Gikan sa Among mga Magbabasa
Kontrobersiya Bahin ni Shakespeare Ang artikulong “Ang Misteryo ni William Shakespeare” (Agosto 8, 1998) nagdasig kanako sa pagsusig dugang pa. Ang librong The Real Shakespeare: Retrieving the Early Years, ni Eric Sams, naghisgot sa pipila ka punto nga tingali makapainteres. Ingong usa ka pananglitan, daghang pangutana ang mahimong ikapatin-aw pinaagi sa pagsabot nga si Shakespeare hayan maoy usa ka Katoliko sa Protestanteng Inglaterra. Busa ang iyang pagkalagiw gumikan sa relihiyosong paglutos mahimong magpatin-aw sa gitawag nga katuigan nga walay nahibaloan bahin kaniya. Dugang pa, ang giangkong mga sinulat ni Shakespeare adunay daghang timaan sa iyang sayong kinabuhi. Ang mga ngalan sa pipila ka karakter maoy mga ngalan gikan sa iyang pamilya ug mga higala, lakip sa ngalang Hamlet—ang ngalan sa iyang anak lalaki. Ang iyang mga dula adunay daghang detalye nga lagmit gikuha gikan sa iyang personal nga kasinatian nianang mga butanga sama sa pagmatansa.
J. A., Tinipong Bansa
Ang kontrobersiya bahin sa magbabalak lagmit dili dayon masulbad. Bisan pa niana, among gipabilhan kining mga komentoha.—ED.
Mga Mahiligon sa Langgam Salamat sa inyong makapahimuot nga paghulagway sa usa ka katingalahang linalang ni Jehova diha sa artikulong “Ang Sunoy-sa-Bato—Matahom nga Langgam sa Lasang sa Amazon.” (Septiyembre 22, 1998) Ang inyong artikulo nagdala kanako sa makadiyot ngadto sa lasang sa Amazon.
E. L. V., Brazil
Kining artikuloha sa usa ka paagi nakadani sa akong pagtagad diha sa usa ka bag-ong paagi. Gipresentar kini diha sa makapahimuot nga dagway, ug kini nagpasiugda nga gibuhat ni Jehova kining tanang linalang alang sa atong kalipay!
L. H., Barbados
Nalingaw ako pag-ayo sa artikulong “Pagpaniid-ug-Langgam—Usa ka Makalingaw nga Pasatiempo Alang sa Tanan?” (Hulyo 8, 1998) Apan ang hummingbird, nga inyong gitumong ingong langgam sa “Norte/Sentral Amerika,” makita usab sa Amerika del Sur.
J. P., Argentina
Ang among kapsiyon dili-kompleto, ug among gipabilhan ang katin-awan.—ED.
Pagsentro sa Pagtagad sa Hunahuna Nalisdan ako sa pagsentro sa pagtagad samtang ang magtutudlo nagasulti. Apan ang inyong artikulo nga “Mga Batan-on Nangutana . . . Sa Unsang Paagi Makahatag Ako ug Bug-os nga Pagtagad?” (Septiyembre 22, 1998) nakatabang kanako sa pag-usab sa akong mga batasan diha sa lawak-klasehanan. Sukad nga nabasa ang inyong artikulo, akong nabuntog kining problemaha, ug ako karon mas disiplinado na.
M. A. M., Brazil
Aduna akoy problema sa pagsentro sa pagtagad. Wala ako makaamgo nga ang gikinahanglan lamang sa pagsentro sa pagtagad mao ang diyutayng panukmod ug disiplina-sa-kaugalingon. Kini nagkinahanglag makugihong paningkamot, apan sa akong hunahuna makahimo ako niini!
D. R. A., Tinipong Bansa
Ang Pagmata! nasudlag daghang impormasyon nga makapainteres kaayo sa mga batan-ong sama kanako. Nakabenepisyo ako gikan niining artikuloha tungod kay ang pagkadili-makasentro sa pagtagad maoy akong problema. Kinasingkasing nga mga pasalamat.
M. N., Italya
Mga Tren Ako nalingaw pag-ayo sa pagbasa sa artikulong “Ang Puthaw nga Dalan—Magpabilin Ba?” (Oktubre 8, 1998) Interesado ako sa mga tren sukad pa sa akong pagkabata. Ang inyong impormasyon bahin sa kasaysayan sa teknolohiya sa riles gikan sa sayong katuigan sa 1800 hangtod karon maoy tukma kaayo. Salamat niining makalingaw nga artikulo.
L. M., Tinipong Bansa
Nagtrabaho ako sa usa sa labing modernong mga pabrika sa tren sa kalibotan, ug akong pahalipayan kamo sa pagsulat nianang ekselenteng artikulo. Ang inyong impormasyon tinuod ug dokumentado kaayo. Buot lang akong magkomento nga ang ubang kusog-modagan nga mga tren naggamit ug mga materyales sama sa aluminum imbes nga stainless steel. Ingon sa gipakita sa usa ka dili pa dugayng aksidente sa tren sa Alemanya, hayan nga ang kakusog-modagan makab-ot baylo sa pagkadili-hilwas.
I. D. C., Portugal