‘Sa Unsang Paagi ang Inyong Buluhaton Mohatag ug Kaayohan sa Katilingban?’
KINI ang pangutana nga gisukna ni Chandrakant Patel, usa ka magsusulat nga taga-India, sa usa ka kawani sa tibuok-kalibotang hedkuwarter sa mga Saksi ni Jehova, sa Brooklyn, New York. Si G. Patel misuroy sa mga pasilidad ug nakadayeg pag-ayo sa iyang nakita ug nadungog nga sa pagbalik sa India, misulat siya ug usa ka artikulo alang sa usa ka Gujarati-nga-pinulongang mantalaan.
Sa pagtandi sa pipila sa mga pagtulon-an sa mga Saksi ni Jehova nianang sa mga organisasyon sa iglesya sa India, si G. Patel misulat nga ang mga Saksi ni Jehova nagtuo sa labing-gamhanang Diyos, si Jehova, nga sukwahi sa doktrina sa Trinidad nga kasagarang gitudlo sa mga iglesya ug nga sila dili mogamit ug mga imahen diha sa ilang pagsimba. Siya miingon nga ang mga Saksi ni Jehova adunay hatag-as nga mga prinsipyo tungod kay sila lig-ong nangupot sa Kristohanong mga prinsipyo nga gilatid sa Bibliya maylabot sa pagpanapaw, aborsiyon, ug pagdumot o pagpatay sa isigkatawo. Iyang gihubit ang mga Saksi ingong makigdaiton, mahigugmaon, hataas-ug-pailob, ug mahunahunaon-sa-kaayohan sa uban maingon man maisogon ug masiboton sa pagpakaylap sa mensahe sa Bibliya ngadto sa uban.
Unsang tubag ang nadawat sa magsusulat nga taga-India sa iyang pangutana nga, ‘Sa unsang paagi ang inyong buluhaton mohatag ug kaayohan sa katilingban?’ Siya misulat: ‘Ang tubag mao nga ang edukasyon sa Bibliya mapuslanon sa tanang bahin sa kinabuhi.’ Ilabinang buot masayod si G. Patel mahitungod sa mga natad sa pag-atiman sa panglawas ug panarbaho. Nagkutlo sa mga bahin sa pagpatin-aw nga gihatag kaniya, siya mitaho: ‘Kon ang usa ka tawo mosunod sa Kasulatanhong tambag nga molikay sa makadaot nga mga substansiya sama sa tabako ug mga droga ug magkinabuhi ug hinlong kinabuhi, iyang malikayan ang nagkadaiyang mga sakit. Ug ang kugihan, hinlo-sa-moral, matinud-anong mga indibiduwal lagmit kaayong makatrabaho. Dugang pa, ang paghusay sa mga problema diha sa maluloton ug mahigugmaong paagi moresulta sa malinawong relasyon sa uban. Busa ang pagtudlo sa mga tawo kon unsay giingon sa Bibliya makabenepisyo sa katilingban.’
Nakita niini nga magsusulat ang mga pagtulon-an sa Bibliya nga nagalihok diha sa tibuok-kalibotang hedkuwarter sa mga Saksi ni Jehova. Ang iyang artikulo nagdayeg sa kahinlo ug kamalipayon sa debotadong boluntaryong mga trabahante nianang sentro sa espirituwal nga kalihokan. Ikaw makapahimulos usab gikan sa mga pagtulon-an sa Bibliya. Ang mga Saksi ni Jehova malipay nga mopasundayag kanimo kon unsaon.
[Picture Credit Line sa panid 31]
Mantalaan sa luyo: Kortesiya sa Naya Padkar, Gujarati Daily gipatik gikan sa Anand, India