadaghan taliwala sa mga parapo aron pugngan ang akong paghilak. Sa pagkatinuod ang amahan ni Horst maoy usa ka tawo nga milahutay ilalom sa pagpit-os, ug ang iyang panig-ingnan maoy usa gayod ka butang nga kanunay kong pabilhan.

A. K., Tinipong Bansa

Ang kasinatian ni Horst Henschel makapatandog kaayo. Gipalihok ako sa iyang kaisog ug gugma kang Jehova. Dili gayod ako makalimot sa mga pulong nga midasig kaniya samtang siya didto sa bilanggoan: “Ayaw kahadloki kadtong makapatay sa lawas.”

J. V. S., Brazil

Diyes-anyos ako, ug buot kong sultihan kamo nga pagkamakapadasig ang pagkahibalo kon sa unsang paagi ang mga Saksi ni Jehova nagkinabuhi kaniadto—kon sa unsang paagi sila mamatay kon dili sila moingon ug “Heil Hitler!” Apan ang mga Saksi nagpabiling lig-on ug wala moingon niana.

R. B., Tinipong Bansa

Garbo sa Rasa Nalipay kaayo ako sa pagbasa sa artikulong “Mga Batan-on Nangutana . . . Unsa na man ang Bahin sa Garbo sa Rasa?” (Pebrero 22, 1998) Makadaghang beses na akong gipangutana nga, “Unsay imong nasyonalidad?” Kay dili masubay ang kagikan sa akong pamilya, gitubag ko na lang sa matiawon nga, “Kalibogan!” Usa ka nagapanawng ministro miingon, “Kon si bisan kinsa mangutana kanimo kon unsay imong rasa, moingon ka lang, ‘Usa ako sa mga Saksi ni Jehova.’” Gipasigarbo ko ang pagkahimong anaa sa organisasyon nga pareho ang pag-ila sa tanang rasa.

D. H., Tinipong Bansa

Ako maoy 14-anyos ug buot kong pasalamatan kamo sa artikulo. Nagpihig na ako ug rasa tungod sa akong garbo sa rasa. Gipasabot kanako sa artikulo nga sa mga mata ni Jehova kitang tanan managsama.

I. P., Italya

Niadtong bata pa ako, gipasigarbo sa kadaghanan sa akong mga kauban sa eskuylahan ang ilang rasa ug pamanit, nga miingong aduna silay dugong Katsila, samtang ako nahisakop sa usa ka minoriya nga grupo. Nahimong maulawon ako ug nawad-ag pagtahod-sa-kaugalingon. Usahay mibati ako nga, ‘Wala ko magustohi ang akong pamanit!’ Natabangan ako sa tambag niini nga artikulo sa pagbaton pag-usab sa akong pagtahod-sa-kaugalingon ug sa pagbating tagbaw kon unsay gihatag ni Jehova kanako.

A. G., Pilipinas

Tinuis gayod ang akong panglantaw, nga naghunahuna nga ang mga tawong natawo sa mas adunahang mga nasod maoy mas labaw. Nakatabang kanako ang inyong artikulo nga masabtan nga adunay usa lamang ka rasa​— ang rasa sa tawo.

L. G., Brazil